Read Konyak Naga ÜTAHTENGAIPU 5 Bible Online

ÜTAHTENGAIPU 5 - Konyak Naga bible

ÜTAHTENGAIPU 5

¹Hüyange tüopa ahngpa shotjing me shotte ngohpu yakjah yeme, ümong hei ütah me nyanyange, füosang nyitte tüpyange laitee ja taowe nge;

²hüyange taowe wangdang shongmokpa wongnangpu jawe ngao üyong ngaiye, üngwünne nge, “Tüopa laitee eplak, hüyange füosang tüppulan lanlak wange ao ngohnangki?”

³Hüyange wangdang me, yejema-a kahtoknyu me yejema-a kahtok ümongme, tüopa laitee eppu oklak, yejema-a tüopate leiye okpu ao-o, yenangpe ngoh;

⁴hüyange tüopa laitee eppe okpu yejema-a tüopate leiye oklakne wangpu ao-o ye-nge phawe, tao yeonge shap.

⁵Hüwante, tüolan lwngmeilan yo me shejawe üte i, “Tahshap, leihuyah, ao Judah nokli yengkong mailang hüyange David yalah, Iye tüopa laitee hüyange tüopa füosang nyit tüppu eplak jingne okyangki.”

⁶Hüyange tüopa ahngpa shotjing hotan me hüyange üyin yinmok peli hotan me hüyange lwngmeilan yo me, toilakpake Nyee Üha ja üwong nyit hüyange mük nyit nangyange yongyange ngohpu nge; tüolan-a kahtoknyu üshei tangte shonpu Kahwang Yaha nyit ngohnang;

⁷hüyange I wen, hüyange ahngpa shotjing me shotpu, yakjah ye mepu laitee yah.

⁸Hüyange Iye laitee yahyang phei me, üyin yinmok peli hüyange lwngmei da me peli-a Nyee Üha shao me ümmekhüm, iman lili me kongki japong hüyange sü maawe shokyangpu hon wan japong ngoh; tüolan-a üjaolan ne yoppu ngohnang.

⁹Hüyange iman-e hem üla ja lokke i: “Laitee yahlak hüyange tüopa füosang tüppulan eplak nange wangnang; hangjingne nang toiyangki hüyange nange yoi iy ye kahtalan Kahwang jingne shakyangki. Nokphong hei yenghoi, hüyange jat hei li üshei mepuwe;

¹⁰hüyange toman Kahwang tangte iman ahngching ja hüyange ngengpalan ne menge tam; hüyange iman-e kahtoknyu me wanglam lamlak.”

¹¹Hüyange taowe lei, hüyange tüopa ahngpa shotjing hüyange üyin yinmoklan hüyange lwngmeilan neikonne wangdang shongmokpalan üngang ngaowüng jai; hüyange iman shangtoi haja tokte haja, hüyange ha tokte ha ngohyangki;

¹²iman-e ngao üyong ngaiye i: “Toipu Nyee ühawe ünganwong, toinyu nanha, konjong, hüyange wong hüyange yihnoonpu hei müktishiwa hüyange moiman tüolak wangngoi nang!”

¹³Hüyange wangdang me, hüyange kahtoknyu me, hüyange kahtok ümongme, hüyange yengching tangme, lingputoi üshei, hüyange tüolan khongkümpu me hanghe yin ngoh, khongkümpuwe tüo ipu taowe jai, “Ahngpa shotjing me shotte ngohpupate, hüyange Nyee Ühate moiman, yihlupu, müktishiwa, hüyange ünganwong jinte üküm yenangpe ngohtüoh!”

¹⁴Hüyange üyin yinmok peliye janne i, “Amen!” Hüyange lwngmeilanne ümmeta hüyange yoppekhüm.