Read Konyak Naga KAHPALAN 9 Bible Online

KAHPALAN 9 - Konyak Naga bible

KAHPALAN 9

¹Sha-a Jerubbaal (Gideon) üha Abimelech Inyu nokte Shekhemte tai hüyange iman hüyange inyu nokphonglan khongkümpu te i,

²Shekhem nyupuh khongkümpu te hüke itüoh, “Numan jingne hanghepa shemeilak: Jerubbaal hayim denyit khongkümpuwe numan tangme wanglam lamlak heiya, yejema-a sheja hei numan tangme wanglam lamlak? Üne-o taowa numan waan hüyange numan iy mei she teih tüoyah.”

³Hüyange Inyunok kahtalan-e tüolan ngao khongkümpu I jingne Shekhemlan moilan na me jaiye ngao; hüyange iman mongjang te Abimelech pheite woihuwe ngai, hangjingne iman-e i, “I-o teman jeiheinao ngohnang.”

⁴Hüyange iman-e Ite khüm ükhüw denyit Baal-berith nok mepu pha, hüyange tüophei Iye yahlak yenangpu hüyange angsa kahtalan I pheite woilak jingne nanmee pha.

⁵Hüyange Iye Ophrah me yoipa nokte tai, hüyange I jeihei naolan, Jerubbaal hayim, kahta denyit longja tangme toi; hüpoi Jotham, Jerubbaal üha naolipa-a yin. Hangjingne I nying nyingke I lowe ngoh.

⁶Hüyange Shekhem kahtalan khongkümpu jem, hüyange Bethmillo me longkhampee ü-o me Abimelech ahngne mengtam.

⁷Aope hatüo Jothamte i, I tai hüyange Gerizim kahtang ütangpa me yong hüyange yeonge üngwün-e hüyange imante i, “Kahwange numante jailak jingne, Shekhem kahtalan üte jaiyah!

⁸Hipak ja me iman jingne ahngne menglak lelak jingne peelan khongkümpu jem-e ta. Iman-e olive pee te i, ‘Toman ahngpa ne mengkei.’

⁹Hüpoi olive pee-e jan-e i, ‘Numan tangme ütahpa ne menglak jingne, ü-mepu taowe ngaine tampu minnga, hanghepawe Kahwang hüyange kahtalante yihnoonlak jingne jonnang tüopa mah ne tamlak a?’

¹⁰Hüwante peelan-e phukpee te i, ‘Nang peikei hüyange toman tangme nanga ahngpa ne mengkei.’

¹¹Hüpoi phukpee-e imante jan-e i, ‘Taowe üme ngaipu üwüng tüohyange hüyange pelick ümei tüohyange, peelan tangme ahngne menge ngohne tailak a?’

¹²Tüokhei peelan-e wuwüng wute i, ‘Nang peikei, hüyange toman tangme nanga ahngne mengkei.’

¹³Hüpoi wuwüng wuwe imante i, ‘Tao ü-wuwüngti hangheye Kahwang hüyange kahta mongmei ne tamnang, hatüo tüohyange peelan tangme ahngne menge ngohne tailak a?’

¹⁴Hüwante peelan khongkümpuwe huh phümtümp te i, ‘Nang peikei, hüyange toman tangme ahngne mengkei.’

¹⁵Hüyange huh phümtümp-e peelante jan-e i, ‘Ütingpa me numan-e tao numan tangme ahngpa ne lenangpu ne mengma-a, hüma-a peikei hüyange ü-wangshüm phangme numan-e loching yah tüoh. Hüke yeloyahma-a ü-üquilan huhja mepu vün ngailak hüyange Lebanon cedar peelan hahshulak.’

¹⁶“Hüma-a sha-a numan-e Abimelech ahngpane menge tampuwa bumei hüyange ütingpa ne mengma-a, hüyange numan-e Jerubbaal hüyange I noksalante meiye jonyangki shepune mengma-a, hüyange I toi phei shange ling yangpu ne mengma-a;

¹⁷hangjingne numan jingne üpawe hokyangki, hüyange I üyin phawe toiling; hüyange Midialan yak mepu numan yinnetam.

¹⁸Hüyange tenyih numan-e üpa nok phei tüi-e yongnang, hüyange Ihalan longja tangme kahta denyit toitam, hüyange I phongphenyu ha Abimelech pahi Shekhem nyupuh lan tangme ahngne menge tam, hangjingne I-a numan pheipu ne ngohpu jingne!

