Read Konyak Naga ÜTAHTENGAIPU 12 Bible Online

ÜTAHTENGAIPU 12 - Konyak Naga bible

ÜTAHTENGAIPU 12

¹Wangdang me kahnyingwüngha üyong ja nge; sheko ja, wanghe o yange, hüyange yha yashong me linnyu hüyange yha shang me shanha penme ni pheipu shaoshaoh ja yahyange ngoh.

²Yha püm yekengpe ngoh; hüyange nao wangngai ngelak jingne dakteiye üngwün.

³Hüyange wangdang me kahnyingwüngha ülao ja nge; leihu, üshang nyit hüyange üwong pen nyimyange Dragon ütak üyongja ngoh, hüyange I shang me ahngpa shaoshaoh nyit ngoh.

⁴Hüyange I yoi ünyeiye wangdang shanhalan üphong lüm me üphong ja shui peiye kahtoknyu me yeine tam. Hüyange puh ne ngohpu tüopa shekowe puhpu phei jamshe, yha üha-a hahwinlak jingne tüopa dragonne yha sheshao me yong.

⁵Hüyange tüopa shekowe netan naha ja, aowe yan shengshaohwe jat üshei tangme wanglamlamlak, I puh; tüopa naha-a Kahwang hüyange I ahngpa shotjing tangte nyieyah in;

⁶hüyange tüopa sheko hanghepa wanwüng jeng me, nyih haja ja ghoni phei dewok ngoiye iman-e yha uhyinglak jingne, Kahwange tümme angpu nyoijing ja ngohnang; tüopa wanwüng jeng te phette tai.

⁷Sha-a wangdang me wehok ngai; Mikhael hüyange I wangdang shongmokpalanne-o dragon phei hoklak jingne tai, hüyange tüopa dragon hei yoi shongmokpa lanne-o hok,

⁸hüpoi iman-e ye-ok, hüyange iman nyoi wangdang me shaaji yetüo.

⁹Hüyange tüopa dragon üyongpa yeine tam; hüke kahshih hüyange Satan she nyikpu hanghepa ülangpa puwe kahtoknyu noshepu lo ne tam, I hüyange I phei I shongmokpalan kahtoknyute yeine tam.

¹⁰Hüyange taowe wangdang me ngaowüng üyong ja hüke ngaowe jai, “Sha-a yinyepu, hüyange ünganwong, hüyange teman Kahwang ahngching hüyange I Khrista ngaokeng peiteki; hangjingne teman jeiheinaolan te ümeng phapu aowe wangnyak wangngai teman Kahwang sheshao me iman ümeng pha, I yeine tamteki.

¹¹Hüyange iman-e Nyee Üha iy, hüyange iman yoi saki ngaowe I okyangki; hüyange iman-e lipute ngoiye yoi üyin yetün.

¹²Tüokhei mongmeitüoh, O Wangdang, hüyange tüome nyoipalan! Hüpoi kahtoknyu hüyange yengching jingne onyukei, hangjingne kahshih numan tangte yuteki; hüyange I hipak shohnang she shinge, Iye yeonge mongshih ngainang!”

¹³Hüyange dragonne I kahtoknyu me yeine tampu ngeye, netan nahaja puhpu shekonyuwa Iye jangne ükong wang.

¹⁴Hüpoi tüopa sheko wanwüng nyoite puwe tailak jingne yhate yüngphang awlan üyong üyang ni pha; tüome yha tüopa pu sheta mepu wangpeng lüm phei me lekeng wok yinne ang.

¹⁵Hüyange dragonne tüopa shekonyuwa yenge phwnge yahteiye tamlak jingne, yha tokphei me yoi ju mepu yengyin kih-e yeng ngaine tam.

¹⁶Hüpoi kahtokke shekonyute jamme, yoi ju ka, hüyange dragon ju mepu ngaine tampu yengyin-a kahtok-e lüngetai.

¹⁷Hüwante dragon na shekonyute mongshih üyong ngai, hüyange yha mepu puhpaipalan aoyinne Kahwang ngaokenglan jon hüyange Jesu jingne saki pha, tüolan phei wehoklak jingne yayonge tai.

¹⁸Hüyange dragon yengching pheih tangme yong.