Read Konyak Naga ÜTAHTENGAIPU 18 Bible Online

ÜTAHTENGAIPU 18 - Konyak Naga bible

ÜTAHTENGAIPU 18

¹Tüolan linyang pheime taowe wong üyong tüoyangpu wangdang shongmokpa ülao ja wangdang mepu yuwe nge; hüyange I müktishiwapuwe kahtoknyu wangngaine meng.

²Hüyange Iye wongnangpu ngaowüng phei nyik-e i, “Babilon chingnyu üyong lanteki, lanteki, Tüopa-a ünu yahalan toiling jingne mengteki hüyange yejaopu yahalan küojing, yejaopu hüyange nunushepu awhalan küojing ne mengteki.

³Hangjingne jat üshei yha phwngngampu mongshih ngaipu yuwe jokteki; hüyange kahtoknyu ahngpalan ne yha phei phwngngampu jon, hüyange kahtoknyu pheeinyu leihpalan yhawe jonpu shengngin wonge maawe hakpane meng.”

⁴Hüwante taowe wangdang mepu ngaowüng ülao ja ngaowe jai, “Ü-kahtalan yha phei yanne peikei, yepei yahma-a yha ünu phei numan-e meitam yahnang, yepei yahma-a yhate shaowenahpu phei numan-e meitam yahnang;

⁵hangjingne yha ünuwe wangdang ngoiye phongteki, hüyange yha ünu Kahwange teihtüoteki.

⁶Yhawe hangke pha, hüke yhate leih-e phatüoh, hüyange yha toi phei shange yha te nite ni paowe phatüoh; hüyange hanghepa wan me yhawe nyütte tüm, tüopa wan me yhate üphong ni nyütyange tüm ne tamtüoh.

⁷Yhawe hanghe yoi nying nyingke otamaohe, hüyange loipoiye jon, teshinne yhate shaoshipu hüyange shappu phatüoh. Hangjingne yhawe yoi mongjang me inang, ‘Tao ahngyha, wamnyu yeje, tao shaplak aope-o ye-ngelak.’

⁸Tüokhei lipu, shappu, nyaowelepu, tüolan khongküm yha tangte nyih ja me peilak; hüyange yha vün me lanshe shu ne tamlak; hangjingne yha ngao phünpa Youngwanpa Kahwang wongnange ngoh nang.”

⁹Hüyange kahtoknyu ahngpalan aoyinne yha phei phwngngam hüyange wangmanne ngoh, aope iman-e yha sheakpu vünkhuh ngelakei, yha jingne shappe mangshaplak;

¹⁰hüyange yha shaoshipute nyampuwe, iman-e üjai me yongyange ilak, “Okei! Okei! Nang chingnyu üyong, nang wongnangpu chingnyu, Babilon! Hangjingne ghonda ja mongme nang ngao phünpu peinang.”

¹¹Hüyange kahtoknyu pheeinyu leihpalanne yha jingne shapnang hüyange mangshap nang, hangjingne shaaji kahta aowe-o iman-e yüo leihpu yenglin moth,

¹²yüolak hon, khüm, toinyu long, yüknyu, shemeipu nyekhai, ümaang, yongve-nyee hei nye ütak, ülam maapuwe lingpu pee toi, meinyu fa lingpu ülam khongkümpu, shemeipupa peeye lingpu ülam lili, shakphanyan, hüyange yan hüyange phutti;

¹³petingkai, wangwi soihüng, jakpu sü, yüngwangti, muli yeng, yu, minnga, moita an, hüyange wheat, mahu hei nyeepong, koiponglan hei tongtoi, hüyange rhapalan, hüyange kahta üyin yeshak.

¹⁴“Nang yahawe yoonge teihpu ülicklan, nang mepu yanteki, hüyange shemei yaomapu hei phihlangpu shenghei ngin nang mepu mahteki, hüyange kahtawe tüolan shaaji aope-o yetüolak!”

¹⁵Tüolan pheeinyu leihpalan toinan khongkümpuwe hanghepa pheeileihpalanne tüopa chingnyu mepuwe hakpa ne meng, iman-e yha shaoshipute nyamteiye üjai me yongyange, shappe hüyange yoonge ilak,

¹⁶“Okei, okei, shemeipu nyekhai, hei ümaang hüyange nyedak, hon hei toinyu long hüyange yüknyuwe oyangpu tüopa chingnyu üyong!

¹⁷Hangjingne ghonda ja mongme teshinpu toinyu nanha mahteki.” Hüyange yenglin nokpulan hüyange yenglin me ja ye jaye me kempalan, hüyange yenglam me toi lingpalan, hüyange hangshinne yengching me toilinge hahying tüonang,

¹⁸iman üsheiye üjai me yongyange, yha hahpu vünkhuh ngeye üngwünne i, “Tüopa chingnyu üyong leye hanghe chingnyu ngohnang shi?”

¹⁹Hüyange iman-e yoi shang me kahmak phuwe shappe hüyange yoonge üngwünne i, “Okei, okei, hangke chingnyu ngin wangmanpuwe yengching me ngohpu yenglin nokpulan hakpa ne meng! Hangjingne ghonda ja mongme yha mahteki!

²⁰O wangdang, yha tangme mongmei tüoh, O üjaolan hei lampulan hüyange hipalan mongmeitüoh, hangjingne Kahwange numan te ngao phünpu yha te ngaophün phateki!”

²¹Hüyange wangdang shongmokpa wongnangpu jawe longshüm kihpu üyongja nowe yah-e, yengching te shüppe tamyange i, “Hüke Babilon chingnyu üyonga mahshupu phei mahne tamlak, hüyange shaaji aope-o ye-ngelak.

²²Hüyange kongki ngütpalan, hem lokpalan, viwo hüyange nyawong wüngpalan ngaowüng nangme shaaji aope-o yejailak; hüyange yak-ai jonpalan toishao nangme aope-o yetüolak; hüyange shamshuwe ngütpu wong nangme aope-o yejailak;

²³hüyange vüntük wangngai ütee nangme aope-o ye-ngelak; hüyange nokyampu hüyange toitaipu ngaowüng nangme aope-o yejailak; hangjingne nangjing pheeinyu leihpalan-a kahtoknyu üyonglan ne ngoh; hüyange nangjing yepahipa toiye jat üshei lowelamne tamyangki.

²⁴Hüyange yha me hipalan hei üjaolan iy, hüyange kahtoknyu me aoyin toi üshei jing iy tüoyangki.”