¹⁹Tenyih hüma-a, numan-e bumei me hüyange ütingha me Jerubbaal hüyange I noksalante hüke lingpu ne mengma-a, hüma-a Abimelech te mongmeiye ngohyah, hüyange Iye-o numante mongmei sheiye ngohtüoh;

²⁰hüpoi tüone yejepe ngohma-a, Abimelech mepu vün ngaine tamtüoh, hüyange Shekhem nyupuh hüyange Bethmillo nokphong hah shutüoh; hüyange Shekhem nyupuh hüyange Bethmillo nokphong mepu vün ngaitam tüoh hüyange Abimelech hahshu tüoh.”

²¹Tüophei me Abimelech shaote I nyampu jingne Jotham phette tai hüyange Beer te taiye tüome ngoh yangki.

²²Abimelech Israel tangme wangpeng lüm wanglam lam.

²³Hüyange Kahwange Abimelech hei Shekhem nyupuh nipa me ünu yaha ja shon; hüyange Shekhem lan-e Abimelech phei teikhahpu phei toi ling;

²⁴hüke Jerubbaal hayim denyit te yak yupu shahmaolak hüyange iman iy iman jeiheinao Abimelechte shahlak, aowe iman toi hüyange Shekhemlan aoyinne I jeiheinaolan toilak jingne I wongnangne tam, tüopa jingne ngaine tam.

²⁵Hüyange Shekhem lan-e I phei tüi-e kahtang shedaopupa me doyu ne tam, hüyange tüoyekaote kempu khongkümpu iman-e nyieyeyah; hüyange hüke ngaipu jeng Abimelech te i.

²⁶Aope Ebed üha Gaal I pheipulan phei Shekhemte peingoi, hüyange Shekhem kahtalan-e Ite monghüm.

²⁷Hüyange iman khongküm imanjing wuwüngkah te ta, hüyange iman wuwüngkah mepu wuwünglick shaijem hüyange tüolan ngüt, hüyange mongmei mo ling, hüyange iman hüyange imanjing kahwang khümjing te ong, hüyange hahying yange Abimelechte phoiwüm.

²⁸Hüyange Ebed üha Gaal-e i, “Abimelech ao shi, hüyange teman-e I shaoshanlak ne teman Shekhemlan ao ngoh nangshi? Eihyang, I-a Gideon üha! Hüyange Zebul mepu Iye o-ngao yah, hüpoi hangne teman-e I shaoshanlak shi? Numan jing pajeiyong Hamor aowe numan puhu üshang ne meng Ite yihnoon tüoh!

²⁹Tüolan kahtalan ü-yak me ngohshih phang! Hüwantepa-a taowe Abimelech yahteilak, taowe Abimelech te ilak, nang wetaipalan ükhong yonge tamtüoh hüyange pongne ngaikei she ihah peih!”

³⁰Aope chingnyu wanglam lampa Zebul-e Ebed üha Gaal ngao jai, I mongshih ngaine tam.

³¹Hüyange Iye Arumah me Abimelech tangte ngaolan kipalan shon-e i, “Leihuyah, Ebed üha Gaal hüyange I pheipulan Shekhemte peiye ngohnang, hüyange leihu, iman-e nang phei tüi-e chingnyu leihkheih ne tamnangki.

³²Tüokhei sha-a nang hüyange nang phei ngohpu kahtalan wangnyakme tatüoh, hüyange kahme lowe tan-e ngohtüoh.

³³Hüyange wanghe ongpu phei jam she shonge mamshe yayongtüoh, hüyange chingnyute lin-e ongtüoh; hüyange leihu, aope I hüyange I phei ngohpu kahtalan nang phei tüi-e ngailakei, nange imante nangte shupupake yak yutüoh.”

³⁴Tüokhei Abimelech hüyange I phei ngohpu kahta khongküm wangnyak me yayong, hüyange Shekhem phei tüi-e ükhong peli ne tamyange tan-e ngoh.

³⁵Aope Ebed üha Gaal ngai hüyange chingnyute ongpu ye peten me yong; hüyange Abimelech hüyange I phei ngohpu kahtalan lowe tan-e ngohpu mepu yayonge ngai.

³⁶Hüyange aope Gaal-e kahtalan-a nge, Iye Zebulte i, “Leihuyah kahtang ütangye mepu kahtalan yuküki!” Hüyange Zebul-e Ite i, “Tüolan-a kahta ne yeje ja.” “Nange kahtanglan yashüm kahtalan kih-e hei ngepu üja.”

³⁷Gaal-e nishe ngao hüyange i, “Leihuyah, kahmük hotan mepu kahtalan peiküki, hüyange ükhong ja-a shaotan itpu longkhampee yekao mepu ongküki!”

