Read Konyak Naga KAHPALAN 3 Bible Online

KAHPALAN 3 - Konyak Naga bible

KAHPALAN 3

¹Sha-a Israellan hangshin-e Kanan me hokpu jeng hango yeshing, hüke iman jingne, tüolan kaiye Israelte toklak jingne Youngwanpawe tüohpu jat tüolan ngohnang;

²Israellan ngaipu jinlan-e wehok-a shinglak, hüke üshongpe yeshingpu lante Iye nyüolak jingne hei tüopa-a ngohyangki.

³Philistialan nokpu nga, hüyange Kananlan khongküm, hüyange Sidonlan, hüyange Lebanon kahtang me ngohpu Hivitlan, Baal Hermon kahtang mepu Hamath lamyekao te taipu yete ngoiye.

⁴Hüyange Youngwanpawe Mosa kaiye iman pajeiyonglante ngao phapu winjailak heiya yejailak she shinglak iman-a Israelte tok-e leilak jingne ngoh yangki.

⁵Tüokhei Kananlan, Hitlan, Amorlan, Perizzlan, Hivitlan, hüyange Jebuslan phei Israel kahtalan ngoh;

⁶hüyange iman-e iman yhalalan shekonyu ne menglak jingne yah, hüyange iman hayimlante iman-e yoi yhala lan phatam; hüyange iman-e iman kahwanglan shaoshan.

⁷Israel kahtalan-e Youngwanpa sheshao me hanghe yemei hatüo ling, hüyange Youngwanpa iman Kahwang pe-mei; hüyange Baal hei Asherah shaoshan.

⁸Tüokhei Israel phei tüi-e Youngwanpa mongshih ngai hüyange Iye iman Mesopotamia ahngpa Cushan Rishathaim te yüowetam; hüyange Israel lan-e Cushan Rishathaim wangpeng tet shaoshan.

⁹Hüpoi aope Israel lan-e Youngwanpate üngwün, Youngwanpawe Israellan jingne yintampupa ja ngaine tam, Caleb ünao Kenaz üha Othniel, aowe iman yintam.

¹⁰Hüyange Youngwanpa yaha I tangme pei, hüyange Iye Israel ngaophün; I wehokte tai, hüyange Youngwanpawe I yak me Mesopotamia ahngpa Cushan Rishathaim pha, hüyange Cushan Rishathaim tangme Iye okpu nge.

¹¹Tüokhei wangpeng deli kahmük me toloimei ngoh yangki. Hüwante Kenaz üha Othniel li.

¹²Üne-o Israel kahtalan-e Youngwanpa sheshao me hanghe yemei hatüo ling; hüyange Israel phei tüi-e Youngwanpawe Moab ahngpa Eglon wongnangne tam, hangjingne iman-e Youngwanpa sheshao me hanghe yemei tüopa ling.

¹³Iye I shongte Ammon hei Amaleklan woijem; hüyange I tai hüyange Israel tangme okpu nge, hüyange iman-e Jerikho logpee chingnyu yah:

¹⁴Tüokhei Israel kahtalan-e Moab ahngpa Eglon wangpeng pen me tet shaoshan.

¹⁵Hüpoi aope Israel kahtalan-e Youngwanpate üngwün, Youngwanpawe iman jingne yinyetampupa ja ngaine tam, yaknyaye shaha me jonpu kahta ja, Benjaminlan Gera üha, Ehud; hüyange Israel kahtalan-e Moab ahngpa Eglon tangte I kaiye poon shon.

¹⁶Hüyange Ehudte yoi jingne ünah ni yanglow ja, laopute yakkongja yao; hüyange Iye hatüo yoi yakjah ye inkhek mongme loweleap.

¹⁷Hüyange Iye Moab ahngpa Eglonte poon pha. Sha-a Eglon yeonge nütpu kahta ne ngoh yangki.

¹⁸Aope Ehudte poon-a phawe sho, poon kipalan-a Iye shonne yene tam.

¹⁹Hüpoi Ipa-a Gilgal ü-o me moungne lingpu long ngohpu nyoi mepu leihye, hüyange i, “O Ahngpa, nangjingne taowe lopu ngaoja ngohnang.” Tüokhei ahngpawe imni shaha angyange taitüoh she yoi shaoshanpalante ngaopha! Hüyange iman khongküm nokshaote yuwe küm.

²⁰Ehud I shongte owe pei, Hüwante ahngpa-a I shaha nyailüm meipu tüp me shotte ngoh yangki. Hüyange Ehudte i, “Taowe nang jingne Kahwang mepu ngaolan ja kiye ngohnang.” Tüokhei I yoi shotjing mepu yong.

²¹Hüyange Ehudte I yaknya ye ngai, hüyange I yajahye yung phang mepu yanglow teak-e yah, hüyange Ahngpa seatükte lütte tam;

²²hüyange yang phei yangmet-o omme ong, hüyange üyaowe yanglow-a phünge mah, hangjingne Ehudte seanyu mepu yanga yeteak yah; hüyange nuweshak ngai.

²³Tüophei me Ehud nyoijing mepu lüowe ngai, hüyange tüp taküplan Iye küppe tüoh, hüyange latte tüoh.

²⁴Sha-a I taitephei me I shaoshanpalan pei; hüyange iman-e nge, hüyange leihuyah, tüp taküplan latyange ngoh yangki hüyange iman-e teih, “Ahngpa-a I nying nyingke nyailüm meipu tüp me wangyang hahnang.”

²⁵Hüyange iman nüngneiye manteih pute ngoiye tanne ngoh yangki; hüpoi leihuyah, Iye tüp mepu taküp ye-ep; tüokhei iman-e yüpmee yahpeiye tüolan-a ep; hüyange leihuyah, iman ahngpa-a tüpsa me toitawe liteiye ngoh yangki.

²⁶Iman teitan-e ngohwante Ehud phette tai, hüyange moungne lingpu long ngohpu nyoi kaiye tai, hüyange Seirahte tai.

²⁷Aope I peingoi, Iye Ephraim phaotang kahmük me nyawong wüng, hüyange Israel kahtalan phaotang nyoilan mepu, I üjupa ne mengyange lai.

²⁸Hüyange Iye imante i, “Ü-pheite woikei! Hangjingne Youngwanpawe numan wepa Moablan numan yak me phateki.” Tüokhei iman I tokpheite woi, hüyange Moab yekao me Jordan yengtien jing yah;

²⁹hüwante kahta ja nehoi yeyintampe iman-e shemeipupa Moab wetaipalan haja pen nanjing toi.

³⁰Tüokhei tüopa nyih me Moab kahmük Israellan yak me ong. Hüyange wangpeng detet ngoiye kahmük me toloimei tüo.

³¹Ehud phei me woipa ne Anath üha Shamgar ngohyangki, aowe Philistialan gho wok ngoiye mahu aipu wongjoi phei toi; hüyange Iye-o Israel yintam.