Read Konyak Naga ÜTAHTENGAIPU 1 Bible Online

ÜTAHTENGAIPU 1 - Konyak Naga bible

ÜTAHTENGAIPU 1

¹Mamshe hangheyin ngailak ne ngoh, tüopa Jesu Khristawe yoi shaoshanpalan te hüolak jingne, Kahwange Ite phapu ütahte ngaipu hatüo; hüyange hatüowa Iye yoi wangdang shongmokpa shonne, yoi shaoshanpa John te shingne tam.

²Iye Kahwang ngao hüyange Jesu Khrista saki jeng, hüyange Iye hanghe nge tüolan khongkümpu jeng saki pha.

³Aowe tüopa hi-ngao ilakei, hüyange aoyinne tüopa hi-ngao jailakei, hüyange tüome nyanne ngohpulan jonlakei, iman moimanlak; hangjingne hipak ü-o me ngohnang.

⁴John ne Asia me ngohpu bumeinok nyit tangte: Shüpshe hüyange chingmei ao sha-a ngohnang, hüyange ngoh, hüyange peilak ne ngoh, I mepu hüyange I ahngpa shotjing tang me ngohpu Yahalan nyit mepu,

⁵hüyange monghümpu saki. Lipulan yo me üwangne yange yepupa hüyange kahtoknyu ahngpalan tangme wanglam lampu Jesu Khrista mepu numan tangte ngohtüoh. Aowe temante kennang hüyange yoi iy kaiye teman ünu mepu teman lan,

⁶hüyange Iye teman ahngching ja ne menglak jingne, yoipa Kahwang jingne ngengpalanne mengne tam, I te müktishiwa hüyange wanglamlampu jinte üküm yenangpe ngohtüoh. Amen.

⁷Leihuyah, I wangphom me yunang, hüyange mük üsheiye hüyange aoyinne Ite lüt iman-e I ngelak; hüyange kahtoknyu jat üsheiye I jingne mang shaplak. Tüokhei hüke ngohlak. Amen.

⁸“Tao Alpha hüyange Omega,” üwang hüyange üküm she ao sha-a ngohnang, hüyange ngoh, hüyange peilakne ngoh, hüyange üshei okpupa Youngwanpa Kahwange inang.

⁹Tao John, numan jeiheinao, hüyange Jesu shangepongpu, hüyange I Ahngching, hüyange nün-okpu me numan phei teitampa, Kahwang ngao hüyange Jesu saki jingne tao Patmos dikhot me ngohyangki.

¹⁰Tao Youngwanpa nyih me Yaha me ngoh, hüyange ü-tokphei ye me nyawong wüngke ngaowüng üyong ja taowe jai,

¹¹hüyange hüke i, “Nange hanghe nge tüopa laitep ja me tüolan bumeinoklan nyit tangte nyantüoh: Ephesia, Smyrna, Pergamum, Thyatira, Sardis, Philadelphia hüyange Laodikia.”

¹²Hüwante ü-phei ngaopu ngaowüng te leine tao lüp, hüyange lüpwante, taowe hon vüntük yongjing nyit nge,

¹³hüyange vüntük yongjinglan yome Kahta Üha ja kih-e, ya ngoiye nye-inyange, hüyange I jakuh neiye hon pheipu inkhek inyange taowe nge;

¹⁴hüyange I shang hei I shangmin shaopuwa, mat üheng hüyange yi hengpuke henge ngoh; hüyange I mük vünyi ke ngoh,

¹⁵hüyange I ya vünsha me sheakke angpu shakphanyan üshemke hüyange I ngaowüng yünpu yengmokh ngaowüngke ngoh;

¹⁶I yakjah yeme shanha nyit jon, hüyange I ju mepu pahpu ünah ni yanglow ja ngai, hüyange I sheta yoi wonge ngaipu wanghe ke ngoh.

¹⁷Aope taowe I nge, tao lipuke I sheshao me toita. Hüpoi Iye yoi yakjah üte shingyange i, “Tahnyam, Tao üwang hüyange üküm,

¹⁸hüyange üyin ngohpupa; Tao li, hüyange leitüoh, Tao jin jintepu jingne üyin ngohnang, hüyange lipupa hei lipu yimching yüp mee (eppe küplak) Üme ngoh nang.

¹⁹Sha-a nange hanghe nge, hüyange hanghe ngoh, hüyange tüophei me hanghe peilak ne ngoh nyantüoh.

²⁰Hüke lowe ngohpu ngao hanghepa shanha nyit ü yakjah ye me nge, hüyange hon vüntük yongjing nyit nange nge, tüolan shanha nyit-a bumeinok nyit shongshonpa ngohnang; hüyange hon vüntük yongjing nyit-a bumeinok nyit ngohnang.