Read Konyak Naga 3 JOHN 1 Bible Online

3 JOHN 1 - Konyak Naga bible

3 JOHN 1

¹Lwngmei mepu Gaius tangte, ao te taowe ngaoting me kennang.

²Ümongkenpa, hüke üshei me nang jaalunne hüyange meiye ngohlak jingne taowe yopnang; taowe shingnang nang yaha me meiye tainang.

³Hangjingne aope jeiheinaolan ütam peingoi hüyange nang jeng ütingpa, hüke nang hangke ngaoting me kem, tüopa jeng saki phawante tao yeonge mongong.

⁴Ühalanne ngaoting me kempu jaipu phei tao ülao mongmei sheyongpu hango yenang.

⁵Ümongkenpa, nange jeiheinaolan, ünyei ne yinpa jeiheinaolante hanghe toi lingnang tüopa-a monghümlakpa toishao lingnang.

⁶Iman-e mengpalan sheshao me nange kenpu jeng saki phayangki. Hüke nange iman Kahwang sheshaome wangngoine tamme lamme lünge teine tamküme meilak.

⁷Hangjingne iman-e yinhulan mepu hango yeyahpe I min jingne taimah.

⁸Tüokhei teman-e ngaotingpa phei phinne lingpa ne menglak nanjingne, tüo kihpulan te teman-e mongmei sheiye jamlak wongpong.

⁹Taowe mengpalante üjingha nyan, hüpoi iman yo me üjengpa ne menghupu, Diotrepheswe üte üjai.

¹⁰Tüokhei tao peima-a, Iye lingpu toishao üshei numante teihne tamlak; Iye ngao ümenglanne toman phei tüi-e nguwe ngaonang; hüyange tüopawe mong yehahpe, Iye jeiheinaolan yoi nying nyingke yeyah, hüyange üne-o aoyinne yahhunang, Iye imante büangnang, hüyange mengpu ükhong mepu yanne tamnang.

¹¹Ümongkenpa, nange ümengpa konte yeleipe hanghe ümei ngoh, tüopa konte leiyah. Aowe ümei lingnang I Kahwang mepu; aowe ümeng lingnang Iye Kahwang mannge.

¹²Demetrius jeng kahta üsheiye hüyange ngaotinge yoi nying nyingke saki phanang; hüyange taowe-o Ite monghahnang, hüyange toman saki ütingpa she nange shing.

¹³Taowe nang tangte nyanlak maawe ngohnang; hüpoi laike hei laiti phei nyanlak taowe yemong.

¹⁴Nang mamshe hüolak, hüyange teman-e sheta teihüowe ngaolak she taowe monghüm nang.

¹⁵Nangme chingmei ngohtüoh. Shümpalanne nangte salam phanang. Nange shümpalan min nyik-e salam phatüoh.