Read Konyak Naga ÜTAHTENGAIPU 19 Bible Online

ÜTAHTENGAIPU 19 - Konyak Naga bible

ÜTAHTENGAIPU 19

¹Tüolan linyang phei me, wangdang me ngohpu bangha üyong ja ngaowüngke ngaowe taowe jai, “Halleluya! Yinyepu, hüyange müktishiwa, hüyange ünganwonga teman Kahwang jing!

²hangjingne I ngao phünpuwa ngaoting hüyange üjaopa; hangjingne hanghepa phwngngamnyuwe yoi phwngngampu toi kaiye kahtoknyu nu ne tam; Iye yha ngao phün, hüyange phwngngamnyu yakke toipu Kahwang shaoshanpalan iy phuh hahteki.”

³Hüyange nishe iman-e üngwün, “Halleluya! Yha mepu vünkhuh jinte üküm yenangpe ongnang.”

⁴Hüyange lwngmei daphei me peli hüyange üyin yinmok peliye shotjing me shotte ngohpu Kahwangte ümme khümme i, “Amen. Halleluya!”

⁵Hüyange ahngpa shotjing mepu ngaowüng ja ngaiye i, “Kahwang shaoshanpalan, hüyange Ite nyampalan, numan üjoi üyong üsheiye teman Kahwang yihlutüoh.”

⁶Hüwante bangha üyong ja ngaowüngke, hüyange yeng üngang ngaowüngke, hüyange wangkhongpu üyong ngaowüngke ngaowe taowe jai: “Halleluya! Hangjingne üshei okpupa teman Youngwanpa Kahwange ahngnang.

⁷Teman-e mongmei sheiye yeonge mongmei hah, hüyange I müktishiwa ne tamhah; hangjingne Nyee Üha nokyampu ngoiteki, hüyange I nyemnyanyuwe yoi nying nyingke tümteki.

⁸Hüyange o lak jingne meipu nye-ükhai, phihlangpu hüyange jaoshe ihpu nye yhate pha.” Hangjingne tüopa meipu nye-ükhai ümei-a üjaopa toishao ngohnang.

⁹Hüyange wangdang shongmokpawe üte ngaowe i, “Tüopa nyantüoh: Nyee Üha nokyam mo te aoyin nyik, iman moimanpu.” Hüyange Iye üte i, “Tüolan-a Kahwangpa ütingpa ngao.”

¹⁰Hüwante Ite khümlak jingne tao I yashong me ümmeta; hüpoi Iye üte i, “Nange hüke tahling. Tao nang pheipu shümpa shaoshanpa ja hei ngohnang, hüyange Jesu saki jonpu nang jeiheinaolan phei shümpa ngohnang. Kahwangte khümtüoh. Hangjingne Jesu saki-a yaha me hi-ngao ngohnang.”

¹¹Hüwante taowe wangdang epyange nge, hüyange koipong üheng ja nge, hüyange tüopa tangme shotpupa te Monghümpupa hüyange Ngaoting she nyik; hüyange khakshupupa me Iye ngao phünnang, hüyange hoknang.

¹²I mük-a vünyi kih, hüyange I shangme shaoshaoh maawe ngohnang; hüyange I min ja nyanne ngohnang, hüpoi I tokte kaiye aowe-o yeshing.

¹³Hüyange I o me iy shaiyange ngohnang; hüyange I min “Kahwang Ngao” she nyiknang.

¹⁴Hüyange wangdang me ngohpu ngangpalanne shemeipu nyekhai üheng hüyange jaoshe ihpu o-yange, koipong ühenglan me shotyange, Iphei te woi.

¹⁵Hüyange Iye jatlante shetlak jingne, I ju mepu pahpu yanglow ja ngai; hüyange Iye yan shengshaoh phei iman tangme wanglam lamlak; hüyange üshei okpupa Kahwang mongshih ngaipu ümeng wuwüngti ngütpu Iye yinglak.

¹⁶Hüyange I o me, hüyange I yungkeng tangme, “Ahngpalan tangte Ahngpa, hüyange nokpulan tangte Youngwanpa, tüopa min nyanne ngohnang.”

¹⁷Hüwante taowe wangdang shongmokpa ja wanghe me yongyange nge. Hüyange Iye wang me pupu awhalan üsheite ngaowüng üyong phei üngwünne i, “Peikei Kahwang mo üyongte jemkei,

¹⁸numan-e ahngpalan mei, hüyange ghoja woipalan mei, hüyange wongnangpalan mei, hüyange koiponglan hei tüolan me shotpalan mei, hüyange bumei hei rhapalan mei, hüyange üjoi hei üyong kahta üshei mei hahlak.”

¹⁹Hüyange tüopa koipong me shotpu hüyange I jing nyahponglan phei tüi-e hoklak jingne, tüopa yinmok hüyange kahtoknyu ahngpalan hüyange iman jing nyahponglan jempu taowe nge.

²⁰Hüyange yinmok hüyange I phei hanghepa tahleih hipawe I sheshao me füo ling, hüyange tüolan-a Iye tüopa yinmok füo yahyang pheilan hüyange I moungte khümpalan lowelamne tam, iman pho; hüyange vün phei loonge ngohpu vünjhom me, üyin me imni moini hün.

²¹Hüyange towe ngohpalan-a koipong me shotpupa ju mepu ngaipu yanglow-e toi; hüyange awhalan üsheiye iman-e okpu shinne mei hah.