Read Konyak Naga ÜTAHTENGAIPU 4 Bible Online

ÜTAHTENGAIPU 4 - Konyak Naga bible

ÜTAHTENGAIPU 4

¹Tüolan lingyang phei me taowe leiwante nge, wangdang me taküp ja ep, hüyange ü-phei ngaopu ngaowünga, nyawong wüngke, hanghepa taowe üwangne jai, tüopa ngaowüng jawemuh i, “Tüome peikei, hüyange tüophei me hanghe peilakne ngoh tüopa Taowe nangte hüopha ning.”

²Hüwante muh tao Yaha me ngoh, hüyange leihuyah, wangdang me ahngpa shotjing ja ange ngoh; hüyange tüopa ahngpa shotjing me kahta ja shotte ngoh.

³Hüyange tüome shotte ngohpupa-a müklei me jasper hüyange carnelian (long) kih-e ngoh; hüyange ahngpa shotjing neikonne müklei me emerald leye nyümlong ngoh.

⁴Ahngpa shotjing neikonne ahngpa shotjing da me peli ngoh, hüyange tüolan ahngpa shotjing me o üheng-o yange, hüyange shang me hon shaoshaoh shaohyange lwngmeilan da me peli shotte ngoh.

⁵Hüyange ahngpa shotjing mepu wangphihlangpu hüyange ngaowüng hüyange wangkhongpu ngai. Hüyange ahngpa shotjing tangme ayeng nyit pahyange loonge ngoh; tüolan-a Kahwang Yaha nyitne ngoh;

⁶hüyange tüopa ahngpa shotjing tang me she-nge kih-e müktishiwapu yengching ja leye ngoh. Hüyange ahngpa shotjing neikonne, ahngpa shotjing moini yekao me üyin yinmok peli shetaye hüyange tokphei ye me ümük nyimyange ngoh.

⁷Üwangpa yinmok-a yengkong mailang leye, nishepupa yinmok-a mahu üpong üha leye; hüyange lümshepupa yinmok-a kahta sheta nyimyange; hüyange peli shepupa yinmok-a pu-nangpu yüngphang awlan leye ngoh.

⁸Hüyange üyin yinmok peli-a üyang wokpong nyimyange, hüyange ümongye hüyange ütahye me mükjang maawe ngohnang; hüyange iman-e wangnyak wangngai yelakpe hüke hem lok, “Üjaopa, Üjaopa, Üjaopa, Youngwanpa Kahwang üyongpa, ao ngoh, hüyange sha-a ngohnang, hüyange peilak ne ngohnang!”

⁹Hüyange aope tüolan üyin yinmok-e jinte üküm yenangpe üyin ngohpu tüopa ahngpa shotjing me shotpu mepu müktishiwa hüyange ngampaipu hüyange minyong phalak,

¹⁰tüolan lwngmei da me peliye, ahngpa shotjing me shotpupate ümme khümme, jinte üküm yenangpe üyin ngohpupate khüm, hüyange ahngpa shotjing sheshao me iman shaoshaoh khokke yah, hüyange lokke i:

¹¹“Toman Youngwanpa Kahwang, nangmuh müktishiwa hüyange ngampaipupa, hüyange ünganwong tüolak wangpu; Hangjingne nange khongkümpu lingengai; hüyange nange mongpu kaiye tüolan üshei phaoyangki, hüyange lingengai.”