³⁸Hüwante Zebul-e Ite i, “Teman-e shaoshanlak ne Abimelech-a ao shi she nange ipuwa shaapa-a nang ju ümeken me ngohnangki? Nange phoiwüm-e tampu kahtalan-a tüolan-e yeje a? Sha-a yayonge ngaitüoh, hüyange iman phei hoktüoh.”

³⁹Hüwante Shekhemlan tangme üshangne mengyange Gaal-e Abimelech phei hoklak jingne ngai.

⁴⁰Hüwante Gaal phette tai, hüyange Abimelech-e Ite jange tai, hüyange chingnyu peten shongte ngoiye kahtalan maawe mayah.

⁴¹Hüyange Abimelech Arumah me nyoi; hüyange Zebul-e Gaal hüyange I pheipulan Shekhem me-a yengoh oklakne jange tei.

⁴²Üne nyih Shekhem kahtalan kahte talak jingne taishopu Abimelechwe shinge pei.

⁴³Tüokhei Iye yoi kahtalan woi hüyange ükhong lüm ne tam, hüyange kahme lowe tan-e tam; hüyange Iye lei hüyange leihuyah, kahtalan chingnyu mepu ngaipu nge, hüyange Iye iman phei tüi-e yayong hüyange iman toi.

⁴⁴Abimelech hüyange Iphei ngohpu ükhonga sheshao yete phet hüyange chingnyu peten me yongyange ngohwante, ükhong ni lüowe ngai hüyange kah me ngohpu khongküm toi.

⁴⁵Hüyange tüopa nyih nyihlao hipak Abimelech-e chingnyu phei hok; hüyange Iye chingnyuwa yah; hüyange tüome ngohpu kahtalan toiküm; hüyange Iye chingnyuwa jaosheye mahtam hüyange hüm shaiye tüoh.

⁴⁶Aope Shekhem daonok me ngohpa lan-e tüopa jai, iman Elberith khümjing wong shenangpupa üshate yinlak jingne ong.

⁴⁷Hüyange Abimelech te Shekhem daonok me ngohpu kahta khongkümpu jem-e ngohnangki she shingne tam.

⁴⁸Hüyange Abimelech-e Zalmon Kahtangte Iphei ngohpu kahtalan khongküm, yahyange ong; hüyange Abimelechwe I yak me wa jon, hüyange pee mepu peequi ja ünne tai, hüyange hatüo nowe yah hüyange I phaktang me pai. Hüyange Iphei ngohpu kahtalante Iye i, “Numan-e taowe hanghe linge ngenang, mamtüoh, hüyange taowe lingpuke lingtüoh.”

⁴⁹Hüyange khongkümpuwe hüke kahta liliye peequi japong ün, hüyange Abimelech pheite woi, hüyange tüolan-a yomtep shemongpupa taten me shüng; hüyange tüopa tangme iman-e yomtep daonok te vün pahtam, tüokhei üne-o Shekhem daonok yomtep me ngohpu kahta khongküm, sheko netan hajaja nanjing tüome li.

⁵⁰Tüophei me Abimelech Thebezte peingoi, hüyange Thebez phei tüi-e neikon yange hatüo yah.

⁵¹Hüpoi chingnyu ümong me wongnangpu daonok ja ngoh yangki, hüyange chingnyu me ngohpu kahtalan khongküm tüonyoi te phet, sheko netan khongküm, hüyange iman nying nyingke taküp lat, hüyange daonok noktokte onge mah.

⁵²Hüwante Abimelech daonok shongte, hüyange tüopa phei tüi-e hoklak jingne, hüyange hatüo me vün pah tamlak jingne ngange daonok tafün shongte wen.

⁵³Hüpoi sheko jawe Abimelech shangtang me shümshulong ütokpa ja shüppe tai hüyange I shangwaan pai.

⁵⁴Hüwante Iye I ngou yang jonpa naoshete mamshe nyik, hüyange i, “Nang yang teaktüoh hüyange tao toitam tüoh, hangjingne ‘sheko jawe tao toiye tam’ she ine taowe yetamhu.” Hüyange I naoshepawe Ite phuklüowe lütte tam, hüyange I li.

⁵⁵Aope Israellan-e Abimelech liteki she ngeye ok, iman kahta lili yoi yoi nyoite yan.

⁵⁶Hüke Iye yoipa hayim yoi jeiheinao denyit toiyange Ipate lingpu toimenglan jingne Kahwange Abimelechte phuh hahtam.

⁵⁷Hüyange üne-o Shekhemlan toi ümeng khongküm iman shangtangme Kahwange yeine tam; hüyange iman tangme Jerubbaal (Gideon) üha Jotham-e phoiwümpu pei.