Read Konyak Naga RUTH 1 Bible Online

RUTH 1 - Konyak Naga bible

RUTH 1

¹Kahpalan wanglam lampu hipak me kahmük me seanyao yenglepu ja ngai; hüyange Judah kahtok Bethlehemlan kahta ja, I shekonyu, hüyange Iha ni Moab kahtok me nyoilak jingne tai.

²Hüyange tüopa kahta min Elimelech, shekonyu min Naomi, hüyange Iha ni min Mahlon hei Chilion ngoh yangki. Iman Judah kahtok Bethlehem me ngohpu Ephratislan. Iman Moab kahtokte tai hüyange tüome ngoh.

³Tüopa nyih hipak me yha hüyange Iha ni tüohyange Naomi netanpa Elimelech limah.

⁴Tüome iman-e Moab sheko yah; ja min Orpah hüyange ülao yha min Ruth. Hüyange tüome iman wangpeng pen nanjing ngoh.

⁵Mahlon hei Chilion imni moi ni li, hüyange shekonyuwa yha üha ni hüyange yha yoi netanpa litei-e tüoh.

⁶Youngwanpawe yoi kahtalante imante ülick meiye ngaine tam-e, moiman pha nangki she Naomi-e jai; tüokhei yhawe yoijing nyemnya nyu ni yahyange Moab tüohyange tailak jingne tüm.

⁷Hüyange yha nyemnya ni phei yhawe yoi nyoijing mepu yayong, hüyange Judah kahtokte leihyelak iman-e lamme tai.

⁸Hüpoi Naomi-e yoi nyemnya nite i, “Leihyetüoh, hüyange nangni moini yoi nyu nokte yetüoh. Hüyange nangni-e litepu lante hüyange üte shüpshe-e jonpuke Youngwanpawe nangnite shüpshe-e jonshih.

⁹Nangni moini yoi netanpa nokme toloimeipu nge oklak ne Youngwanpawe nangni moi manshih!” Tüophei me yhawe imnite omhüp hüyangpoi imni-e ngao ngaiye shap.

¹⁰Imni-e yhate i, “Yeje, tomni nang kahta tangte nang phei leih yelak.”

¹¹Hüpoi Naomi-e i, “Ü-nyemnya ni, leih yetüoh; hangne nangni ü-phei tailak shi? Nangni netanne menge oklak ne ü-nao nyoi me üne-o hayimlan ngoh nanga?

¹²Leih yetüoh, ü-nyemnya ni nangni yoi lamte taitüoh; hangjingne tao netan ja me ngohlak meiyange wunyu ne mengteki. Taowe monghümlak ngohnang she taowe ima-a, taowe teya netan ja tüowe hayimlan puhlak monghümpu ngohnang she taowe ima-a,

¹³nang niye iman manjong manjong she tanlak a? Tüokih-e nangni toi yetaipe ngohlak a? Yeje, ü-nyemnya ni, tüojingne nangni phei-a taopa hi mong shemengki, hangjingne Youngwanpa yak ü-phei tüi-e noteki.”

¹⁴Imni üne-o ngao ngaiye nishe shap; hüyange Orpahwe yoi nyeite omhüp, hüyange nokte ye mah; hüpoi Ruthtepa-a yhate kün.

¹⁵Hüyange Naomi-e yhate i, “Ruth, leihuyah, nang einyu-a yoi kahta hüyange yoi kahwang tangte leih yeteki, nango nang einyu pheite leih yetüoh.”

¹⁶Hüpoi Ruthte jan-e i, “Nang tüohlak hüyange nang pheite yewoilak üte tahheng; hangjingne nang ümekente tailakei tüokente tao tailak; nang ümeken me ngohlakei tüoken me tao ngohlak; nang kahta-a ü-kahta ne menglak, hüyange nang Kahwang-a ü-Kahwang ne ngohlak.

¹⁷Nang ümeken me lilakei tüoken me tao lilak, hüyange tüoken me tao mulak. Youngwanpawe üte hüke lingtüoh, hüyange lipuwe nang hüyange tao yanne tamyapoi hüke ünyei lingtüoh!”

¹⁸Aope Naomi-e Ruth mongjüonge yha phei tailak mongpu nge ok, yhawe yha phei ngaopu lak.

¹⁹Hüke Bethlehemte manpei manpei imni tai. Hüyange aope imni Bethlehem te ngoipei, chingnyu khongkümpu jemme wang hüyange sheko lan-e i, “Hatüowa Naomi a?”

²⁰Hüyange yhawe imante jan-e i, “Üte Naomi she yenyikpe Marah she nyiktüoh, hangjingne, Ütahpa Kahwange üte yeonge khahwe jon.

²¹Aope taowe tüopa nyoi tüoh, wangman-e tai, hüpoi Youngwanpawe tao nishe nokte yakkeng me woiye yenang. Youngwanpawe ükhong sheshao me üte lingpu hüyange Ütahpa Kahwange üte shaoshine tampu ngeyange hangne numan-e üte Naomi she nyikpu?”

²²Hüke Naomi hüyange yha üha shekonyu Moab yha Ruth, Moab kahtok mepu, yha phei leihye; hüyange imni-a barley tah yahne ükong wangwante Bethlehemte peingoi.