Read Konyak Naga ÜTAHTENGAIPU 14 Bible Online

ÜTAHTENGAIPU 14 - Konyak Naga bible

ÜTAHTENGAIPU 14

¹Hüwante taowe lei, hüyange leihu, Nyee Üha-a Zion kahtang me yongyange ngoh, hüyange Iphei lakh ja phei me deli me peli haja ngoh. Iman shekeng me I min hüyange Ipa min nyanyange ngoh.

²Hüyange taowe wangdang mepu, yeng üngang ngaowüngke, hüyange wangkhongpu ngaowüng üyongke ngaowüng ja jai; hüyange taowe jaipu ngaowünga, kongki ngütpalanne iman kongki ngütpuke ngohyangki.

³Hüyange iman-e ahngpa shotjing sheshao me, hüyange üyin yinmok peli hüyange lwngmeilan sheshao me hem üla ja lok. Hüyange kahtoknyu mepu yinyene tamyangpu lakh ja phei me deli phei me peli haja tokte kaiye, kahta aowe-o tüopa hem shingne ye-ok.

⁴Iman-a sheko phei yenu yeshakpalan; hangjingne iman wangngoipu kahtalan. Nyee Üha ümekenyete tai, iman-e I phei te woiye tainang. Kahwang hüyange Nyee Üha jingne üwangpa ülick ne menglakne tüolan-a kahtanyuha yo mepu yinyene tamyangki;

⁵hüyange iman ju me tahleih hango ye-nge; iman ümeng yenangpe ngohnang.

⁶Hüwante wang üwo me wangdang shongmokpa ja puwe taowe nge. Kahtoknyu me ngohpu jatli, hei nokphong, ngao hei kahta üshei tangte ponge tamlak jingne, jinte üküm yenang pungao ümei I me ngohnang.

⁷Iye ngao üyong puphei inang, “Kahwangte nyamtüoh, hüyange Ite müktishiwa ne tamtüoh, hangjingne I ngao phünpu hipak peiye ngohnang; hüyange wangdang hei kahtoknyu hüyange yengching hei yengpeiwo üshei lingpupate yoppe khümtüoh.”

⁸Hüyange ülao, nishepupa wangdang shongmokpawe woiye i, “Aowe yoi nuweshakpu üngan ngaipu wuwüngti jat üsheite yingne tam, tüopa Babilon üyong lanteki lanteki.”

⁹Hüyange ülao wangdang shongmokpa lümshepupa jawe, iman pheite woiye ngao üyong ngaiye inang. “Kahta ütam-e tüopa yinmok hüyange moungte khümma-a, hüyange yoi shekeng me yejema-a yak me füo yahma-a,

¹⁰Kahwang mongshih ngaipu wan me I mongshih ngaipu wuwüngti hanghepa yenyütpe tümme ngohnang, hatüo Iye-o yinglak; Hüyange üjao wangdang shongmokpalan shaome hüyange Nyee Üha shaome vün hüyange ayeng ünyan ne I shaoshine tamlak.

¹¹Hüyange iman shaoshipu vünkhuh jinte üküm yenangpe ongnang; hüyange aoyinne tüopa yinmok hüyange I moungte khümnang, hüyange I minsangpu yah, wangnyak wangngai iman toloimei yenang.”

¹²Aoyinne Kahwang ngaokenglan hüyange Jesu me ütinglakpu ang, üjaolan ne nün okyangpu jingne tüome nyikpu ngohnang.

¹³Hüyange taowe wangdang mepu ngaowüng jawe iye jai, “Tüopa nyantüoh: sha-a me peiye aoyin Youngwanpa me linang, iman moimanlak,” “Ütingme moimanlak,” Yahawe inang, “Iman yoi shangpu mepu toloimeine tamtüoh; hangjingne iman toishao iman phei woi.”

¹⁴Hüwante taowe lei, wangphom üheng ja nge, hüyange tüopa wangphom tangme kahta üha leye ja shotte taowe nge; I shang me hon shaoshaoh, hüyange I yak me yeonge pahpu yangkuih ja jonyange ngoh.

¹⁵Hüyange khümjing mepu ülao wangdang shongmokpa ja ngaiye, wangphom me shotte ngohpupate ngaowüng üyongpu phei üngwünne i, “Nang yangkuih jontüoh, hüyange wettüoh, hangjingne yahlak hipak ngoiteki: hangjingne kahtoknyu tah yahlak ju ngoiteki.”

¹⁶Hüwante wangphom me shotpupawe kahtoknyute yoi yangkuih jon; hüyange kahtoknyuwa yah.

¹⁷Tüophei me wangdang me ngohpu khümjing mepu üne-o wangdang shongmokpa ja ngai; hüyange I yak me-o yangkuih nahpu ja ngoh.

¹⁸Hüwante vün üngan tangme ngohpu wangdang shongmokpa ülao ja khümjing mepu ngai; hüyange Iye tüopa yangkuih pahpu jonpupate ngao üyong puphei üngwünne i, “Nang yangkuih pahpu jonne kahtoknyu wulick kah mepu wu moijemtüoh; hangjingne tüopa ülick meimeiye yimteki.”

¹⁹Hüyange tüopa wangdang shongmokpawe kahtoknyu wulick shaijem, hüyange Kahwang mongshih ngaipu wulick ngütjing üyong me shüp.

²⁰Hüyange chingnyu ünah yete tüopa ngüt jinga yalokne tam, hüyange ngütjing mepu iy ngaiye, koipong üng ngoiye, yakkong lüm nanjing onge mile ghoni nanjing yinne tai.