Read Konyak Naga KAHPALAN 6 Bible Online

KAHPALAN 6 - Konyak Naga bible

KAHPALAN 6

¹Israel kahtalan-e Youngwanpa sheshao me hanghe yemei hatüo ling; hüyange Youngwanpawe iman Midialan yak me wangpeng nyit phünne pha.

²Hüyange Midialan wong Israellan tangme sheyong she ngoh; hüyange Midialan ngohpu jingne Israel lan-e nyamteiye iman nying nyingke kahtang me kahsa, hei longsalan me loching ling.

³Hüyange hangkih ting me Israel-e üli dei, Midianlan, Amaleklan, hüyange heongye kahtalan ongpuwe iman chinghah ne tampu ngoh yangki.

⁴Hüyange iman phei tüi-e doyu hüyange Gaza ngoiye hüyange neikonpu kahnyoi lanmepu deiha liha mengetam, hüyange Israel jingne hanghe toi-o yeto tüohpe, hüyange nyee hei mahu yejema-a gado hango yetüohpe yah.

⁵Hangjingne iman yoiye tampu yinmok phei hüyange nyenok yahyange ong, nyaodukh ükhong pahpu kih-e iman ükhong ükhong ong; iman hüyange iman udh ipu yekümpe ngoh yangki. Hüyange kahmük-a menge tamlak jingne iman ong.

⁶Medialan kaiye iman loishe shaoshi, tüokhei Israel kahtalan-e Youngwanpa te jamlak jingne üngwün.

⁷Aope Israel kahtalan-e Midialan jingne Youngwanpa te üngwün;

⁸Youngwanpawe Israellan tangte hipa ja shon; hüyange Iye imante i, “Hüke Israel Kahwang Youngwanpawe inang; Taowe numan Egypt mepu woiye ngai, hüyange rhapa nok mepu woitei;

⁹hüyange taowe numan Egyptlan yak mepu yintam hüyange numante shaoshi tampalan khongkümpu yak mepu yinne tam, hüyange numan sheshao mepu iman jange tei, hüyange iman kahmük numante pha.

¹⁰Hüyange taowe numante i, ‘Tao numan Kahwang Youngwanpa ngohnang, hüyange numan-e Amorlan aoyin kahmük me numan ngoh nang, iman kahwanglan te wangshüm tahhüo.’ Hüpoi numan-e ü-ngao yejai.”

¹¹Sha-a Youngwanpa shongmokpa Ophrah chingte pei, hüyange Abiezer puhu Joash jing longkham pee phang me shot. Hüyange Iha Gideon-e Midialan mepu lowe minnga ngütpu nyoi me wheat tahnoiye ngohyangki.

¹²Hüwante Youngwanpa shongmokpa I tangte ngai hüyange Ite i, “Youngwanpa nang phei ngohnang, wongnangpu naomei!”

¹³Hüpoi Gideon ne Ite i, “Hüma-a, ü-nokpu Youngwanpa toman phei ngohpu ne mengma-a, hüma-a hangne tüolan khongkümpu tomante ngaipu? Hüyange toman payimlan-e, Youngwanpawe teman Egypt mepu woi ngai, she iye I yashanyalipu toi jeng ipu khongkümpuwa ümeken me ngoh nangki? Hüpoi shaapa-a Youngwanpawe toman winne tüoh, hüyange Midialan yak me phünne pha.”

¹⁴Hüwante Youngwanpawe Ite lei, hüyange ngaophawe i, “Nang wong üyong phei tüomepu taitüoh, hüyange Midialan yak mepu Israel yintüoh. Taowe nang shonne tamnang.”

¹⁵Gideon-e jan-e i, “Hüpoi O Youngwanpa, taowe hangke Israel yin oklak? Leihuyah, Manasseh nokphong me toman puhu-a wong sheshoipupa, hüyange toman noksalan yo me tao sheshoipupa ngohnang.”

¹⁶Youngwanpawe Ite jan-e i, “Hüpoi Tao nang phei ngohlak, hüyange nange Midialan-a kahta ja hei ngohpu kih-e hei oklak.”

¹⁷Hüwante Gideon-e Ite i, “Sha-a taowe nang sheshao me shüpshe tüowe ngohpu ne mengma-a, hüma-a ü-phei ngaopu hatüowa nang üja she ine üte füo ja hüopha.

¹⁸Taowe nangte yoppe tongnang, hüke taowe nangte hahying dopu yah peiye, hatüo nang sheshao me mantüoh mantüoh, tüomepu tahtai.” Hüyange Iye i, “Nang nishe leih manye manye Tao tanne ngohlak.”

¹⁹Tüokhei Gideon nokte ye hüyange younpong üha ja hüyange hahyingne an ühüng kilogram pen yahpuwe do hango yenyütpe tüm; mei-a Iye küm ja me hin, hüyange Iye hoiyeng tük ja me hin, hüyange longkhampee phang te hatüo yah ong, hüyange dopu pha.

²⁰Kahwang shongmokpawe Ite ngaophawe i, “Mei hüyange do yenyütpu an yahtüoh, hüyange tüopa longnyu tangme angtüoh, hüyange hoiyeng tüopa tangme shoktüoh.” Hüyange hüke Iye ling.

