Read Konyak Naga RUTH 3 Bible Online

RUTH 3 - Konyak Naga bible

RUTH 3

¹Nyih ja Naomi-e Ruthte i, “Ü-ha, taowe nang jingne netanja yam-e tamlakne ngainang, hümme nakshih nang yoi noksa ja linge ngohpu oklak.

²Sha-a Boaz aohijing shaoshan nyulan phei nanga toi linge ngoh yangki, I teman pheipu ne jenang. Leihuyah, teya tahnoijing me Iye barley tah noikülak.

³Tüokhei nang nying nyingke tuhphoyange shemeipupa minnga phoyah hüyange nang nyemo shemeipupa o-yange, tahnoi jing te nang ongtüoh; hüpoi I hahyingpu mansho mansho nange nang nying nyingke kahtapate shingne tahtam.

⁴Hüyange aope I shilakei, nange I shipu nyoite leiye tüoyah, hüyange nang ongtüoh hüyange I yashong yekao me eptüoh hüyange shitüoh, hüyange nange hanghe linglak hatüo Iye nangte iphalak.”

⁵Ruthte yhate jan, “Nange ngaowe tampu khongküm taowe linglak.”

⁶Tüokhei Ruth tahnoijing te ong, hüyange Inyeiye ngaowe tampuke khongküm ling.

⁷Hüyange aope Boaz hahying sho hüyange I mongmei, I tahmang shünge angpu ükong yeme shi ne wen. Hüwante Ruth jünge pei hüyange I yashongye ep hüyange yha tüoken me shi.

⁸Hüyange phawo me I mokhshe shinyang hüyange I nying nyingke lüppe ye hüyange leihu, I yashong me sheko ja shiyange ngoh.

⁹Hüyange Iye tong, “Nang aoshi?” Hüyange yhawe jan, “Taowa nang shaoshannyu Ruth; tüokhei nang shaoshannyute paowe tüklak-a nang ngoh nang. Nang in-nye ü-tang me yüoh tamtüoh.”

¹⁰Hüyange Iye i, “Ü-ha, Youngwanpa nang moiman tamshih; toiha jeyah hakpa jeyah yam-e nange naoshelan pheite yewoipu kaiye üwang phei-a ükümye me hi nange üte shüpshe ünyei hüoteki.

¹¹Hüyange sha-a, ü-ha, nang tahnyam; nange ipu khongküm taowe nangte linglak; hangjingne ü-kahtalan chingnyu me ngohpu üsheiye nanga wange ngoipu sheko ja she shingteki.

¹²Hüyange nangjingne taowa she-opu she ipuwa üting, tüoyangpoi ü-phei nehoi she-opu jat hei li ja ngohnang.

¹³Teyapa-a tüo me tantüoh, napning hei teman-e tüopa-a shinglak; Iye nangte paowe tüklak heiya yeleilakei ngelak. Hüke paowe tükpune mengma-a meipu; hüpoi Iye nangte paowe tükpu yenangma-a Youngwanpa üyin me ngohtepuwe, taowe nangte paowetüklak. Sha-apa-a wang manngai manngai tüo me shi ngohtüoh.”

¹⁴Tüokhei wang manngai manngai yha I yashong me shi, hüpoi she teimanshing okpe ngohwante yha shinlüo; hangjingne Boazwe kahta aote-o yha tüome shiyangki she shingne yetamhu.

¹⁵Hüyange Boazwe yhate i, “Nange inpu inkhek lanne tüome shankei.” Hüyange yhawe hatüo jonyange shan, hüyange Iye barley tah kilogram da nanjing takyange yhate tüome shokke tam; hüyange yha phaktang me nowe paine tamyange yha chingnyute leih yene tam.

¹⁶Hüyange aope yha yoi nyei tangte pei ngoiyapei, Inyeiye tong, “Ü-ha, nange hangke hüowe pei ei?” Hüyange yhawe yhate kahtapawe lingpu khongkümpu i.

¹⁷Hüyange yhawe paowe i, barley tah kilogram da nanjing Iye üte pha, hangjingne Iye i, “Nang nyei tangte nang yakkeng me yeyelak.”

¹⁸Hüwante Naomi-e yhate i, “Teihpu hangke ngaikülak hatüo nange shinge manpei manpei jünge nünne ngohtüoh, hangjing ne toishao-a tenyih mansho mansho kahtapa-a jajang jawe yengoh külak.”