Read Konyak Naga KAHPALAN 5 Bible Online

KAHPALAN 5 - Konyak Naga bible

KAHPALAN 5

¹Hüwante tüopa nyih me Deborah hei Abinoam üha Barak niye tüopa hem lok:

²“Aope Israel me ahnghalan-e woine yong, aope kahtalan-e mongong puphei yoi nying nyingte pha. Youngwanpate minyong tüoh!

³“Jaitüoh, O ahngpalan! Na shongyange jaitüoh, O ahnghalan; Taowe hem loklak; Israel Kahwang, Youngwanpate taowe minyong hem loklak.

⁴“Youngwanpa, nang aope Seir mepu ngai, aope nang Edom kahjee mepu ngai, kahtoknyuwe nin, üne-o wangdanglan-e shok tai, wangphom lanmepu yeng yütne tam;

⁵Youngwanpa sheshao me kahtang lan ninne po, hüke otüome Sinai, Israel Kahwang, Youngwanpa sheshao me nin.

⁶“Anath üha Shamgar hipak me, Jael hipak me, wengtuh hipak me kahta yenangpe; hüyange yinkempalan-e lamkon me yinkem.

⁷Israel me chingshao wünge mah, Nang Deborah; Israel me nyuyong ja leye manngai manngai iman lak-e mah.

⁸Aope kahwang ülalan le; hüwante pejong me wehok ngoh. Israel haja deli mongme, ree yejema-a ngou ja nehoi ngeya ei?

⁹Ü-mongjang Israel woipalan iman phei ngohnang, aoyinne mongongpu phei iman nying nyingke phünne pha, numan-e Youngwanpa yongtüoh!

¹⁰“Numan gado üheng me shotpa lan-e tüopa jeng itüoh, numan vee-am me shotpalan, hüyange numan aoyin kemnang, lamme kempalan.

¹¹Jaihuyah! Hemlokpalan ngao wünge yengnunglan neikonpu me, tüoken me iman-e Youngwanpawe okpu jeng leihye-e ilak, hüke Israel me chingshaowe okpu jeng. “Hüwante Youngwanpa kahtalan pejong te yu.

¹²“Lüotüoh, Lüotüoh, Deborah! Lüotüoh, Lüotüoh, hemja Hintüoh! Yayong tüoh, Barak, küppe angpalan, woitei tüoh, O Abinoam üha!

¹³Hüwante jetohapu lwngwanglan kem-e yu; Youngwanpa kahtalan wongnangpalan kaiye I jingne yayonge yu.

¹⁴Ephraim mepu iman yayonge kahjee yete lai; nang phei woi-e, Benjamin, nang pheipulan; Machir mepu woipalan yayonge yu, hüyange Zebulun mepu wongjoi jonpu woipalan sheihshin.

¹⁵Issakhar ahnghalan Deborah phei pei yangki, hüyange Issakhar monghümpu Barak phei ngoh. Kahjee yete iman I shongte owe teishunge pei. Reuben nokphong yome mong teiyampu üyong ngoh yangki.

¹⁶Hangne iman nyeelan phei tokphei ye me ngohpu? Nyee ükhongte nyeeyompawe nyikpu jailak jingne! Eiyang, Reuben nokphong yo me mong teiyampu üyong ngohyangki.

¹⁷Gilead nokphonga Jordan heong yeme shotte ngoh, hüyange Dan nokphonga yenglin shongme hangne yepope ngoh! Asher nokphong yengching nah me I yupu nyoi me yepope shotte ngoh nang.

¹⁸Zebulun kahtalan-e iman üyin me shaoshi ne tam, Naphtali-o shapju ütahpa me hüke muh ling.

¹⁹“Taanakh me, Megiddo yengnah phin me, ahngpalan pei hüyange hok. Kanan ahngpalan-e hok, hüpoi iman-e khüm hango yah yetai:

²⁰Shanhalan-e wang mepu hok; yoi lamnyuke wangme kem-e taiwante, iman-e Sisera phei tüi-e hok.

²¹Kishon yengleampuwe iman phwnge tei, üshongpe ngohpu yengyin, Kishon yengyin. O Ü-yaha wong üyong puphei kemme tailak!

²²“Hüwante iman koiponglan ya-kai mamme phetpu, shephet pupa koipong kempu ngaowüng.

²³“Merozte phoiwüm tüoh she Youngwanpa shongmokpawe inang, tüomepu lante yeonge phoi wümtüoh; hangjingne Youngwanpate jamne iman yepei, wong üyongpu phei tüi-e Youngwanpate jamlak me yepei.

²⁴“Sheko üshei yo me moimannyu-a Kenlan Heber shekonyu Jael; nyenok me ngohpu sheko üshei yo me yha moimanpu nyu.

²⁵Iye yeng yu, hüpoi yhawe Ite düamyeng pha; yhawe yaoyüp lwngshengja me Ite yah peitam.

²⁶Yhawe nyenok lag yak ja me jon, hüyange yha yakjah ye toijonpalan yanmee me. Yhawe Sisera tak, yhawe I shang khüwtam, Yhawe I ngüm ong phuk lüowe lütte tam.

²⁷Yha shongte I khuhta, I lam, I toitam; yha shongme I khuhta, I lam; ümeken me I khuhta tüoken me I ümang me toita.

²⁸“Tawo mepu yhawe leiye tei, hüyange üngwün; Sisera ünyuwe shemeipupa tawo kaiye üngwün. Hangne I tongtoi teshinne shonpu? Hangne I tongtoi üya teshinne neapu?

²⁹Yha konnangpu üyongpa shekowe jan-e yhate inang; eihyang, yha nying nyingke yhate jannang;

³⁰‘Iman-e nyieye yahpu toinan teiyam-e hüyange teitampu ja ne yeje a? Netan liliye naoyha hajaja yejema-a ni ni, Siserate-a awfa yantak inyangpu inkhek, ahngyha üngme yahlak jingne-a awfa yantak inyangpu shemeipupa üphalan yampu üje a?’

³¹“Tüokhei hüke nang wepa khongkümpu mahtam tüoh O Youngwanpa! Hüpoi nang shümpalan aope I yoi wong phei yayong tailakei, iman wanghe ke ngohne tamtüoh.” Tüophei me kahmük me wangpeng deli toloimei ngohyangki.