Read Konyak Naga ÜTAHTENGAIPU 2 Bible Online

ÜTAHTENGAIPU 2 - Konyak Naga bible

ÜTAHTENGAIPU 2

¹“Ephesia me ngohpu bumeinok shongmokpa tangte nange tüopa nyantüoh:” Aowe yoi yakjah ye me shanha nyit jonyange, hüyange hon vüntük yongjing nyit yo me kemnang, Iye tüolan ngao inang:

²“Taowe nang toishao hüyange nange ngang lingpu hüyange nange nün-okpu, hüyange nange yemeipu kahtalante nünne ye-okpu, hüyange aoyinne yoite lampulan she nyik, hüpoi iman yeje, hüyange iman-a tahleih palan-e nge.

³Nange ümin jingne nün-okpu, hüyange shangeponge okpu; tüolan khongkümpu taowe shing.

⁴Hüpoi nang üwangne nange üte kenpu tüohyangpu khei, nang phei tüi-e Taowe hatüo ngohnang.

⁵Tüokhei nang ümeken me yei tüopa teihtüoyah, hüyange monglüppe nange üwangne lingpu toishaolan lingtüoh. Hüke yelingma-a, nang mong yelüpma-a, Tao nang tangte peiye nang vüntük yongjing yoi nyoi mepu yahteilak.

⁶Hüpoi nangme tüo ngohnang, nange Nicolailan toishaote nu nang, hanghepa te Taowe-o nu.

⁷Ao me na nyim, bumeinoklante Yahawe hanghe inang jaiyah. Aowe okyapeih Ite Tao Kahwang chingmei nyoi me hanghe ngoh, tüopa üyin pee mepu hahne phalak.”

⁸“Hüyange Smyrna me ngohpu bumeinok shongmokpate tüopa nyantüoh: ‘Ao üwang hüyange üküm, aohe li hüyange yange ye, Iye tüolan ngao inang.

⁹“ ‘Taowe nang shanghahshaoshipu hüyange nang toinanpu shing, hüpoi nang hakpa hüyange aoyinne yoite Jehudilan she inang, hüyange Jehudilanne yeje hüpoi Satan synagogue ngohnang, iman-e phoiwümpu Taowe shing.

¹⁰Nang hanghe shaoshi ngelak ü-o me ngohnang, tüopate tahnyam. Leihuyah, numan toklak jingne kahshih-e numan ütam shapunok me küplak ü-o me ngohnang, hüyange numan nyih pen ngoiye shanghahshaoshipu ngohlak. Nange lipute ngoiye nüntüoh, hüyange taowe nangte üyin shaoshaoh yahphalak.

¹¹Ao me na nyim Iye jaiyah, bumeinoklante Yahawe hanghe inang. Aowe oknang Ite nishepupa lipuwe ma yephalak.’

¹²“Hüyange Pergamum me ngohpu bumeinok shongmokpate tüopa nyantüoh: Ao me pahpu ünah ni yanglow ngohnang Iye tüolan ngao inang:

¹³“Nang ümeken me nyoi Taowe shing, hüke ümeken me satan ahngpa shotjing ngoh; hüyange nange ümin mongjüonge jonne, hüyange hanghe hipak me ü-saki monghümpu Antipas numan yo me satan nyoijing me toi, tüopa hipak me-o ü-ütinglakpu te nange yejanpe yengoh.

¹⁴Hüpoi nang phei tüi-e taowe ngao ütam ngohnang, hangjingne Balam, aowe Israel hayim yashah hüolak ja angtamlak ne, moungte dopu, hahying hahne tamlak, Balak te hüo, Iye nyüopute jaipalan ütam nange tüome ang.

¹⁵Hükih muh nange Nicolalanne nyüopu jaipalan ütam jakih-e ang.

¹⁶Tüokhei monglüptüoh; yelüp yahma-a Tao nang tangte mamshe peilak, hüyange ü-ju yanglow phei iman phei tüi-e hoklak.

¹⁷Ao me na nyim Iye tüopa jaiyah, bumeinoklante Yahawe hanghe inang. Aowe oknang Ite lowe angpu manna Taowe phalak, hüyange Ite long üheng ja phalak, hüyange tüopa long me min üla ja, hanghe min yahpupa tokte kaiye ülao aowe-o yeshing, tüopa nyanne ngohnang.”

¹⁸“Hüyange Thyatira me ngohpu bumeinok shongmokpate tüopa nyantüoh: “Ao mük vünyi ke, hüyange aohipa ya shakphan yan shemke ngoh, tüopa Kahwang ühawe tüolan inang.

¹⁹Nang toishao hüyange nange kenpu hei ütinglakpu hüyange nange lingpu hüyange nün-okpu, hüyange nang üwangpa toishao phei nange ükümpa toishao ünyei ngaipu, tüolan Taowe shing.

²⁰Hüpoi nang phei tüi-e Taowe hatüo ngohnang, Jezebel, hanghepa shekowe yoite hinyu she nyik-e, ü shaoshanpalante phwngngampu jonne, hüyange mounglante toidopu hahying hahlak jingne nyüo, yhate nange nün oknang.

²¹Taowe yhate monglüplak hipak pha, hüpoi yhawe yoi phwngngampu mepu monglüplak yemong.

²²Leihuyah, Taowe yha dakpu shinleng ja me lamne tamlak, hüyange aoyinne yha phei phwngngampu jonlakei, iman-e yha toishao mepu mong yelüpma-a, iman shanghahshaoshi üyong me yu ne tamlak;

²³hüyange lipuwe Taowe yha hayim toitamlak; hüyange Taowe kenmong hüyange mongjang yamnang she bumeinok üsheiye shinglak. Hüyange taowe numan kahta lili te yoi toishao phei phinne phalak.

²⁴Hüpoi Thyatira me towe ngohpu hangshinne tüopa nyüopu yeyah, hüke ütam-e ‘Satanne shelupupa lopu toishaolan’ she nyikpu aoyinne yeshing, numante Taowe inang, numante Taowe ülao hangkiyih hango yepüotamlak;

²⁵tüoyangpoi numan-e hanghe ngoh tüopa me Tao manpei manpei mongjüonge tükke ngohtüoh.

²⁶Aowe oknang, hüyange üküm ngoiye ütoishao ngaojaiye jonnang, jatlilan tangme wanglam lamlak Ite Taowe phalak;

²⁷hüyange tük yaopalanne tük hangke khoihnyaiye mütnang, hüke Iye yan shengshaoh phei iman tangme wanglam lamlak; Taowe nehoi hüke üpa mepu wong tüo;

²⁸hüyange Taowe Ite wangngai phombung shanha phalak.

²⁹Ao me na nyim Iye tüopa jaiyah, bumeinoklante Yahawe hanghe inang!”