Read Konyak Naga ÜTAHTENGAIPU 22 Bible Online

ÜTAHTENGAIPU 22 - Konyak Naga bible

ÜTAHTENGAIPU 22

¹Hüwante wangdang shongmokpawe phutti lepu phihlangpu üyin yengyin yeng, Kahwang hüyange Nyee Üha ahngpa shotjing mepu ngaipu;

²chingnyu chingkeng lamnyu hotan kaiye yünpu üte hüotam. Yengyin moini yekao me üyin pee ngoh; tüopa peeye pelick ülam pen me ni licknang, hüyange lekeng lep iye ja me licknang; hüyange peeyaklan-a jatlan dakmeilak jingne ngohnang.

³Tüopa chingnyu me Kahwange phoipu hango omme ye-ngelak, hüpoi, tüopa hotan me Kahwang hüyange Nyee Üha ahngpa shotjing ngohlak; hüyange I shaoshanpalan-e I te khümlak.

⁴hüyange iman-e I sheta ngelak; hüyange I min iman shekeng me ngohlak.

⁵Hüyange shaaji yaning yenanglak, hüyange vüntük wangngai yejema-a wanghe tee iman jingne wongpongne yeje; hangjingne Youngwanpa Kahwange imante wangngai phalak. Hüyange iman jinte üküm yenangpe wanglam lamlak.

⁶Hüyange Iye üte i, “Tüolan ngao üting laklakpa hüyange ngaoting ngohnang. Hüyange Youngwanpa Kahwang aowe hipalante yoi yaha pha, hüyange mamshe hanghe ngaine ngoh, tüopa Iye yoi shaoshanpalante hüolak, yoi wangdang shongmokpa shon.

⁷Hüyange leihu, tao mamshe peinang.” Aowe tüopa laitep me itte angpu ngaolan jaiye jonlakei I moimanpupa.

⁸Hüyange tao Johnne tüolan ngao jai, hüyange nge. Hüyange aope taowe jai hüyange nge, ao wangdang shongmokpawe üte tüolan ngao hüo, Ite khümlak jingne I shaome tao ümmeta.

⁹Hüyangpoi Iye üte i, “Nange hüke hango tahling! Taowa nang eiha shaoshanpa, hüyange nang jeiheinao hipalan, hüyange tüopa laitep me nyanpu jaiye jonpalan jeihei nao. Kahwang te khümtüoh.”

¹⁰Hüyange Iye üte i, “Tüopa laitep itte angpu ngaolan füosange tüppe tahküp; hangjingne hipak owe peiteki.

¹¹Ao ngaoting ipa ne yeje, Iye yelakpe ngaoting ye-ipu lingtüoh; hüyange aowe yejao, I yelakpe yejaopa ne mengtüoh; hüyange aowe ngaoting inang, Iye yelakpe ngaotingpa lingtüoh; hüyange ao üjao me ngohnang, I yelakpe üjaopa ne meng tamtüoh.”

¹²“Leihu, Tao mamshe peinang, kahta lili yoi toishaoke khintak phalak, hatüo ü-phei ngohnang;

¹³Tao Alpha hüyange Omega, üwang hüyange üküm, üwangpa hüyange ükümpa.”

¹⁴Aoyinne üyin pee tangte peiye wong tüolak hüyange peten kaiye chingnyute onglak jingne yoi nyemo shaonang, iman moimanpupa.

¹⁵Kuihalan, hüyange phongyeng palan, hüyange phwngngampalan, hüyange kahta toipalan, hei moungte khümpalan, hüyange tahleihte kenpalan üshei ü-at me ngohnang.

¹⁶“Tao, Jesuwe bumeinoklan jingne numante tüolan ngao saki phei ü-wangdang shongmokpa shonteki. Tao David nokli hüyange I mepu jalunpu, phihlangpu wangngai ju shanha.”

¹⁷Hüyange Yaha hüyange nyemnyanyuwe i, “Peikei,” Hüyange aowe jainang Iye, “Peikei,” she itüoh. Hüyange ao yengle nang I peine tamtüoh; aowe mongnang Iye hünghao ja ne üyin yeng yahyah.

¹⁸Tüopa laitep me itte angpu ngaolan jaipalan kahta lilite taowe ngao phawe inang; ütam-e tüolan ngao me ülam ja paoma-a, tüopa laitep me nyanne ngohpu shaonahpulan tüopa kahtate Kahwange paowe tamlak;

¹⁹hüyange ütam-e tüopa itte angpu laitep ngaolan mepu ütam nehoi winma-a, tüopa laitep me nyanne ngohpu üyin pee hüyange üjao chingnyu mepu Kahwange I meitam winlak.

²⁰Aowe tüolan ngao saki phanang Iye inang, “Ütingme Tao mamshe peinang.” Amen. Youngwanpa Jesu peikei!

²¹Youngwanpa Jesu shüpshe üjaolan üshei phei ngohtüoh. Amen.