Read Konyak Naga ÜTAHTENGAIPU 8 Bible Online

ÜTAHTENGAIPU 8 - Konyak Naga bible

ÜTAHTENGAIPU 8

¹Aope Nyee Ühawe nyitshepupa füosang ep, wangdang me ngao yengaipe ghonda tangkhüw nanjing ngoh.

²Hüwante Kahwang sheshao me yongyange ngohpu wangdang shongmokpa nyit-a taowe nge; hüyange imante nyawong nyit pha.

³Hüyange süjak honsheng jonpa wangdang shongmokpa ülao ja pei, hüyange khümjing nyoi me yong; hüyange ahngpa shotjing sheshao me ngohpu hon khümjing tangme üjaolan üsheiye yoppu me Iye shaiye tamlak jingne, Ite sü maawe pha;

⁴hüyange üjaolan yoppu phei shongmokpa yak mepu sü vünkhuh Kahwang sheshaote ong.

⁵Hüwante shongmokpawe sü jakpu sheng yahpuwe, tüome khümjing mepu vün ne maawe heyange, kahtoknyute yeine tam; hüyange wangkhongpu, hüyange ngaowüng, hüyange wangphihlangpu, hüyange minwe lei.

⁶Sha-a nyawong nyit jonpu wangdang shongmokpalanne nyawonga wünglak jingne yoi nying nyingke tüm.

⁷Üwangpa wangdang shongmokpawe yoi nyawong wüng, hüyange iy phei nyityange, yi hei vün ngai, hüyange tüolan-a kahtoknyute yei; hüyange kahtoknyu üphong lüm mepu üphong ja hah, hüyange pee üphong lüm yo me ja hah, hüyange ühüng me ngohpu hüng khongkümpu hah.

⁸Nishepupa wangdang shongmokpawe yoi nyawong wüng, hüyange vün loonge ngohpu kahtang üyongke ülam ja yengching te yeitam;

⁹hüyange yengching üphong lüm yo me üphong ja iy ne meng, hüyange yengching me ngohpu üyin yinmok üphong lüm ne tamme üphong ja li, hüyange yenglinlan üphong lüm mepu üphong ja mengtam.

¹⁰Lümshepupa wangdang shongmokpawe yoi nyawong wüng, hüyange ayeng kih-e, teeye ngohpu shanha üyong ja wang mepu yei, hüyange yengyin üphong lüm yo me üphong ja tangme, hüyange yengpeiwo tangme yei.

¹¹Hüyange shanha min-a ükhah; hüyange yeng üphong lüm yo me üphong ja ükhah ne meng; hüyange yeng khahpu nanjingne, tüopa yenge kahta maawe li.

¹²Pelishepupa wangdang shongmokpawe yoi nyawong wüng, hüyange wanghe üphong lüm yo me ja, linnyu üphong lüm yo me ja, hüyange shanhalan üphong lüm yo me ja ünyak ne menglak hüyange nyih üphong lüm yo me ja wangngai yenanglak, hüyange yaning hüke ngailak nanjingne wanghe linnyu hüyange shanha tüolan üphong lüm yo me ja te shüt.

¹³Hüyange taowe lei, hüyange wang üwo me yüngphang awlan ja puwe ngao üyongpuwe üngwünpu taowe jai, “Wangdang shongmokpa lüm me ngaone ngohpu ülao nyawong ngaowüng jingne kahtoknyu me ngohpu lan onyukei, onyukei, onyukei!”