Read Konyak Naga KAHPALAN 4 Bible Online

KAHPALAN 4 - Konyak Naga bible

KAHPALAN 4

¹Ehud liphei me Israel lan-e Youngwanpa sheshao me hanghe ümeng üne-o ling.

²Tüokhei Youngwanpawe iman Hazor me wanglam lam-e ngohpu, Kanan Ahngpa Jabin yak me yüo. I jing nyahponglan woipa-a Sisera, ao Harosheth Haggoyim yinhu kahtok me nyoi.

³Hüwante Israel kahtalan-e jamlak jingne Youngwanpate üngwün; hangjingne I me yan tongtoi gho tu ngoh yangki, hüyange Israellan wangpeng da ngoiye shüpshe yenangpe shaoshi tam.

⁴Tüo hipak me Lappidoth shekonyu Deborah hinyu, yhawe Israel ngao phünne ngoh yangki.

⁵Hüyange Ephraim phaotang kahmük Ramah hüyange Bethel nipa me Deborah logpee phangme yhawe shotpu ngoh yangki; hüyange Israel lan-e ngao phünne yha tangte ong.

⁶Yhawe Kedesh Naphtali mepu Abinoam üha Barakte nyikne shonne Ite i, “Israel Kahwang Youngwanpawe nang tangte hüke ye-itam a? ‘Taitüoh Tabor kahtang me, Naphtali nokphong hüyange Zebulun nokphong mepu nang kahtalan haja pen nyik-e jemtüoh.

⁷Taowe Jabin nyahponglan woipa Sisera, numan phei Kishon yengyin nah me hüolak jingne I tongtoi hüyange ükhong woiye ongne tamlak; hüyange Taowe numan yak me I phalak.’ ”

⁸Barak-e yhate jan-e i, “Nang ü-phei tailakei she ima-a, tao tailak; hüpoi nang ü-phei mintai she ima-a, tao yetailak.”

⁹Hüyange yhawe i, “Tao ütingha me nang phei tailak; tüoyangpoi nang hanghepa lamnyu me tainang, okpu ngepu minyong ngampai-a nange yeyahlak. Hangjingne Youngwanpawe sheko ja yak me Sisera phalak.” Hüwante Deborah yayong hüyange Barak phei Kedesh te tai.

¹⁰Hüyange Barak-e Zebulun hei Naphtali nokphonglan Kedeshte nyik; hüyange kahta haja pen I phei te tai; hüyange Deborah I phei ong.

¹¹Sha-a Mosa Iküo Hobab mepu jalunpu, Heber Kenlan mepu yan-e ngoh, hüyange Kedesh ü-o me Zaanannim me, longkhampee ngoiye taiye I nyenok weyange ngoh.

¹²Aope Siserate Abinoam üha Barak tabor kahtangte ongteki she jaine tam,

¹³Siserawe yoijing yan tongtoi gho tu, yinhulan Harosheth Haggoyim mepu Kishon yengyinke I phei taipu kahta khongküm shaijem.

¹⁴Hüwante Deborahwe Barakte i, “Hüla! Hangjingne Youngwanpawe Sisera nang yak me phapu nyih-a hatüo ngoh nang. Nang sheshao me Youngwanpa yetaipu a?” Tüokhei Tabor kahtang mepu Barak-e I pheite kahta haja pen woiyange lai.

¹⁵Hüyange Youngwanpawe Sisera hüyange I tongtoi khongkümpu hüyange nyahpong ükhong khongküm Barak yangnah me kümne tam; hüyange Sisera I tongtoi mepu yu hüyange ya phei phette tai.

¹⁶Hüyange Barak-e tongtoi hüyange nyahpong ükhonga yinhu Harosheth Haggoyimte jange tai, hüyange Sisera nyahpong ükhong khongküm yanglow phei langetam; kahta ja nehoi towe yetüoh.

¹⁷Hüpoi Sisera ya phei Kenlan Heber shekonyu Jael, yha nyenok yam-e phette tai; hangjingne Hazor ahngpa Jabin hüyange Kenlan Heber nokphong nipa me chingmei ngoh yangki.

¹⁸Hüyange Sisera phei hüolak jingne Jael nokshaote yu, hüyange Ite i, “Ongkei, ü-nokpu, ütangte ongyah, tahnyam;” hüyange I yha nyenokte ong, hüyange yhawe jhotnyeye büang.

¹⁹Hüyange Iye yhate i, “Chingmei lamlinge üte yinglak yeng yahkhu; hangjingne tao yengle nangki.” Tüokhei yhawe düamyeng sheng ja ep hüyange Ite yinglak jingne pha; hüyange Ite küppe muh tüoh.

²⁰Hüyange Iye yhate i, “Nyenok tafün shongme yongtüoh, hüyange ütam peiye nangte, ‘Tüome kahta ütam ngohnang kü a?’ she tongma-a, ‘Yenang’ she itüoh.”

²¹Sisera jamloi towenyai teiye pei, hüyange I nyaiye shimah. Hüwante Heber shekonyu Jael-e nyenok yongpu pelag ja yahyange, hüyange yha yak me yanmee ja jon hüyange I tangte jinge ong hüyange kahtok me lüowe manpei manpei shangme tak-e tam; hangjingne towe nyaiye peipuwe I mei meiye shiteiye ngoh. Hüke I li.

²²Hüyange leihuyah, Barak-e Siserate jange peiwante, Jael-e I phei hüolak jingne ngai hüyange Ite i, “Kei, nange yampu kahta-a taowe nangte hüopha ning.” Tüokhei Iye yha nyenokte ong; hüyange leihu, tüoken me Sisera nyenok pelagke lütyange, ümang me lamyange ngohyangki.

²³Tüokhei tüopa nyih me Kahwange Israellan sheshao me Kanan Ahngpa Jabin pha netam.

²⁴Hüyange Israel lan-e Kanan Ahngpa Jabin manmahtam she iman yak-e Kanan Ahngpa Jabin tangme ünyei ünyei okpu nge.