Read Konyak Naga ÜTAHTENGAIPU 20 Bible Online

ÜTAHTENGAIPU 20 - Konyak Naga bible

ÜTAHTENGAIPU 20

¹Hüwante wangdang shongmokpa ja, ükong yenangpu kahsa yüpmee hüyange yankeilei üyongja I yak me jonyange wangdang mepu yupu taowe nge.

²Hüyange Iye tüopa dragon, hüke ülangpa pu, hanghepa Kahshih hüyange Satan ne ngohnang, I phowe wangpeng haja ja jingne sha,

³hüyange ükong yenangpu kahsa me hün, hüyange wangpeng haja ja manngoi manngoi, Iye jatlan lowelamne ye-oklak jingne, tüopa-a küp, hüyange tüopa tangme füosange tüp; tüophei me hipak ütenjapu jingne I lanlak.

⁴Hüyange taowe ahngpa shotjinglan nge, hüyange tüolan tangme iman shot, hüyange imante ngao phünlak pha. Hüyange Jesu saki jingne, hüyange Kahwang ngao jingne aoyin shanglang, hüyange aoyinne tüopa yinmok yejema-a I moungte yekhüm, hüyange aoyin shekeng me yejema-a yakme I minsang tüppu yeyah, iman yahalan nge. Hüyange iman yange ye, hüyange wangpeng haja ja ngoiye Khrista phei wanglam lam.

⁵Wangpeng haja ja manngoi manngoi liye ngohpu ülaolan yange yepu ye-ok. Hatüowa yange yepu üwangpa.

⁶Aowe tüopa üwangpa yange yepu me om I moimanpu hüyange üjao. Iman tangme nishepupa lipuwe hang üngan-o yenang; hüpoi iman Kahwang hüyange Khrista ngengpa ne menge, I phei wang haja ja wanglam lamlak.

⁷Hüyange aope wang haja ja ngoilakei, Satan I küpnok mepu lanlak;

⁸hüyange kahtoknyu üshok peli ye me ngohpu jatlan, Gog hüyange Magog, aoyin shangtoi yengching pheih ke, iman lo ne tamme, wehokte jemne tamlak jingne I ngailak.

⁹Hüyange iman-e kahtoknyu khük maawe tai, hüyange üjaolan nyoijing hüyange kenteipu chingnyuwa neikon; hüyange wangdang mepu vün yu; hüyange iman hahküm.

¹⁰Hüyange iman lowetampu kahshih-a, vün hüyange ayeng jhom me, ümeken me tüopa yinmok hüyange tahleih hipa ngohnang, tüoken me hün; hüyange iman wangnyak wangngai jinte üküm yenangpe shaoshipu ngohlak.

¹¹Hüyange ahngpa shotjing üheng üyong ja hüyange tüopa tangme shotpu pa taowe nge; I sheshao mepu kahtoknyu hüyange wangdang yanne tai; hüyange iman jingne nyoijing shaaji yetüo.

¹²Hüyange ahngpa shotjing sheshao me lipalan üyong hüyange üjoi üshei yongyange taowe nge; hüyange laiteplan ep, hüyange ülao laitep hanghepa üyin laitep ngohnang tüopa-o ep. Hüyange tüolan laitep me nyanne ngohpuke, lipalan yoi toishaoke ngaophün.

¹³Hüyange yengchinge yoi me ngohpu lipalan phünpha hüyange lipu hüyange yimchinge yoi me ngohpu lipalan phünne pha; hüyange kahta lili yoi toishaoke ngao phün.

¹⁴Hüyange lipu hüyange yimchinga molovün me hün. Tüopa-a, nishepupa lipu, hüke vünjhom.

¹⁵Hüyange ütam min üyin laitep me nyanne ye nge ma-a, I molovün me hinlak.