Read Konyak Naga ÜTAHTENGAIPU 9 Bible Online

ÜTAHTENGAIPU 9 - Konyak Naga bible

ÜTAHTENGAIPU 9

¹Hüyange wangdang shongmokpa nga shepupawe yoi nyawong wüng, hüyange wangmepu kahtoknyute shanha ja yeipu taowe nge; hüyange ükong yenangpu kahsa eplak yüpmee pha;

²hüyange Iye tüopa ükong yenangpu kahsa ep, hüyange kahsa mepu vünjhom üyong vünkhuh kih-e vünkhuh ngai; hüyange tüopa kahsa vünkhuh-e wanghe hüyange wang ünyak ne meng.

³Hüwante vünkhuh yo mepu nyaodukh kahtoknyu te ngai; hüyange kahtoknyu toshitolao wong kih-e, imante wongpha.

⁴Hüyange kahtoknyu hüng yejema-a üyoi ngaipu, yejema-a pee hanghe te-o shangne yetamlak, hüpoi aoyin shekeng me Kahwange füosangpu yenang, tüokihpulante shangne tamlak jingne imante i.

⁵Iman toilak jingne yeje, hüpoi iman lekeng nga ngoiye shangpu ngene tamlak jingne tam; hüyange toshitolaowe kahtate jeihwante hangke shaoshinang, iman-e phapu shaoshi-a hüke ngohlak.

⁶Tüolan nyih hei hipak me kahtalanne lilakpa yamlak, hüpoi iman-e yetüolak; hüyange iman-e lihulak, hüpoi lipupa-a iman mepu yanne tailak.

⁷Leilak müklei me nyaodukh lan-a wehoklak jingne tümpu koipongke ngoh; hüyange leilak müklei me iman shang me hon shaoshaoh ke ngoh, hüyange müklei me iman sheta-a kahta sheta leye ngoh;

⁸hüyange sheko shangminke iman shangmin ngoh; hüyange iman fa yengkong mailang fa ke ngoh;

⁹hüyange iman mongkhüp yan mongkhüp kih-e ngoh, hüyange iman üyang wünga wehok shapjute phette taipu koipong tongtoi üngang ngaowüngke ngoh.

¹⁰Hüyange toshitolaoke iman me ünyei hüyange tükke jeihpu ngoh, hüyange lekeng nga ngoiye kahta shaoshine tamlak iman ünganwong iman ünyei me ngohyangki.

¹¹Ükong yenangpu kahsa shongmokpa-a iman tangme ahngne ngoh; I min Hebrew ngaome Abaddon, hüyange Greek ngao me I min Apolion she nyik (leppu-menge tamlakpa).

¹²Üwangpa onyukei linteki; leihuyah, tüophei me onyukei ni üne-o peiküki.

¹³Hüwante wokshepupa shongmokpawe yoi nyawong wüng, hüyange Kahwang sheshao me ngohpu hon khümjing üwong peli mepu ngaowüng ja taowe jai;

¹⁴nyawong jonyange ngohpu wokshepupa wangdang shongmokpate i, “Euphrates yengyin üyong me sha-angpu wangdang shongmokpa peli lantamtüoh.”

¹⁵Tüokhei wangdang shongmokpalan peli lan, aoyinne kahtanyuha üphong lüm yo me üphong ja toilak jingne ghonda, nyih, lekeng, hüyange wangpeng tümme ngoh.

¹⁶Hüyange koipong me shotpu ngangpalan shangtoi million ghoni ngohyangki; iman shangtoi jeng üte ngaopu jai.

¹⁷Hüyange himang me taowe tüolan koipong hüyange tüolan tangme shotpalan hüke nge; Iman mongkhüp vünkih-e takke, shenyakshe hü-ünge hüyange ünyan; hüyange koiponglan üshang yengkong mailang üshangke hüyange iman ju mepu vün hüyange vünkhuh hüyange ayeng ünyan ngai.

¹⁸Iman ju mepu ngaipa vün hüyange vünkhuh hüyange ayeng ünyan, tüolan shangne tampu lüm kaiye kahta üphong lüm mepu üphong ja toi.

¹⁹Hangjingne koiponglan üngan-a, iman ju me hüyange ünyei me ngohyangki, hangjingne iman ünyei pu leye, hüyange üshang phei hüyange tüowe imante mako sa ne tam.

²⁰Tüolan lümnyutin toishaowe aoyin towe angpu kahtalan yetoi, iman-e ngene, jaine hüyange kemme yongne ye-okpe ngohyange-o tüokihpu hon hei khüm, yantük hei long hei pee phei lingpulan hüyange ünu yahalante khümpu tüohlak iman yaktoi mepu mong yelüp;

²¹hüyange iman-e kahta toipu, phongyengpu toi, nuweshakpu, kuhpu, tüolan mepu-o mongyelüp.