Read Konyak Naga ÜTAHTENGAIPU 11 Bible Online

ÜTAHTENGAIPU 11 - Konyak Naga bible

ÜTAHTENGAIPU 11

¹Hüyange shengshaoh lepu shemlieng ja üte pha, hüyange üte i, “Yongtüoh, hüyange nange Kahwang khümjing, hüyange wümjong shemtüoh, hüyange tüome khümpalan iye leitüoh;

²hüyangpoi khümjing nokshaoye shümphangpa-a tüotüoh; tüopa-a tahshem, hangjingne tüopa-a Kahwangte yemengpalante phayangki hüyange iman-e lekeng deli me ni üjao chingnyuwa yawe loklak.

³Hüyange taowe ü-sakipa ni te ünganwong phalak; hüyange iman-e monnye inyange, nyih haja ja ghoni phei me dewok hi-ngao iye ngohlak.”

⁴Tüopa saki ni-a olive pee ni hüyange vüntük yongjing ni kahtoknyu Youngwanpa sheshao me yonge ngohnang.

⁵Hüyange ütam-e shaoshine tamhuma-a, imni ju mepu vün ngaiye imante phoiwümpalan hahkümlak; hüyange ütam-e imni shaoshine tamhuma-a, I hüke muh toilak yang.

⁶Imniye Kahwang ngao itpu nyih mongme wai yekeitamlak jingne, wang küppe tamlak iman me ünganwong ngohnang; hüyange hangshin me imniye yeng-a iy ne menge tamhulakei hüyange shaoshine tampu üsheiye kahtoknyute shüthulakei, teshinne linglak imni me ünganwong ngohnang.

⁷Hüyange aope imniye yoi saki phapu sholakei, hüwante tüopa ükong yenangpu kahsa mepu hanghe yinmok ngailak, Iye imniphei hokke, imni okyange imni toilak;

⁸hüyange hanghe me iman Youngwanpa-o tangpem me dak, yaha yeme Sodom yejema-a Egypt she nyikpu chingnyu üyong, tüopa chingnyu chingyang me imni lipu mang shinyange ngohlak.

⁹Hüyange kahtalan hei jatli hüyange ngao hei lilan üsheiye nyihlüm phei me tangkhüw ngoiye iman lipu mangte leilak, hüyange imni lipu mang mangkoksa me angne yetamlak;

¹⁰hüyange kahtoknyu me ngohpalanne imni lipu jingne mongonge hüyange mongmeilak, hüyange hünghao teileihlak; hangjingne tüopa hipa niye kahtoknyu me ngohpalan shaoshine tam.

¹¹Hüyangpoi nyihlüm phei me tangkhüw linphei me, imnite Kahwang mepu üyin lüo pei; hüyange imni yoi ya phei yong; hüyange aoyinne imnite leiye ngoh, iman yeonge nyamme mah.

¹²Hüwante hipaniye ngaowüng üyong ja wangdang mepu imnite ngaowe jai, “Tüome ongkei!” Hüyange imni wangphom me wangte ong, hüyange imnite khahpalanne imnite leiye ngoh.

¹³Hüyange tüopa ghonda memuh minwe üyong lei, hüyange chingnyu üphong pen yo me ja te toita, hüyange tüopa minweye kahta haja nyit toi; hüyange topu kahtalan nyamme, wangdang Kahwang te müktishiwa pha.

¹⁴Nishepupa onyukei linteki, hüpoi leihu, lümshepupa onyukei mamshe peiküki.

¹⁵Hüyange wangdang shongmokpa nyitshepupawe yoi nyawong wüng; hüyange wangdang me ngaowüng üyong ngai, hüyange i, “Kahtoknyu ahngching teman Youngwanpa hüyange I Khrista ahngching ne mengnang, hüyange Iye jinte üküm yenangpe wanglam lamlak.”

¹⁶Hüyange Kahwang sheshao me iman yoi ahngpa shotjing me shotpu lwngmeilan da me peliye khuhtawe Kahwangte khüm,

¹⁷ngaowe i: “Toman-e nang min yongnang, sha-a hüyange lintepu hipak me ngohpu üshei okpupa Youngwanpa Kahwang; hangjingne nange yoi ünganwong üyong yahteki, hüyange wanglam lamteki.

¹⁸Hüyange jatlan mongshih ngai, hangjingne nang mongshih ngaipu peiteki, hüyange lipulan ngaophünlak, hüyange nang shaoshanpa hipalante, hüyange üjaolante, hüyange nang minte nyampalan üjoi üyong üshei te khintak phalak; hüyange kahtoknyu mahne tampalan mahtamlak hipak ngoiteki.”

¹⁹Hüwante wangdangme ngohpu Kahwangpa khümjing ep, hüyange yoijing khümjing nyoime yoi jiengjeppu ghonu nge, hüyange moppu, hüyange wangkhongpu, hei minwe leipu, hüyange yilong üngang ngai.