Read Konyak Naga JUDA 1 Bible Online

JUDA 1 - Konyak Naga bible

JUDA 1

¹Juda, Jesu Khrista shaoshanpa, hüyange Jeams ünao mepu Ipa Kahwang me teikenpalan, hüyange Jesu Khrista jingne angpu, nyikpulan tangte:

²Numan tangte yayengshüpshe hüyange chingmei hüyange kenpu maawe ngohtüoh.

³Mongkenpalan, taowe numan tangte teman jamshe yinyepu jeng yeonge nyanhuwe ngohwante, hanghepa ütinglakpu lanshe üjaolante phayange ngoh, tüopa ütinglakpu jingne numan-e yeonge nganglak taowe numan tangte henge nyanlak ne pei.

⁴Hangjingne kahta ütam aoyinne üshongwante muh tüopa ümeng tüolak ne üwangne nyanne ngoh; hüyange aoyinne teman Kahwang shüpshe nuweshak ne mengetamme, hüyange teman Ahngpa hüyange Youngwanpa ja shing, hüke Jesu Khrista yejanpe yejaopu kahtalan ngohnang, iman teman yo me lowe ongteki.

⁵Sha-a, numan-e lanshe khongküm shingyapoi, Youngwanpawe Egypt kahtok mepu jamshepulan yinyange phei me aoyinne yemeng iman mah ne tamshe taowe numante teihne tamhu nangki.

⁶Hüyange hanghepa wangdang shongmokpalanne yoi ahngching me yengohpe yoi shaoshipu nyoi me tüoh, Iye iman ngao phünpu nyih üyongpa jingne wangnyak me üküm yenangpu shappu me ang.

⁷Hüke Sodom hei Gomorrah hüyange neikonne ngohpu chingnyulan, aowe iman kih-e yoi nying nyingke phwngngampu te pha hüyange yejepu mei toishao me yu, tüolanne üküm yenangpu vün shaoshipu ngeye leppu hüonang.

⁸Tüokih-e tüolan-o mangmange hüke muh yoi mei yejaone tamnang, hüyange wanglam lampu ye-i-yeshe, hüyange ütahpate phoinang.

⁹Hüpoi wangdang shongmokpa üyongpa Mikhael, kahshih phei Mosa mang jingne hokke mopngai wante Iye I phei tüi-e ngaophünpu üyong phalak mong yeyong, hüpoi i, “Youngwanpawe nangte teetüoh.”

¹⁰Hüpoi tüolan kahtawe hangheyin imane-o yeshing, tüolan phei tüi-e iman-e phoinang, hüyange juteih yenangpu yinmoklanke, shemin lamphe iman-e wanglam kaiye hanghe shing, tüolan me iman mah ne tamnang.

¹¹Iman jingne onyukei! Hangjingne iman-e Kain lamnyu me kem, hüyange ümee jingne Balam ümeng me wangmanne phette tai, hüyange Korah kih-e hokke ngaipu me iman mah.

¹²Aope iman-e numan phei mo hahnang, numan-e kenpu mo me tüolan-a mak ü-oun ne mengnang; iman yenyampe yoi nying nyingke jemnang; iman-a yeng ye-ompe wangyange puwe teipu wangphom; ülick yelickpu jüopee, nishe lipu, yalah me tekke yahpu pee;

¹³yengching yengmokh wongnangpu kih-e, hüpoi yoi wüolakpa ütahte ngaiye hüopu kih-e; üwüoh yetüopu shanha, hanghe jingne wangmanne nyakpu jinte üküm yenangpu yowe angnang, iman-a tüolan ngohnang.

¹⁴Hatüowa Enokh ne ngoh, Adam mepu nyit shepupawe itpu ngaowe i, “Leihuyah, Youngwanpa yoi üjaolan haja pen phei peilak;

¹⁵Üshei tangte ngaophünlak, hüyange yejaopu üshei yoi yejaoyeshapu toishao hanghepa iman-e yejaope ling, hüyange I phei tüi-e hanghepa ngao üwanphei yejaopu ünu lanne ngao, tüopa jingne ümeng phalak.”

¹⁶Iman-a nguwe-ngaopalan, mong yehahpe ngao ngaopalan, yoi ünyei yahhupute jangpu hüyange iman ju kaiye otapu ngao üyong ngaonang, hüyange ümee tüolak jingne iman-a kahta sheta leinang.

¹⁷Hüpoi mongkenpalan, numan teman Youngwanpa Jesu Khrista lampulanne numante hanghe ngao üshongwante ngao tüopa teihtüoyah,

¹⁸iman-e numante iyangki, “Üküm nyih me phoiwümpalan yoi yejaoyeshapu nuweshakpu me kemme ngohlak.”

¹⁹Iman-a tamshongpu ngaine tampalan, Yaha me yejepe kahtoknyu wanglamme woipalan ngohnang.

²⁰Hüpoi numan, mongkenpalan numan ütinglakpu üjaopa me yoi nying nyingke; Yaha Üjao me yoppe;

²¹teman Youngwanpa Jesu Khrista yayeng shüpshe tanne Kahwang kenpu me yoi nying nyingke üküm yenangpu üyin wang ngoiye tüohyah.

²²Hüyange mong nüngneiye ngohpu ütam okne tamtüoh;

²³hüyange ütam, vün mepu shuiye yintamtüoh, yayeng shüpshe-o hüotüoh, nyampu phei ülao lanphei-o jamyah, hüyange mei kaiye yejaoyeshapu nyemote nuyah.

²⁴Sha-a aowe numan yashah hüone yetampe angtam ne ok, hüyange numan üko yenangpe mongongpu üyong phei I müktishiwa sheshao me angtam ne ok,

²⁵tüopa teman Yinyepa Kahwang ja shingha jingne, teman Youngwanpa Jesu Khrista kaiye, hipak üshei shaotan me, hüyange sha-a hüyange jinte üküm yenangpe, müktishiwa, ünganwong, wanglam lampu hüyange wong ngohne tamshih. Amen.