Read Konyak Naga 1 SAMUEL 10 Bible Online

1 SAMUEL 10 - Konyak Naga bible

1 SAMUEL 10

¹Hüwante Samuel-e olive minnga shengja yah, hüyange hatüo I shangtang me shok-e tam, hüyange Ite omhüp hüyange i, “Youngwanpawe I kahtalan Israel tangme ahngne menglak jingne nang minnga phowe lepu yeje a? Hüyange nange Youngwanpa kahtalan tangme wanglam lamlak, hüyange iman neikon-e ngohpu wepalan yak mepu nange iman yintamlak, hüyange hatüowa Youngwanpa I kahtalan tangme ahngne menglak jingne minnga phowe lepu yepinlakpa ne menglak.

²Aope nang ü-mepu tenyih yanne tailakei, hüwante nange kahta ni Rachel mangjong me Benjamin yikeng me Zelzah me hüolak; hüyange iman-e nangte ilak, ‘Gadolan hanghepa nange yamme tai, tüoteki, hüyange leihuyah, nangpawe gado paolakpa tüohyange nang jingne mongshange inang, “Tenok naoshe jingne taowe hang linglak?” ’

³Tüophei me tüomepu nang sheshao yete taitüoh, hüyange nang Tabor longkhampee shongte peilak, hüyange tüome nange kahta lüm Bethel te Kahwang tangte onge hüolak; shejawe younpong üha lüm yahyange hüyange ülao jawe an khüw lüm yahyange, hüyange ülao jawe wuwüngti shengja yahyange hüolak.

⁴Hüyange iman-e nangte salam phakülak, hüyange ankhüo ni phakülak, hanghepa nange iman yak mepu yahlak.

⁵Tüophei me Philistia nyahponglan ngohpu nyoi Kahwang kahtangte nang peilak; hüyange aope nang chingnyu te peilakeih hipa ükhong ja, kongki ümtük, pheamkao, hüyange viwo, hüyange kongki lahha phei polokpu nange hüolak hüyange iman-e itpu ngao iye ngohlak.

⁶Youngwanpa Yaha nang tangme wong üyong puphei mokhshe peikülak, hüyange nange iman phei itpu ngao ilak, hüyange nang kahta ülao ja ne menge mahlak.

⁷Sha-a aope tüolan yepinlakpa nang tangte peilakeih, nang hipake tampu kih-e lingtüoh; hangjingne Kahwang nang phei ngoh nang.

⁸“Hüyange nang ü-phei shaotanne Gilgalte tailak; hüyange leihuyah, taowe nang tangte jakke dopu dolak, hüyange chingmei dopu toidolak jingne laikülak; tao nang tangte manpei manpei hüyange nange hanghe linglak nangte manhüo manhüo nyih nyit nange tanlak yang.”

⁹Aope Samuel mepu tailak jingne I tokphei lüp, Kahwange Saulte mongjang üla ja pha; hüyange tüolan yepinlakpa khongküm tüopa nyih me ngai.

¹⁰Aope iman Gibeah te ngoiye pei; leihuyah, hipa ükhongja I phei hüo; hüyange Kahwang Yaha I tangme wongnang puphei pei, hüyange Iye iman yo me itpu ngao i.

¹¹Hüyange aope üshongpe teishinge ngohpalan-e, ütingme Iye hipalan phei itpu iye ngaonang she nge, kahta lan-e jawe jate i, “Kish ühate ngaipu hatüowa hang shi? Saul-o hipalan yo me omnang kü a?”

¹²Hüyange ü-o me yonge ngohpu jawe jan hüyange i, “Hüyange iman üpa-a aohi shi?” Tüokhei tüopa-a “Saul-o hipalan yo me omnang kü a?” she ipu deitapukon ne meng.

¹³Aope Saul-e polokpu hei itpu showe pei, I kahtang wümjong te ong.

¹⁴Saul Ipajoiye Ite hüyange I shaoshanpate i, “Numan hang tai ei?” Hüyange Iye i, “Gadolan yamlak jingne tai; hüyange aope toman-e iman yetüo, toman Samuel tangte ngoi.”

¹⁵Hüyange Saul Ipajoiye i, “Chingmei lamlinge Samuel-e nangte hanghe i, üte itehu!”

¹⁶Hüyange Saul-e Ipajoite i, “Iye tomante lantaak-e gadolan-a tüoteki she i.” Hüpoi ahngne mengpu toishao jeng hanghepa Samuel-e ngao, Iye Ite hango ye i.

¹⁷Sha-a Samuel-e kahtalan jamshe Youngwanpa tangte Mizpahte nyik;

¹⁸hüyange Iye Israel kahtalante i, “Hüke Youngwanpa Israel Kahwange inang, ‘Taowe Israel Egypt mepu woitei hüyange Egyptlan yak mepu hüyange numan shaoshitampu ahngchinglan üshei mepu Taowe numan yintam.’

¹⁹Hüpoi tenyih numan-e numan Kahwang yeyah, aowe I nying nyingke numan wengtuh hüyange mongmenglak khongkümpu mepu yin, hüyange numan-e Ite i, ‘Yeje! Hüpoi toman tangme ahngpa ja angpha.’ Sha-a tüokhei numan nying nyingke Youngwanpa sheshao me numan nokphong nokphong hüyange numan puhu peiye yongtüoh.”

²⁰Tüokhei Samuel-e Israel nokphonglan khongkümpu owe peine tam, hüyange Youngwanpawe Benjamin nokphong le.

²¹Hüyange Iye Benjamin nokphong iman nokphong owe woipei, hüyange Matri nyahtap le; hüyange Kish üha Saul le; hüpoi iman-e I yamwante, I ye-nge;

²²Tüokhei iman-e Youngwanpate “Üne-o kahta ütam peilak ne ngoh nang a?” she tong, hüyange Youngwanpawe jan, “Leihuyah, Saul Iye yoi nying nyingke hangki yo me lowe ngohnang.”

²³Hüwante iman phet hüyange tüomepu I woiye pei; hüyange aope I kahta yo me yong, kahtalan phei I phaktang me peiye shedao she ngoh yangki.

²⁴Hüyange Samuel-e kahtalan khongküm pute i, “Youngwanpawe ao le numan-e ngeyah? Hüke kahta üshei yo me I kihpu ao-o yenang.” Hüyange kahta khongkümpuwe üngwün hüyange i, “Ahngpa jin laowe ngohtüoh!”

²⁵Tüophei me Samuel-e kahtalante ahngching toishaolan jeng ngaowe tam, hüyange hatüo laitep ja me nyan, hüyange hatüo Youngwanpa sheshao me angetüoh. Hüyange Samuel-e kahta lili yoi yoi nokte yanne tam.

²⁶Hüyange Saul-o Inok Gibeah te leih ye, hüyange Iphei Youngwanpawe aoyin mongjang me potam, wongnangpu kahtalan ütam woi tei.

²⁷Hüpoi ühak yekohpu kahta ütam-e i, “Tüopa kahtawe teman hangke yinlak?” Hüyange iman-e Ite yaowele hüyange I tangte hünghao yah yepei. Hüpoi I ngao yengaipe ngoh yangki.