Read Konyak Naga KAHPALAN 8 Bible Online

KAHPALAN 8 - Konyak Naga bible

KAHPALAN 8

¹Hüyange Ephraim kahtalan-e Gideonte i, “Midialan phei hokne taiwante tomante yenyikpu hatüowa nange hanghe lingpu?” Hüwante iman-e I phei tüopa jeng me ngaomeng me ngao.

²Hüpoi Iye i, “Numan-e lingyangpu phei phinne taowe hanghe lingyangki hatüowa hangne-o yeje. Numan Ephraim kahtalan-e hanghe üjingha lingnang, hatüowa toman puhulan khongkümpuwe lingpu phei shenyeipu.

³Kahwange numan yak me Midian ahngpalan Oreb hei Zeeb phünne pha; numan-e lingyangpu phei phinne oklak ne taowe hanghe linge okpu?” Aope Iye hatüo ngaoyapeih, I phei tüi-e iman mongshih ngaipu lak-e mah.

⁴Tüophei me Gideon hüyange I kahtalan gho lüm ngoipu Jordan yengyin ngoi hüyange tüopa kai. Iman shaaji towenyai, hüpoi yelakpe wepalan pheite jange woi.

⁵Aope iman Succoth ngoi, Iye Succoth lante i, “Taowe numante yoppe tongnang, ü-pheite woipalante hahying phakei hangjingne iman towenyaiye ngohnang; hüyange tao Midian ahngpa Zebah hei Zalmunna pheite jange tai nangki.”

⁶Hüpoi Succoth üshang lan-e i, “Toman-e nang pheipu wetaipalan te hahying phalakne Zebah hei Zalmunna sha-a nang yak me ngohya?”

⁷Hüwante Gideon-e i, “Meiteki, hüma-a aope Youngwanpawe Zebah hei Zalmunna ü-yak me phakülakei, taowe phaohuh hüyange tanyinhuh phei nang leihkheih tamlak!”

⁸Hüyange tüopa mepu I Penuelte ong, hüyange imante hüke muh ngao; hüyange Succoth lan-e janpuke Penuel lan ne-o jan.

⁹Tüokhei Iye Penuel lante i, “Aope leih yelakei, taowe numan jing daonok menge khüwwinlak.”

¹⁰Sha-a Zebah hüyange Zalmunna iman wetaipalan phei Karkor me ngoh yangki, iman heong yekao me ngohpu ükhong khongkümpu mepu towe ngohpu haja pen me nga nanjing hei towe ngohyangki; hangjingne yanglow jonpu wetaipalan lakhja haja da ngoiye mahteiye ngoh.

¹¹Hüyange Nobah hüyange Jogbehah heong yekao lakjing me ngohpu lamyekao te Gideon ong, hüyange wetaipalan ükhongte mokhshe shüm, hangjingne wetaipalan ükhonga yetümpe ngoh.

¹²Hüwante Midialan ahngpa ni Zebah hüyange Zalmunna phette tai; hüyange Iye imante jange woi, hüyange Iye Midian ahngpa ni-a pho, Zebah hei Zalmunna; hüyange wetaipalan khongküm ütuh me jange yan.

¹³Aope Joash üha Gideon shapju mepu Hereste ongpu yekao me leihye;

¹⁴Iye Succothlan naoshe ja pho, hüyange Ite tonge yam. Gideon jingne tüopa naoshewe Succoth woipalan hüyange lwngmeilan kahta denyit me nyit min nyan-e pha.

¹⁵Hüyange Gideon Succothlan tangte pei hüyange i, “Zebah hüyange Zalmunna te leitüoh, aoyin jeng numan-e tao yeine tam-e i, ‘Nang kahtalan towenyaiye ngohpa lante toman-e hahying phalak ne Zebah hei Zalmunna nang yak me peitekü a?’ ”

¹⁶Hüyange chingnyu lwngmeilan pho hüyange Iye phaohuh hüyange tanyinhuh yahpei, hüyange hatüo phei Succoth woipalante shaoshi yatengne tam.

¹⁷Hüyange Iye Penuel daonok mengetam hüyange chingnyu me ngohpu kahtalan toine tam.

