Read Konyak Naga RUTH 2 Bible Online

RUTH 2 - Konyak Naga bible

RUTH 2

¹Sha-a Naomi-e yoi netanpa pheipu Boaz she minpu hakpa hüyange tahlange okpu kahta ümei ja Elimelech nokphong mepu ngoh yangki.

²Hüyange Moab yha Ruth-e Naomi te i, “Tao kahte ta shihnüng, hüyange tah yahpalan-e shaipu tahkhah shai küning. I phei jam-e toi lingtüoh she üte ilak kahta ütam taowe tüone ok.” Naomiye yhate jan-e i, “Ü-ha, tatüoh.”

³Tüokhei Ruth yayonge tai hüyange kah me tahyahpalan tokphei me peye tüohpu tahkhah toon-e woi; hüyange yha yatuhshao meiye Boaz aohe Elimelech pheipu ne ngoh, Inok kah tahyah pute tawe shu.

⁴Hüyange leihuyah, Boaz, Bethlehem mepu ta ngoi; hüyange Iye tah yahpalante i, “Youngwanpa numan phei ngohtüoh!” Hüyange iman-e Ite jan, “Youngwanpawe nang moiman tüoh!”

⁵Hüwante Boazwe tah yahpalan woipate i, “Hatüo yhala ao shi?”

⁶Tahyahpalan woipawe Ite jan-e i, “Hatüowa Moab kahtok mepu Naomi phei leihyepu Moab yha ngohnang.

⁷Yha-e i, ‘Taowe nangte yoppe tongnang, tahyahpalan tokphei me tahyakshüp yo me tahkhah le ne tamkhu.’ Tüokhei yha peiye sha-a münshe shotpu tokte kaiye shommepu toloi yemeipe toi lingnang.”

⁸Hüwante Boazwe Ruthte i, “Yhamei, sha-a nange hatüo jaiyah, ülaolan kahte tahkhah toonlak jingne tah tai, yejema-a tüomepu yanne tahtai; hüpoi ü-shaoshan nyulan phei ü-o me ngoh tüoh.

⁹Iman-e yah taipu kahko meete nang mük-e leiye angyah hüyange iman pheite woitüoh. Naoshe lante iman-e nangte shangne yetamlak jingne taowe ngaopha-e yetampu a? Hüyange aope nang yengle lakei, yengtük shongte wenne naoshe lan-e shaowe angpu yeng ying tüoh.”

¹⁰Hüwante Ruthte yha sheta khuhta hüyange yha nying nyingke kahtok ngoiye ümme tayange Ite i, “Tao kahheng sheko ja nehei mengshipute nange üte monghahlak ne hangne taowe nang sheshao me shüpshe tüopu?”

¹¹Hüpoi Boazwe yhate jan-e i, “Nange nang netanpa li phei me netanpa Inyu te nange lingpu hüyange hangke nange nangnyu hei nangpa hüyange yoi nyupuh kahtok tüohyange nange aope-o manshingpu kahtalan tangte peipu hatüo jeng khongkümpu üte meimeiye ngaoteki, hüyange taowe jaiyangki.

¹²Youngwanpawe nang toishao jingne küw phashih, hüyange Israel Kahwang, Youngwanpa aohipa yangphang me nang lolak jingne pei, Iye hünghao wangman-e nangte phashih!”

¹³Hüwante Ruthte jan-e i, “Ü-nokpu, nange üte yeonge shüpshe nang, hangjingne nange üte toloimei tamteki hüyange tao nang shaoshan nyu yo me ja she ine yewang yapeyoi, nange nang shaoshannyute shüpsheye ngaoteki.”

¹⁴Heeitam hahpu hipak me Boazwe yhate i, “Tüome wenkei, hüyange hahtüoh, hüyange nang hahying üshi yengte hüngyah.” Hüyange yha tahyahpalan phei shot, hüyange Iye yhate ngüwyangphei an ütam pha, hüyange yhawe wangman-e hahyange-o heeito to.

¹⁵Aope yha tahkhah toonlak jingne taine yong Boazwe tah yahpalante ngao phawe i, “Yhate tahyakshüp yo mepu-o toonne tamtüoh hüyange yhate tahtien.

¹⁶Hüyange tahyakshüp ütam yei tamtüoh hüyange hatüo tüotüoh hüyange yhate toonne tamtüoh, hüyange yhate tahtee.”

¹⁷Tüokhei Ruthte ünpongte ngoiye yhawe kahko me tahkhah toon, hüyange aope yhawe toonpu tah noiyapeih, hatüo barley tah tahgee ja nanjing ngoh yangki.

¹⁸Yhawe hatüo yahyange chingnyute ye; hüyange yhawe hanghe toonne peiyange noiye in, I nyeite hüo, hüyange üne-o yhawe muh hahyange towe inpu heeito-o yhawe pha.

¹⁹Inyeiye yhate i, “Tenyih nang ümeken me tahkhah toon ei? Hüyange nange ümeken me toi ling? Aowe nangte namno yangki I moimanpa ne mengshih!” Hüyange yha aophei toi ling hatüo yhawe Inyeite hüo hüyange i, “Tenyih taowe ao nok me toi ling, hatüo nok kahta minna Boaz.”

²⁰Hüwante Naomi-e yoinok nyemnyanyute i, “Youngwanpa aowe üyin me ngohpa hei lipupa nipa mepu I shüpshe yahyetei, I moimanpa ne mengtüoh.” Hüyange Naomi-e yhate i, “Kahta-a teman pheipu üja, hüyange teman phei yeonge o-pu kahta ngoh nang.”

²¹Hüyange Moab yha Ruthte i, “Tüo tokte, Iye üte i, ‘Iman-e tenok kah yahman sho mansho, nanga tenok shaoshanpalan phin me ngohtüoh.’ ”

²²Naomi-e Ruthte i, “Ütingme ü-ha, nang jingne-a Boaz nok kah me toilingpu shekolan phei toi lingpu shemeilak. Nang ülao kahta ja nok kahte ta ma-a, nangte shangne tam phalak.”

²³Tüokhei barley tah hüyange wheat tah manyah sho manyah sho tahkhah toonlak jingne Boaz nok shaoshan nyulan phei Ruth yeonge shüppe jemme tawe ngoh; hüyange Inyei phei yha yeyanpe ngoh yangki.