Read Konyak Naga ÜTAHTENGAIPU 13 Bible Online

ÜTAHTENGAIPU 13 - Konyak Naga bible

ÜTAHTENGAIPU 13

¹Hüyange taowe yengching mepu yinmok ja te üwong pen, hüyange üshang nyit nangyange ngaipu nge; hüyange I wong me shaoshaoh pen, hüyange I shang me Kahwangte phoipu minlan ngohyangki.

²Hüyange hanghepa yinmok taowe nge, tüopa-a shengtüpshah leye, I ya-a shapnyu ya ke, hüyange I ju yengkong mailang ju ke; hüyange dragonne yoi ünganwong, yoi ahngpa shotjing, hüyange wong üyong Ite pha.

³I shang yo me ja, liyetawe shetyangpu ke taowe nge, hüyange I lilak mako mepu meipute, kahtoknyu nopuwe yashan hüyange tüopa yinmok pheite woi.

⁴kahtalanne dragon te khüm, hangjingne Iye tüopa yinmok te yoi wong pha; hüyange iman-e yinmok te khümme i, “Tüopa yinmok leye ao ngohnangki, hüyange I phei aowe tüi-e hokpu oklak shi?”

⁵Hüyange yinmok te ngao üyong ngaolak hüyange Kahwang te phoilak ju pha; hüyange lekeng deli phei me ni ngoiye yelakpe linglak Ite wong pha!

⁶Iye yoi ju eppe, Kahwang phei tüi-e phoipu ngao, I min hüyange I nyoijing, hüke wangdang me ngohpu üsheite phoilak jingne ükongwang.

⁷Hüyange üjaolan phei tüi-e hoklak, hüyange iman oklak Ite pha. Hüyange nokphong hei kahta, hüyange jat hei li üshei tangme Ite wong pha;

⁸hüyange kahtoknyu lingshao memuh ngohyangpu, toipu Nyee Üha jing üyin laitep me aoyin minlan nyanne ngohnang tüolan tokte kaiye kahtoknyu kahta üsheiye tüopa yinmokte ümme khümlak.

⁹Kahta ütam me na nyimme ngohma-a, Iye jaiyah!

¹⁰Kahta ütam phowe teilak ne ngohma-a ütingme I phowe teipu yatuhshao te yulak; aoyin yanglow-e toilak ne ngoh ütingme yanglow kaiye toilak. Tüome üjaolan nün-okpu hüyange ütinglakpu jingne nyikpu ngohnang.

¹¹Hüwante Nyee Üha ke üwong ni nyimyange, hüyange dragonke ngaopu ülao yinmok ja kahtok mepu ngaipu taowe nge.

¹²Iye üwangpa yinmok-e jonpu wong üshei I sheshaome jon. Hüyange hanghepa üwangpa yinmok lilakne mako shapu mei, Ite kahtoknyu hüyange tüome ngohpu üsheite Iye khümne tam.

¹³Hüyange Iye kahtalan sheshao me wangdang mepu kahtoknyute vün yune tamme füo üyong hüo;

¹⁴hüyange tüopa üwangpa yinmok sheshao me hanghepa füo linglak jingne Ite phawe ngoh, tüolanne Iye kahtoknyu me ngohpalan lowelam ne tam; hüyange Iye hanghepa yinmok yangko sha hüyange mei, I moung ja linglak kahtoknyu me ngohpalante lowetam;

¹⁵hüyange tüopa yinmok mounge ngao nehoi ngaopu oklak, hüyange hangshinne tüopa yinmok moungte yekhümlakei, iman-a toine tamlak hüyange yinmok moungte üyin lüo phalak jingne Ite ünganwong pha.

¹⁶Hüyange Iye üyong hei üjoi, hakpa hei toihapa, bumei hei rhapa, tüolan üshei yakjah yeme yejema-a shekeng me füosang tüppe tam;

¹⁷tüokaiye tüopa füosang, hüke tüopa yinmok min, yejema-a I min shangtoi ao me yenang, Iye shakne yejema-a yaolak ye-oklak.

¹⁸Tüome konjong ngohnang: Ao me shingeoklak ngohnang, Iye tüopa yinmok shangtoi iyeleitüoh; hangjingne hatüowa kahta min jingne ngohnang; hüyange Itepu lungtet ghowok phei me dewok me wok.