Read Konyak Naga KAHPALAN 7 Bible Online

KAHPALAN 7 - Konyak Naga bible

KAHPALAN 7

¹Nyih ja Jerubbaal hatüowa Gideon, hüyange I phei ngohpu kahta khongküm, shonge yayong, hüyange Harod yeng ngaijing ü-o me lakjing ling; hüyange Midialan lakjinga iman yekao apyekao, Moreh kahtang shong me kahjee me ngoh yangki.

²Youngwanpawe Gideonte i, “Taowe imante Midialan phalak jingne nang phei ngohpu kahtalan-a jam loi nangki, tüone yejema-a Israel-e iman nying nyingke otawe, ‘Ü-yak-e taowe yin she ilak.’

³Tüokhei sha-a kahtalan nasa te hatüo wenne tamtüoh, ‘Aowe nyam-e hüyange ninne teihnang, I yoi nokte leih yetüoh, hüyange Gilead kahtang tüotüoh.’ ” Hüyange Gideon-e imante tokke lei; haja da me ni leihye mah, hüyange haja pen towe ngoh.

⁴Hüyange Youngwanpawe Gideonte i, “Kahtalan-a üne-o jamloi nangki; iman yengte woi laitüoh, hüyange Taowe nang jingne iman tokke leilak; hüyange aohipa jeng Taowe nangte, ‘Tüopa kahta nang phei tailak she ilakei,’ nang phei tailak; hüyange Taowe ao jeng, ‘Tüopa kahta nang phei yetailak she ilakei,’ iman-a yeteilak.”

⁵Tüokhei Iye iman yengte woilai; hüyange Youngwanpawe Gideonte i, “Kahta lili aoyinne kuihawe yaipuke, yee phei yeng yinglakei, nange I-a yoi yoine angtüoh; hüke muh aoyinne yeng yinglak jingne yatuh shingyange yak phei yinglakei, hüke yoi yoi ne angtüoh.”

⁶Hüwante yaiye yingpalan-a kahta gho lüm ngoh yangki; hüpoi towe ngohpu kahta khongküm puwe yeng yinglak jingne yatuh shüng.

⁷Hüyange Youngwanpawe Gideonte i, “Yaiye yingpalan gho lüm phei Taowe numan yinlak, hüyange Midialan nang yak me phünne phalak. Topu kahta lili yoi ngohjing te leih yetüoh she itüoh.”

⁸Tüokhei Iye kahtalan iman mepu yengtük hei nyawong yah, hüyange Iye Israel kahtalan khongkümpuwa yoi yoi nyenok yam-e shon-e ye, hüpoi gho lümpa-a tanne ngoh; hüyange Midian lakjing iman yashongye kahjee me ngoh yangki.

⁹Tüoya muh Youngwanpawe Gideonte i, “Yayongtüoh, hüyange lakjingte shümlak jingne nang yutüoh; hangjingne Taowe hatüo nang yak me phateki.

¹⁰Hüpoi nange laiyange shümlakte nyam teihma-a, nang shaoshanpa Purah phei lakjingte laitüoh.

¹¹Hüyange iman-e hanghe ngaolakei nange jailak; hüyange tüophei me lakjing te lailak jingne nang yak wongnang ne tamphalak.” Hüwante Iye yoi shaoshanpa Purah phei ngou yang pheipulan lakjing ütahpa nyoite yu.

¹²Hüyange nyaodukh üngang ongpuke, kahjee me Midialan, Amaleklan, hüyange heongye mepu kahtalan khongkümpu tükshüng yange ngoh yangki; hüyange yengching mepu pheih kih-e ükhong ükhong iman udh ipu yekümpe ngoh yangki.

¹³Aope Gideon peingoi, leihuyah, kahta jawe I shümpa te mangja iye ngohpu Iye jai. Hüyange hüke i, “Leihuyah, taowe mangja mang, hüyange jaitüoh, barley an ja teman Midian lakjingte toiloi ta hüyange nyenokte shung, hüyange tüopawe shunge tamyange, hatüo toitaiye tam, hüyange leihkheih lüp hüyange kahtokte toita.”

¹⁴Hüyange I shümpawe jan-e i, “Hatüowa Israel kahta ja Joash üha Gideon yanglow tokte kaiye-a ülao hango yeje ja; I yak me Kahwange Midian hüyange ükhong khongkümpu phünne phateki!”

¹⁵Aope Gideon-e mang ipu hüyange tüopa lüppe ipu jai Iye yatuh shüng hüyange Kahwangte yop. Tüophei me I Israel lakjing te leih ye, hüyange i, “Yayongtüoh, hangjingne Youngwanpawe Midian ükhong numan yak me phünne phateki!”

¹⁶Hüyange Iye kahtalan gho lüm-a ükhong lümne tam, hüyange iman khongkümpu yak me nyawong hüyange yengtük ükeng, yengtük ümongma-a vün pahyange Iye jonne tam.

¹⁷Hüyange Iye imante i, “Üte leiyah, hüyange hüke lingtüoh, hüyange leihu, aope tao lakjing ütokpa te peilakeih, taowe hangke linglakei, hüke numane-o lingtüoh.

¹⁸Aope tao hüyange ü-phei ngohpu khongkümpuwe nyawong wünglakei, hüwante lakjing üshei yekao me numan-e nyawong wüngtüoh, hüyange itüoh, ‘Youngwanpa jingne hüyange Gideon jingne!’ ”

¹⁹Tüokhei Gideon hüyange I pheipu kahta gho ja-a awka shao manngoipe, iman yompalan-e yomtep tüohpu phei jam she, lakjing ütokpa te pei; hüyange iman-e nyawong wüng hüyange iman yak me yengtük lan-a paikhoih tam.

²⁰Hüyange ükhong lüm-e nyawong wüng hüyange yengtüklan pai, hüyange ayenga iman yaknya yeme hüyange iman yakjah ye me nyawong wüngne jon; hüyange iman-e üngwün, “Youngwanpa hüyange Gideon jingne yanglow!”

²¹Hüyange iman kahta lili iman ngohpu lakjing nyoi mepu yong; hüyange ükhong khongküm phet; hüyange iman-e üngwün hüyange iman yan-e tam.

²²Aope Gideon jing kahtalan-e nyawong gho lüm wüng; Youngwanpawe wepalan ükhonga kahta liliye yoi eihate, hüyange ükhong khongküm phei tüi-e teimet lakne yanglow ngaitam; hüyange ükhonga Zererah yekaote Bethshittah ngoiye, Tabbath ü-o me Abelmeholah yikeng ngoiye phette tai.

²³Hüyange Israellan-a Naphtali mepu, hüyange Asher mepu, hüyange Manasseh khongkümpu mepu nyik-e jem, hüyange Midialante jange tai.

²⁴Hüyange Gideon-e Ephraim kahtang nyoi üshei yete ngaolan shonne i, “Midialan phei hok lak jingne jemtüoh. Tüolan kaiye Midialan taine yetamlak nanjingne Jordan yengyin me hüyange Bethbarah yengyin ngoiye dodotüoh.” Tüokhei Ephraim kahtalan khongkümpu jamshe nyik-e jem hüyange iman-e Bethbarah ngoiye hüyange Jordan ngoiye tienne yah.

²⁵Hüyange iman-e Midian ahngpalan ni ngoiye Oreb hüyange Zeeb ni pho; hüyange iman-e Oreb-a Oreb longnyu me toi; hüyange Zeeb minnga ngütpu nyoi me toi; hüyange Midialante jange tai; hüyange iman-e Oreb hüyange Zeeb ni üshang Jordan kaiye Gideon tangte yah pei.