Read Konyak Naga RUTH 4 Bible Online

RUTH 4 - Konyak Naga bible

RUTH 4

¹Shon-yengohpe chingnyu peten pong mepu jemjing nyoite Boaz pei hüyange tüoken me shot. Hüwante Elimelech she-opupa jeiheinao, aohipa jeng Boazwe ngaoyangki, I peingoi, hüyange Boazwe Ite nyik-e i, “Hüi nangpa! Tüome wenkhu hüyange tüome shotkei.” Tüokhei I tüokente wen hüyange shot.

²Hüyange Boazwe chingnyu lwngmeilan naoshe pen woipei hüyange numan-o tüo me shotkhu she tong; hüyange iman shot.

³Hüyange Iye Iphei pupate i, “Naomei ao Moab kahtok mepu leih ye, Iye teman jeiheinao Elimelech jing kahtok yüoning she ipuyang;

⁴tüokhei taowe nangte hüke ihuwe teihnangki.” Tüome shotte ngohpalan sheshao me hüyange ü-kahtalan lwngmeilan sheshao me hatüo shak-e yinlakei she ima-a, shak-e yintüoh; hüpoi nange hatüo shak-e yeyinlak yang she ima-a, taowe shinglak ne üte itüoh, hangjing ne nang tokte kaiye hatüo shak-e yinlak ao-o yenang; hüyange nang pheima-a tao hei ngohkülak. Hüyange Iye i, “Taowe hatüo shak-e yinlak.”

⁵Hüwante Boazwe i, “Meiteki, hüpoi hanghe nyih me Naomi yak mepu kah shak, tüopa phei litepupa min I mothlei phei omme ilak ne, litepupa shekonyu Moab yha Ruth nange omme shaklak wongpong.”

⁶Hüwante I pheipupawe i, “Hüke ngailak ne ngaima-a üjing mothlei püoh-e ngohlak yang; taowe shak-e yinhah shepu meitam-a nange shaktüoh; hangjingne taowe hatüo shak-e yinne ye-oklak yang.”

⁷Sha-a shak-e yintampu hüyange jeileipu Israellan yo me wanglam ülang hüke ngoh yangki; pheei teileih teishakpu ütingpa she ilak nanjingne, yaopupa kahta jawe I yashom khokke Iye hatüowa shakpate phalak; hüyange hatüowe üshong hipak me Israellan saki teiphapu wanglam ne ngoh yangki.

⁸Tüokhei aope I pheipupawe Boazte i, “Hatüowa nang jingne nange shaktüoh,” I yashom khokke yahpuwe hatüo Boazte pha.

⁹Hüwante Boazwe lwngmei hüyange kahtalan khongkümpu te i, “Elimelech jing khongküm hüyange Mahlon hei Chilion ni jing khongkümpu Naomi yak mepu taowe shakteki she tenyih numan saki ngoh nang.

¹⁰Tüo tokte litepupa min I mothlei phei ngohlak ne hüyange litepupa min jeiheinaolan yo mepu hüyange I ngoh jing peten mepu yeyanlak ne Mahlon shekonyu Moab yha Ruth ü-shekonyu ne menglak taowe shakteki; tenyih numan saki ngoh nang.”

¹¹Hüyange peten me ngohpu kahta hüyange lwngmei khongkümpuwe i, “Toman saki ngohnang. Nang yakte ongpu shekowa Rachel hei Leah, aoyinne Israel nokphong lingeyeteki, imni leye Youngwanpawe moiman tamshih; hüyange nang Ephrathah me moiman tüoh, hüyange Bethlehem me jaluntüoh.

¹²Hüyange Youngwanpawe nangte phapu tüopa yhamei üli mepu Perez nokphong aohi Tamar mepu Judah jalun tüopa leye nang nokli ngohtam tüoh.”

¹³Tüokhei Boazwe Ruth yah, hüyange yha I sheko ne meng, hüyange Iye yha tangte ong hüyange Youngwanpawe yha püm yekengpe ngaitam hüyange yhawe netanha ja moi pai.

¹⁴Hüwante sheko lan-e Naomite i, “Youngwanpawe nangte paowe tüklak jingne tenyih huyim ngaitam nang. Youngwanpa min yongtüoh! Israel me tüopa naosheha-a Ütahpa me müktishiwa ne tamshih!

¹⁵I-a nang üyin yinne tampupa ne menglak hüyange nang wunyu hipak me paowe tükpa ne menglak; hangjingne nang nyemnya nyu aowe nangte loishe ken, aowe naoshe nyit phei nehoi sheyongpu ne yhawe I nangte puhtam nang.”

¹⁶Hüwante Naomi-e naha-a noonne yah-e hatüo yha jakuh me pai hüyange yha-a tüopa naha nao puhnyu ne meng.

¹⁷Hüyange yha yupi shekolan-e Ite min ja phawe i, “Tüome Naomite netan naha ja puh ngohnang. Hüyange iman-e I min Obed she min.” Obed Jesse üpa ne meng, hüyange Jesse David üpa ne meng.

¹⁸Sha-a tüolan-a Perez mepu jalunpu ngohnang. Perez mepu Hezron ngai;

¹⁹Hezron mepu Ram ngai; hüyange Ram mepu Amminadab ngai;

²⁰Amminadab mepu Nashon ngai, hüyange Nashon mepu Salmon ngai;

²¹Salmon mepu Boaz ngai hüyange Boaz mepu Obed ngai;

²²hüyange Obed mepu Jesse ngai, hüyange Jesse mepu David ngai.