Read Konyak Naga ÜTAHTENGAIPU 3 Bible Online

ÜTAHTENGAIPU 3 - Konyak Naga bible

ÜTAHTENGAIPU 3

¹“Hüyange Sardis me ngohpu bumeinok shongmokpate tüopa nyantüoh. ‘Aome Kahwang Yaha nyit hüyange shanha nyit ngoh Iye tüolan ngao inang: “ ‘Nang toishao Taowe shing, hüke nanga min me hei üyin ngohnang, hüpoi nang ümang me ngohnang.

²Lüotüoh, hüyange towe ngohpu hangheyin ümang me ngoh, tüolan mongne tamtüoh hangjingne Ü-Kahwang sheshao me nang toishao wangngoipu Taowe hango ye-nge.

³Tüokhei nange hangke yah hüyange jai tüopa teihtüoyah, hüyange jontüoh, hüyange monglüp tüoh. Tüokhei nang kenting mongtawe yengohma-a, Tao kuhpake peikülak, hüyange Tao aope nang tangte peikülak, tüopa nange yeshing.

⁴Hüpoi aoyinne yoi nyemo yenu, nang Sardia me hükihpu min ütam ja ngohnang. Hüyange iman-e o üheng phei ü-phei kemlak, hangjingne iman wangngoi nang.

⁵Aowe oknang I hüke o üheng me o ne tamlak; hüyange Taowe I min üyin laitep mepu phutte yewinlak, hüyange üpa sheshao me hüyange I shongmokpalan sheshao me I min Taowe janlak.

⁶Ao me na nyim Iye tüopa jaiyah, bumeinoklante Yahawe hanghe inang.’

⁷“Hüyange Philadelphia me ngohpu bumeinok shongmokpate tüopa nyantüoh: ‘Ao üjao hüyange ngaoting, ao yak me David yüpmee ngohnang, aowe eptüoh me aowe-o küpne ye-oklak, hüyange küptüoh me ye ep ok, Iye tüolan ngao inang:

⁸“ ‘Nang toishao Taowe shing. Leihuyah, Taowe nang sheshao me taten ja hanghe aowe-o küpne ye-oklak, tüopa epyange angnang, hüke nang wong üjingha ngohnang, hüyange ü-ngao jaiye jon, hüyange Ü-min te yejanpe yengoh.

⁹Leihuyah, satan synagogue aoyinne yoite Jehudilan she inang, hüpoi iman yeje, hüpoi ngaoleih ngao, leihuyah, Taowe iman pei ne tamlak, hüyange nang yashong me ümme khümne tamlak, hüyange Taowe nangte kenyangki she imante shingne tamlak.

¹⁰Nange ü-nünokpu ngao jaiye jontepuwe, hanghepa tokpu hipak kahtoknyu nopu me peilak ngohnang, tüopa toi mepu Taowe-o nanga yinlak.

¹¹Tao mamshe peikülak; nang shaoshaoh aowe-o yeyahlak jingne, nangme hanghe ngoh tüopa mongjüonge tüktüoh.

¹²Aowe oknang, I Ü-Kahwang khümjing me Taowe shongnyu ja ne menge tamlak; hüyange I tüomepu shaaji yetailak; hüyange Ü-Kahwang min, hüyange Ü-Kahwang chingnyu üla Jerusalem wangdang hei Ü-Kahwang mepu yupu tüopa min hüyange ü yoi min üla Taowe Ite nyanlak.

¹³Ao me na nyim Iye tüopa jaiyah, bumeinoklante Yahawe hanghe inang.’

¹⁴“Hüyange Laodikia me ngohpu bumeinok shongmokpate tüopa nyantüoh: “Tüopa ngaolan Amen, monghümpu hüyange ngaoting saki, Kahwange lingengaipu üwangpa-a ngohnang.

¹⁵“Taowe nang toishao shingnang, hüke nang üwüngo yeje, üsheam-o yeje. Nang üwüng yejema-a üshem ne menglak Taowe mongnang!

¹⁶Hüke nang lümlümlulu me, üsheam-o yeje, üwüngo yeje pe ngohtepuwe, Taowe ü ju mepu nang faiwinlak.

¹⁷Hangjingne tao hakpa she, nange ngaotepuwe, hakkeheteki, hüyange tao hanghe-o yetoi; hüyange nang yatuhshao shangpu hüyange shaoshipu hüyange toiha hüyange mükmüopa hei tangko me ngohnang she yeshing.

¹⁸Tüojingne nang hakpane menglak jingne, vün me jakke jaoyangpu hon, hüyange nang tangko me ngohpu wüopu, ütahte yengailak jingne, nange nang nying nyingke o jingne nyemo üheng; hüyange ngelak jingne, nang mük me pholak muli, tüolan khongkümpu ü-mepu shakyah, Taowe nangte tüopa juteih phanang.

¹⁹Aoyinte Taowe kennang imante Taowe tee nang hüyange shangne tamnang. Tüokhei nange mongonge, monglüptüoh.

²⁰Leihuyah, Tao tafün shongme yong yange taküpte kongnang; ütamme ü-ngaowüng jaiye taküp epma-a, Tao I tangte onglak, hüyange I phei hahyinglak, hüyange Iye ü-phei hahyinglak.

²¹Aowe oknang, I ü-phei ü-Ahngpa shotjing me Taowe shotne tamlak, hüke Taowe yoi nying nyingke hangke; okyange Üpa phei I ahngpa shotjing me shotnang.

²²Ao me na nyim Iye tüopa jaiyah, bumeinoklante Yahawe hanghe inang.”