Read Konyak Naga ÜTAHTENGAIPU 7 Bible Online

ÜTAHTENGAIPU 7 - Konyak Naga bible

ÜTAHTENGAIPU 7

¹Tüophei me kahtoknyu yejema-a yengching yejema-a hanghe pee te-o wangyang yeleilak jingne, kahtoknyu wangyang peli tükke, kahtoknyu ünuk peli ye me yonge ngohpu wangdang shongmokpa peli taowe nge.

²Hüyange üyin Kahwang jing füosang jonyange, wanghe ongjing mepu wangdang shongmokpa ülao ja ngaipu taowe nge; hüyange Iye ngaowüng üyong phei üngwünne, kahtoknyu hüyange yengching te yemeipe linglak jingne aoyinte ünganwong pha, tüopa wangdang shongmokpa pelite nyik-e i,

³“Toman-e toman Kahwang shaoshanpalan shekeng me füosang mantüp mantüp, numan-e kahtoknyu yejema-a yengching, yejema-a peeyinte yemeipe tahling.”

⁴Hüyange tüopa füosang tüppulan shangtoi, Israel hayim jat lili mepu ghoja pheime deli pheime peli haja (1,44,000) füosang yangpulan taowe nge:

⁵Judah nokphong füosang yangpulan haja penme ni, Reuben nokphong mepu haja penme ni. Gad nokphong mepu haja penme ni,

⁶Asher nokphong mepu haja penme ni, Naphtali nokphong mepu haja penme ni, Manasseh nokphong mepu haja penme ni,

⁷Simeon nokphong mepu haja penme ni. Levi nokphong mepu haja penme ni. Issakhar nokphong mepu haja penme ni,

⁸Zebulun nokphong mepu haja penme ni, Joseph nokphong mepu haja penme ni. Benjamin nokphong mepu haja penme ni ngoh.

⁹Tüolan linyang phei me, leihuyah, aowe-o iye ye-okpu ükhong üyong ja, jat hei li hüyange kahta hei ngao üshei mepu ngeng-ahng phakshaoh üheng o yange, iman yak me lokyak jonyange tüopa ahngpa shotjing hüyange Nyee Üha sheshao me yongyange taowe nge.

¹⁰Hüyange iman-e ngaowüng üyong puphei üngwünne i, “Yinyepupa-a Ahngpa shotjing me shotte ngohpu teman Kahwang hüyange Nyee Üha jing!”

¹¹Hüyange wangdang shongmokpalan üshei ahngpa shotjing neikonne shotyange lwngmeilan hei üyin yinmok peli neikonne, hüyange ahngpa shotjing sheshaome iman sheta khuhta hüyange Kahwangte khüm,

¹²hüke ngaowe i, “Amen! Moiman hei müktishiwa. Konjong hei minyong ngampai iyeshepu hei ünganwong hüyange wong jinte üküm yenangpu teman Kahwang me ngohtüoh! Amen.”

¹³Hüwante lwngmeilan yo me jawe üte janne i, “Ngeng-ahng phakshaoh üheng oyangpulan-a aoyin, hüyange iman ümmeken mepu peipu?”

¹⁴Taowe Ite i, “Üyongpa, nange hei shingnang.” Hüyange Iye üte i, “Tüolan-a shangepongpu üyong mepu ngaipalan, hüyange iman Nyee Üha iy me yoi ngeng-ahng phakshaoh jaowetamme ühengne menge tam.

¹⁵“Tüokhei iman-e Kahwang ahngpa shotjing sheshao me ngoh-e, wangnyak wangngai I khümjing mongme khümnang; hüyange ahngpa shotjing me shotpupawe iman-a yoi ompu wangshüm phangme anglak.

¹⁶Iman shaaji aope-o sea yenyaolak, yejema-a yeng yelelak; wangheye imante yehelak, yejema-a yekatlak.

¹⁷Hangjingne ahngpa shotjing hotan yo me ngohpu Nyee Üha iman nyeeyompa ne menglak; hüyange üyin yeng ngaijing te Iye iman woilak; hüyange Kahwange iman mük mepu mükphi üshei phutwinlak.”