Read Konyak Naga ÜTAHTENGAIPU 15 Bible Online

ÜTAHTENGAIPU 15 - Konyak Naga bible

ÜTAHTENGAIPU 15

¹Hüwante taowe wangdang me kahnyingwüngha yashanyalilak üyong ja, hüke lümnyutin nyit pheipu shongmokpa nyit nge; tüolan-a ükümpa lümnyutin; hangjingne Kahwangpa mongshih ngaipu ükümpa ngaihüopuwa iman-e ngoh.

²Tüophei me hanghepa leilak müklei me vün phei nyütyangpu yengching she-ngewan kihpu ja taowe nge. Taowe üne-o aoyinne üyin yinmok tangme okpu nge hüyange tüopa moung hüyange ao tangme I min-a lungtet me hüo tüopa nge. Iman-a yengching she-ngewan phin me Kahwange imante phapu kongki jonyange yong;

³hüyange iman-e Kahwang shaoshanpa Mosa hem lokke, hüyange Nyee Üha hem lokke i: “Yongpu hüyange yashanyalipuwa nang toishao, O Ütahpa Kahwang Youngwanpa! Khakshupu hüyange ütinga nang tailam O jatlan Ahngpa!

⁴Aowe ye-nyamlak hüyange nang min müktishiwa ne yetamlak, O Youngwanpa? Hangjingne nang jashing Üjaopa. Jatlan üshei peilak hüyange nangte yoppe khümlak, hangjingne nange ngaophünpu ütahte ngaiteki.”

⁵Tüophei me tüolan linyang phei me, taowe lei, hüyange wangdang me ngohpu saki nyenok khümjing ep,

⁶hüyange tüopa khümjing mepu lümnyutin nyit pheipu wangdang shongmokpa nyit ngai; iman jaoshe-ihpu hüyange phihlangpu inkhek ünyai o-yange, hüyange iman jakuh me hon yankeileiye neiyange ngoh.

⁷Hüyange tüopa üyin yinmok peli yo mepu jawe tüolan wangdang shongmokpa nyitte jinte üküm yenangpu üyin ngohpu Kahwang mongshih ngaipuwe maawe hon wan nyit pha;

⁸hüyange Kahwang müktishiwa hüyange I ünganwong mepu ngaipu vünkhuh-e khümjinga maa; hüyange tüolan wangdang shongmokpalan nyitte lümnyutin nyit mansho mansho, aowe-o tüopa khümjing sa te ongpu ye-ok.