Read Konyak Naga ÜTAHTENGAIPU 17 Bible Online

ÜTAHTENGAIPU 17 - Konyak Naga bible

ÜTAHTENGAIPU 17

¹Hüwante wan nyit jonpa wangdang shongmokpa nyit yo mepu jawe ü-phei ngaowe i, “Wenkei, yeng üngang yo me shotte ngohpu tüopa phwngngamnyu üyong ngaophünpu taowe nangte hüopha ning;

²kahtoknyu ahnglan-e hanghepa phwngngamnyu phei phwngngampu jon, hüyange yoi phwngngampu wuwüngtiye kahtoknyu me ngohpalan jokne tam.”

³Hüwante Iye tao Yaha me wanwüng jengte woitei, hüyange Kahwangte phoipu minne maawe üshang nyit hüyange üwong pen nyimpu yinmok ütak me shotte ngohpu sheko ja taowe nge.

⁴Hüyange tüopa sheko inkhek ümang hüyange ütak o yange, hüyange hon hei toinyu long hüyange yüknyu yükyange ngoh. Hüyange yha yak me nunushepu hüyange yha phwngngampu yejaoyeshapu toiye maawe hon wanja ngoh;

⁵hüyange yha shekeng me kahnyingwüngha min ja nyanyange ngoh, “Babilon üyong kahtoknyu phwngngampalan hüyange nunushepu toishao ünyu.”

⁶Hüyange tüopa sheko, üjaolan iy ye hüyange Jesute khümpalan iy ye jokpu taowe nge. Hüyange aope taowe yha nge, tao yeonge yashan.

⁷Hüpoi wangdang shongmokpawe üte i, “Nang hangne yashanpu?” Tüopa sheko hüyange yha kiye kempu tüopa üshang nyit hüyange üwong pen nyimpu yinmok kahnyingwüngha taowe nangte iphaning.

⁸Nange hanghe yinmok ngeyangki, ngohyangki, hüpoi sha-a yenang; hüyange tüopa ükong yenangpu kahsa mepu ngailak, hüyange mahne tailak ü-o me ngohnang. Hüyange kahtoknyu manlingwante muh üyin laitep me aoyin min yenyan, tüokihpu kahtoknyu me ngohpalanne, tüopa yinmok hangke ngoh, hüpoi sha-a yenang, hüyange peikülak, aope I ngelakei, iman-e yashanlak.

⁹Tüome konjong pheipu leppu ngohnang; üshang nyit kahtang nyit, tüolan tangme shekowa shotte ngohnang.

¹⁰Hüyange tüolan-a ahngpa nyit ngohnang. Iman nga mahteki, ja sha-a ngohnang; ülaowa üne-o manpei, hüyange aope I peilakeih, I ütenja ngohlak.

¹¹Hüyange hanghe yinmok ngoh, hüyange sha-a yenang, I-a tetshepupa, hüyange tüopa nyit yo me ja; hüyange I mahlak kente tailak.

¹²“Hüyange nange ngepu üwong pen-a ahngpa pen ngohnang; iman-e üne-o ahngching manyah; hüpoi ghonda ja jingne yinmok phei jamme iman-e ahngpa wong yahlak.

¹³Iman mong ja ne mengyange, iman-e yoi kon hüyange wong tüopa yinmokte phanang.

¹⁴Iman-e Nyee Üha phei hoklak, hüyange Nyee Ühawe iman oklak, hangjingne I nokpulan tangme Youngwanpa, ahnglan tangme ahngpa. Hüyange I phei ngohpalan-o, hüke aoyin nyikpu hüyange leye ngaipu hüyange monghümpu ngohnang, iman-e oklak.”

¹⁵Hüyange Iye üte i, “Hanghe Yeng tangme phwngngamnyu shotyange nange nge tüolan-a kahtalan hei bangha, hüyange jat hei lilan ngohnang.

¹⁶Hüyange nange ngepu üwong pen, hüyange yinmok, tüolanne phwngngamnyu te nulak, hüyange yha wüngmakke hüyange tangko ne mengetamlak, hüyange yha mei hahlak, hüyange yha vün me khongkümpu jaklak.

¹⁷Hangjingne Kahwang ngao ütingpa me manngai manngai, yha mongpuke ngohlak; hüyange mongja ne menge iman ahngching yinmokte phalak, Kahwange iman mongjang me angne tam.

¹⁸“Hüyange hanghepa sheko nange nge, yha-a kahtoknyu ahnglan tangme wanglam lamnyu, chingnyu üyongpa ngohnang.”