Read Konyak Naga ÜTAHTENGAIPU 21 Bible Online

ÜTAHTENGAIPU 21 - Konyak Naga bible

ÜTAHTENGAIPU 21

¹Hüwante taowe wangdang üla hüyange kahtoknyu üla nge; hangjingne üwangpa wangdang hüyange üwangpa kahtoknyu linne taiteki; hüyange yengching shaaji yenang.

²Hüyange yoi netanpa jingne nyemnyanyuwe o o-pu ke tümyange üjaopa chingnyu üla Jerusalem, Kahwang mepu, wangdang mepu yupu taowe nge;

³hüyange tüopa ahngpa shotjing mepu ngao üyong jawe iye taowe jai, “Leihuyah, Kahwang nyenok kahtalan phei ngohnang, hüyange I iman phei ngohlak, hüyange I pheipu lanne menglak, hüyange Kahwang yoi nying nyingke iman phei ngohlak, hüyange iman Kahwang ne menglak.

⁴Hüyange iman mük mepu mükphi üshei Iye phuttamlak; hüyange lipu shaaji yenanglak, mangshaplak yejema-a shappu, yejema-a shaoshitamlak shaaji yenanglak; hangjingne üwangpalan linne taiteki.”

⁵Hüyange ahngpa shotjing me shotpupawe i, “Leihuyah, taowe üshei üla lingnang.” Üne-o Iye i, “Hatüo nyantüoh, hangjingne tüolan-a ütinglak lak hüyange ngaoting ngao ngohnang.”

⁶Hüyange Iye üte i, “Hatüo lingyangki! Tao Alpha hüyange Omega; üwang hüyange üküm. Yenglepate taowe üyin yengpeiwo mepu ja jang jawe phalak.

⁷Aowe oknang Iye tüolan moth leilak; hüyange tao I Kahwang ne menglak, hüyange I üha ne menglak.

⁸Hüpoi aoyin nyampu, ütingyelakpu, nunushepu, kahta toipalan, phwngngampalan, phongyengpalan, moungte khümpalan hüyange tahleih ipalan üshei loonge ngohpu vün hüyange vünjhom molovün me yoi yoi meitam tüolak; tüopa-a nishepupa lipu.”

⁹Hüyange wangdang shongmokpalan nyit yo mepu ja, ao yak me ükümpa shaonahpu nyitte maawe wan nyit ngoh, ngai hüyange üte ngaowe i, “Peikei, taowe nangte nyemnyanyu, hüke Nyee Üha shekonyu hüopha ning.”

¹⁰Hüyange Iye tao yaha me kahtang üyong shedaopu jate woiteiye, Kahwang mepu, wangdang mepu yupu, Kahwang müktishiwa ngohpu, üjao chingnyu Jerusalem üte hüo.

¹¹Kahwang müktishiwa phei, tüopa chingnyuwa toinyulong, jasper, phutti ke ngoh.

¹²Tüopa me yeonge yonge, daopu jan peten penme ni phei ngoh, hüyange peten me wangdang shongmokpa pen me ni ngoh, hüyange tüome Israel hayim nokphong pen me ni min nyanyange ngoh;

¹³Wanghe ongjing yeme peten lüm, heye me peten lüm nyüpjing yeme peten lüm, apye me peten lüm, she ngoh.

¹⁴Hüyange chingnyu jantpe-a nokjing long penme ni tangme, hüyange tüome Nyee Üha lampulan pen me ni min pen me ni nyanne ngoh.

¹⁵Hüyange tüopa chingnyu hüyange tüopa peten lan hüyange tüopa jantpe shemlak jingne ü-phei ngaopu pa yak me hon shengshaoh shemlieng ja ngoh.

¹⁶Hüyange tüopa chingnyuwa ünuk peli, üjük üpeam jake, hüyange Iye shemlienge chingnyuwa shemwante, mile gho pen me nga ngohyangki; üjük üpeam hüyange daopu ja kih-e.

¹⁷Hüyange Iye jantpe-o shem, hüke wangdang shongmokpa jing shempu yakkong gho ja phei me deli me peli ngoh.

¹⁸Hüyange jantpe-a jasper phei ling; hüyange chingnyuwa hon shaha phei, peilei yahake jaowe ngoh.

¹⁹Chingnyu jantpe nokjing longa toinyu long ülam üshei phei shemei yaomawe ling; üwangpa nokjing longa jasper ne ngoh, nishepupa-a sapphire; lümshepupa-a agate (long ühüng), peli shepupa-a emerald,

²⁰ngashepupa-a onyx, wokshepupa-a carnelian, nyitshepupa-a chrysolite, tetshepupa-a beryl, tushepupa-a topaz, pen shepupa-a chrysoprase, pen me ja shepupa-a jacinth, pen me nishepupa-a amethyst.

²¹Hüyange peten penme ni-a yüknyu pen me ni; hüke yüknyu ja ja-a peten ja ja ne ngoh. Hüyange chingnyu lamkenga phihlangpu peilei yaha kih-e hon shaha ngoh.

²²Hüyange chingnyu me taowe yopnok hango ye-nge, hangjingne Üyongpa Kahwang hüyange Nyee Üha-a tüopa me yopnok.

²³Hüyange tüopa chingnyu me wanghe yejema-a linnyu teelak wongpong ne yeje, hangjingne Kahwang müktishiwa-e tüopa-a teene tam, hüyange tüopa me vüntük-a Nyee Üha ngohnang.

²⁴Hüyange jatlan-e tüopa wangngai hotan me kemlak; hüyange kahtoknyu ahngpalan ne iman müktishiwa tüopa hotan me yahpeilak;

²⁵hüyange tüopa peten nyihning aope-o yeküplak, hüyange tüome yaning yenanglak.

²⁶Hüyange jatlan müktishiwa hüyange minyong ngampai tüopa ümongte yah peilak.

²⁷Hüyangpoi ülam ja yejao yeshapu, yejema-a nunushepu jonpu, hüyange üleihpalan ao-o tüote hangkejam ye-ong oklak, hüpoi aoyin min tüopa Nyee Üha üyin laitep me nyan-e ngoh, iman hei onglak.