²¹Hüwante Youngwanpa shongmokpawe I yak me ngohpu wongjoi üjeng jawe mei hüyange do yenyütpu an te let; hüyange longnyu mepu vün ngai, hüyange mei hei do yenyütpu an hahküm; hüyange Youngwanpa shongmokpa I mük mepu ye-ngepe yanne mah.

²²Tüophei me nakshih Gideon-e I-a Youngwanpa shongmokpa she shing; hüyange Gideon-e nyampu phei i, “Onyukei, O Youngwanpa Kahwang! Sha-a taowe Youngwanpa shongmokpa sheta hei sheta teihüowe ngeteki!”

²³Hüpoi Youngwanpawe Ite i, “Nang toloimei ngohtüoh, tahnyam, nang yelilak.”

²⁴Hüwante Gideon-e tüoken me wümjong ja Youngwanpate ling, hüyange tüopate Jehuvah shalom (Youngwanpa chingmei) she nyik. Tenyih ngoiye tüopa-a Abiezer puhujing Ophrah ching me ngohnang.

²⁵Tüoya Youngwanpawe Gideonte i, “Nangpa jing mahu üpong yahtüoh, hüke ni shepupa mahu üpong wangpeng nyit ngoipupa yahtüoh, hüyange nangpa jing Baal wümjong mengtam tüoh, hüyange tüopa phinme ngohpu Asherah-a lange wintüoh.

²⁶Hüyange tüopa yomtep tangme Youngwanpa nang Kahwangte jünge wümjong ja lingtüoh, hüyange nishepupa mahu üponga yahtüoh, hüyange nange Asherah mette lange winpu pee phei hatüo jakke dopu ja phatüoh.”

²⁷Hüwante Gideon-e I shaoshanpalan kahta pen yah, hüyange Youngwanpawe Ite ngaowe tampuke ling; hüpoi Iye hatüo nyihning linglaka Inok noksalan hüyange chingnyume ngohpulante nyampu jingne, Iye hatüowa yaning me ling.

²⁸Aope chingnyu me ngohpalan napning shonge lüoyapeih, leihuyah, Baal wümjong meng yange ngoh, hüyange tüopa shongme ngohpu Asherah mette lange winyange ngoh yangki, hüyange nishepupa mahu üpongo wümjong lingyange ngohpu nyoi me doyange ngoh yangki.

²⁹Hüyange iman-e shejawe shejate teitonge i, “Tüolan toi-a aowe lingpu?” Hüyange aope iman-e teitonge yam-e leiyapeih, tüopa toishao-a “Joash üha Gideon-e lingyangpune ngoh.”

³⁰Hüwante chingshao kahtalan-e Joashte i, “Nangha toman-e toi tamlakei tüome yah yüokei! Hangjingne Iye Baal wümjong mengetam, hüyange Iye tüopa shongme ngohpu Asherah mette lange winpu yang.”

³¹Hüyangpoi Joashwe I phei tüi-e yongpalan üsheite i, “Numan-e Baal jingne tokteilak a? Yejema-a I jingne yongnang kü a? Aowe I jingne yonglakei wangngai shao me I toilak. I Kahwang ja ne mengma-a, Iye I nying nyingke tokteiye phuh hah ne tamtüoh; hangjingne I wümjong kahta jawe mengetam yangki.”

³²Tüokhei tüopa nyih me Gideonte Jerubbaal she nyik, tüote leppu, “I kaiye Baal-e yoi nying nyingke yinne tamtüoh, hangjingne I wümjong Iye menge tamyangki.”

³³Hüwante Midialan khongküm Amaleklan; hüyange heongye mepu kahtalan khongkümpu jamshe jem, hüyange Jordan kaiyange Jezreel kahjee me lakjing ling.

³⁴Hüwante Youngwanpa yahawe Gideon tangme woi; hüyange Iye nyawong ja wünge tam, hüyange Abiezer puhulan I pheite tailak jingne jamshe jem.

³⁵Hüyange Iye Manasseh üshei yekaote ngaolan kipalan shon; hüyange iman-o I pheite woilak jamshe jem. Hüyange Iye ngaolan kipalan Asher, Zebulun hüyange Naphtali te shon; hüyange iman-o Ite jamlak jingne pei.

³⁶Hüwante Gideon-e Kahwangte i, “Nange ngaopuke, nange Israel ü-yak me yinlak ne mengma-a,

³⁷leihuyah, taowe tahnoi jingme nyee-min mat angetüoh phaning; mat mehi nyai yütte ngohma-a, hüyange kahtok khongkümpu eawah ngohma-a, hüwante nange ipuke, nange Israel ü-yak-e yintamlak she taowe shinglak.”

³⁸Hüyange hatüo hüke ngoh yangki. Hangjingne I ünenap shonge lüo, hüyange mat moiyahpuwe phütwante mat mepu yeng yengjon shengja phütte yah.

³⁹Hüwante Gideon-e Kahwangte i, “Ü-phei tüi-e nang mongshih tahngai pha, hüyange taowe hüke tüopa ünhei ngaolakei; taowe nangte yoppe tongnang. Nyee-min hatüowe ja me hei üte saki phakei; tenyihpa-a nyeemin-a eawah-e angtamtüoh, hüyange kahtok khongkümpu me nyai ngohne tamtüoh.”

⁴⁰Hüyange tüoyape Kahwange hüke ling; hangjingne nyee-min pa-a eawah ngoh, hüyange kahtok khongküm pume nyai teamteiye ngoh yangki.