Read Konyak Naga ÜTAHTENGAIPU 6 Bible Online

ÜTAHTENGAIPU 6 - Konyak Naga bible

ÜTAHTENGAIPU 6

¹Sha-a Nyee Üha aowe füosang tüppu nyit yo mepu ja ep, tüopa taowe nge, hüyange üyin yinmok peli yo me jawe wangkhongpu ngaowüng kihpuwe ngaowe taowe jai, “Peikei!”

²Hüyange taowe lei, hüyange leihu, koipong üheng ja, hüyange tüopa tangme shotpu yakme wenglah ja ngoh; hüyange Ite ahngpa shaoshaoh ja pha, hüyange (ching) hahjang hah-e hüyange hahlak jingne tai.

³Aope Iye füosang nishepupa ep, taowe üyin yinmok ni shepupawe ngaowe jai, “Peikei!”

⁴Hüyange üne-o koipong ülao, koipong ütak ja ngai; hüyange tüopa me shotpupate, yoi pheipu shümpa hei shümpa nipa me teitoi ne tamlak jingne, kahtoknyu mepu chingmei yahteilak pha. Hüyange Ite yanglow üyong ja pha.

⁵Aope Iye füosang tüppu lümshepupa ep, taowe üyin yinmok lümshepupawe ngaowe jai, “Pekei!” Hüyange taowe leiwante, koipong ünyak ja nge; hüyange tüopa tangme shotpupa yak me toklak ja ngohyangki.

⁶Hüyange üyin yinmok peli yomepu ngaipu ngaowüngke, taowe tüopa ngaowe jai, “Nyih ja nantoi jingne wheat tah wong shengkok ja, hüyange nyih ja nantoi jingne barley tah wong shengkok lüm ngohlak, hüpoi olive pee hüyange wuwüngwu nange tahmeng!”

⁷Aope Iye füosang pelishepupa ep, üyin yinmok pelishepupawe ngaowünge ngaopu taowe jai, “Peikei!”

⁸Hüyange taowe nge, hüyange leihu, koipong üjen ja nge; tüotang me shotpupa min-a Lipupa; hüyange lipu yimching Ipheite woi. Hüyange yanglow-e, seanyao yenglepuwe, lipuwe hüyange kahtoknyu phao yinmok-e toilak jingne imante kahtoknyu pelishepupa meitam ja tangme wong pha.

⁹Aope Iye füosang ngashepupa ep, aoyinne Kahwang ngao jingne hüyange iman-e phapu saki jing ne toi, iman Yahalan khümjing ümongpa me taowe nge.

¹⁰Hüyange iman-e üngwünne ngaowe i, “O Ütahpa Youngwanpa, üjao hüyange Üting, nange ngaophün lak, hüyange kahtoknyu me ngohpalan tangme toman iy jingne imante phuh hahlak hangshin shonne ngohlak?”

¹¹Hüyange iman kahta lilite o üheng japong pha; hüyange iman shümpa shaoshanpalan hüyange iman naoyeman iman kih-e toilak, iman shangtoi manwang manwang iman-e ütenja toloimeiye ngohlak yang she imante i.

¹²Aope Iye füosang wok shepupa ep, taowe lei, hüyange leihu, minwe üyong lei; hüyange wanghe üminpheipu nyenyak ke nyakke mah, hüyange linnyu lanshepu iy kih-e ngai;

¹³hüyange wangyang üyong leiwante phukyak üyoi yeipuke, wangdang shanhalan kahtoknyute yei;

¹⁴hüyange wangdanga laitee teye tüohpuke ye-ngepe mah, hüyange kahtang hei dikhot üshei yoi nyoi mepu poyan.

¹⁵Hüwante kahtoknyu ahngpalan hüyange üyonglan hüyange hajawoipalan hüyange hakpa hei wongnangpalan, hüyange moilan, rhapa hei bumei, longsalan me hüyange wak mepu longnyu phangme iman nying nyingke lo;

¹⁶kahtang hüyange longnyute nyik-e i, “Toman tangme yeitampha, hüyange ahngpa shotjing me shotpupa sheta mepu, hüyange tüopa Nyee Üha mongshih ngaipu mepu toman lo tampha;

¹⁷hangjingne iman mongshih ngaipu nyih üyong peiye ngohnang, hüyange aowe yonge ngoh oklak shi?”