Read Konyak Naga ÜTAHTENGAIPU 10 Bible Online

ÜTAHTENGAIPU 10 - Konyak Naga bible

ÜTAHTENGAIPU 10

¹Hüyange wangphom-e o yange wongnangpu wangdang shongmokpa ja wangdang mepu yuwe taowe nge; hüyange I shangtangme nyümlonge konyange ngoh; I sheta wangheke, hüyange I ya vün shongnyu ke ngoh.

²Hüyange I yak me laitee üjoiha ja epyange ngoh, hüyange Iye yoi yajahye yengching tangme, hüyange ya-nyongye kahtok tangme lok;

³hüyange yengkong mailange waopuke Iye ngaowüng üyong phei üngwün; hüyange aope Iye üngwün, wangkhongpu nyitte ngao ngai.

⁴Hüyange aope tüolan wangkhongpu nyitte ngao ngai, taowe nyanlak jingne tümme ngoh; hüpoi taowe wangdang mepu ngaowüng jawe ngaowe jai, “Wangkhongpu nyitte hanghe i, tüopa-a füosange tüppe angtüoh, hüyange tüolan-a tah nyan!”

⁵Hüyange yengching me hüyange kahtok me yongpu wangdang shongmokpa ao taowe nge, Iye yoi yakjah ye wangdang yete noyange,

⁶wangdang hüyange tüome hanghe yin ngoh, kahtoknyu hüyange tüome hangheyin ngoh, yengching hüyange tüome hangheyin ngoh, tüolan üshei lingengaipa ao jinte üküm yenangpe üyin ngohnang, Iye shaaji shonne yengohlak she jiengjeppu;

⁷hüpoi wangdang shongmokpa nyitshepupawe hanghe hipak me nyawong wünglak tümlakei, tüopa ngaowüng hipak me Kahwang lowe angpu ngao, I shaoshanpa hipalante phapu ngaolan ke, üküm ngoitamlak.

⁸Hüwante wangdang mepu hanghepa ngaowüng taowe jai, tüopawe nishe ü-phei ngaopu taowe jai; hüyange Iye I, “Wentüoh, yengching hüyange kahtok me yongyange ngohpu wangdang shongmokpawe hanghepa laitee epyange ngohnang, nange tüopa yahtüoh.”

⁹Hüyange tao wangdang shongmokpa shongte wenne, laitee üha-a üte yahkhu she Ite i; hüyange Iye üte i, “Yayah, hüyange tüopa hahtüoh; tüopawe nang seanyu ükhah ne menge tamlak, hüpoi ju me zahtai jelo ke wünge ngohlak.”

¹⁰Hüyange taowe wangdang shongmokpa yak mepu laitee üha yahpuwe hah; hüyange tüopa-a ü ju me zahtai jelo ke wünge ngoh, hüpoi tüopa hah-lünge taiwante, ü seanyu me ükhah ne meng.

¹¹Hüyange üte hüke i, “Nange nishe kahtalan hei jat hüyange li hei ahngpalan maapu jeng hi-ngao iye ngaolak yang.”