¹⁸Hüwante Iye Zebah hei Zalmunna nite i, “Numan-e Tabor me toipu kahtalan üpu?” Hüyange imniye jan, “Nang kih-e iman-o ngoh yangki; iman kahta lili ahnghalan leye ngoh yangki.”

¹⁹Hüyange Iye i, “Iman-a ü-jeiheinaolan, ü-nyuwe puhpu hayim ngohnang; Youngwanpa üyin me ngohtepuwe, numan-e iman üyin yinne angpune mengma-a, taowe numan yetoilak.”

²⁰Hüyange Iye Iha jeiyongpa Jetherte i, “Yayonge sheshao yete wentüoh, hüyange iman toitüoh.” Hüpoi naoshepawe yanglow yeno ok; hangjingne I nyam, hangne ima-a I üne-o naosheha nehei ngoh.

²¹Hüwante Zebah hei Zalmunnawe i, “Nang yayonge wenne tomante hüla! Hüyange toipha; hangjingne kahta hangke ngoh hüke I wongo hüke ngohnang.” Hüyange Gideon yayong hüyange Zebah hei Zalmunna toi, hüyange Iye iman udh üngme ngohpu üngkam yah.

²²Hüwante Israel kahtalan-e Gideonte i, “Toman tangme nang, nanghalan, hüyange nanghu lan ne-o wanglam lampa ne mengtüoh. Hangjingne Midian yak mepu nange toman yinyangki.”

²³Gideon-e imante jan-e i, “Taowe numan tangme wanglam yelamlak, yejema-a ühalan ne-o numan tangme wanglam yelamlak; numan tangme Youngwanpawe wanglam lamlak.”

²⁴Hüyange Gideon-e imante i, “Numan mepu taowe ülamja tonghu nangki; numan kahta liliye nyieye yahpu toinan naju üte yahkei.” (Hangjingne iman me hon najulan ngohyangki, hangjingne iman-a Ishmael lanne ngoh yangki.)

²⁵Hüyange iman-e jan, “Toman-e mongongpu phei tüolan-a phalakei.” Hüyange iman-e inkhek nyamyange kahta liliye yoiye nyieye yahpu toinan-a angtam.

²⁶Hüyange Iye tongpuke jempu hon-e lingpu najulan tok-e leiwante kilogram tok da nanjing ngoh yangki. Tüolan-a Midian ahngpalan-e yahpu toinyu, üngkhüp hüyange wanghüng pheipu oleng ye-ompe, hüyange iman udh üng me yükpu üngkam ye-ompe ngoh yangki.

²⁷Hüyange Gideon-e tüopa phei ngengpa phakshaoh ja ling (yao) hüyange hatüo iman chingnyu Ophrah me ang; hüyange Israel khongkümpuwe tüopa pheite nuweshak-e tai, hüyange tüopahi Gideon hüyange inok noksalan jingne tüntünpu ja ne menge mah.

²⁸Hüke Israellan sheshao me Midian yeine tam hüyange iman-e shaaji ngüm nganne yelei ok. Hüyange Gideon hipak me wangpeng deli kahmük me toloimeipu ngoh yangki.

²⁹Joash üha Jerubbaal (Gideon) yoi nyupuh chingte leihye hüyange inok me ngoh.

³⁰Sha-a Gideon hayimlan denyit ngoiye ngoh yangki; hangjingne Ime sheko maawe ngohyangki.

³¹Hüyange Shekhem me ngohpu I phongphenyuwe-o Ite netan ja puhtam, hüyange Iye I min Abimelech she nyik.

³²Hüyange Joash üha Gideon lwngmei ne mengteiye li, hüyange Ipa Joash mangjong me Abiezerlan Ophrah me mu.

³³Gideon lipu phei jamshe Israel lan-e Kahwang mepu nishe leihye mah hüyange Baal pheite nuweshak-e jon, hüyange Baal-berith iman kahwangne meng.

³⁴Hüyange Israel lan-e Youngwanpa iman Kahwang, aowe iman wepa khongkümpu mepu üshei ye mepu yintam, I yeteih tüo.

³⁵Hüyange iman-e Jerubbaal, hatüowa Gideon Iye Israelte meipu wangman-e lingya peyoi iman noksate yayengpu yehüo.