Read Konyak Naga 1 SAMUEL 11 Bible Online

1 SAMUEL 11 - Konyak Naga bible

1 SAMUEL 11

¹Ammonlan Ahngpa Nahash yoijing nyahponglan woiyange ong, hüyange Jabesh-gilead omme yah; hüyange Jabesh kahta khongkümpuwe Nahashte i, “Toman phei jiengjeppu ja lingtüoh, hüyange toman-e nang shao shanlak.”

²Hüpoi Ammonlan Nahashwe jan-e imante i, “Hüke taowe yafün ja angyange numan phei teijanpu ja linglak. Taowe numan jing yakjahye mük khongkümpu yok-e winlak; hüyange hatüo hüke taowe Israel tangme wüotüo tamlak jingne yah peitamlak.”

³Hüwante Jabesh lwngmei lan-e Ite i, “Israel yikeng pong üshei ye me ngaolan kipalan shonlak jingne tomante nyih nyit hipak yahkhu; hüyange tüophei me toman yinlak ao-o yenangma-a, toman nang tangte ongküning.”

⁴Aope ngaolan kipalan ümeken me Saul nyoi ngoh, tüopa Gibeahte pei, hüyange tüolan ngao kahtalan nasa me jaine tam-e ngao; hüwante kahta liliye iman ngao ngai hüyange nyampuwe üngwünne shap.

⁵Hüwante leihuyah, kahko mepu Saul mahu üponglan tokphei me woiye leihye; hüyange Saul-e i, “Kahtalan shappu hatüo iman shaoshipuwa hangshi?” Hüyange iman-e Jabesh kahtalan-e ngaopu ngao-a Ite jaine tam.

⁶Aope tüolan ngao Saul-e jai, Kahwang Yaha wong üyong puphei I tangme pei, hüyange I mongshih yeonge ngai.

⁷Iye mahu üpong ni yahpei, hüyange tüolan khoih nyai-e met, hüyange tüolan-a Israel yikengpong üshei yete ngaolan kipalan yak me tüopa deingao iye shon, “Aohipawe Saul phei te hüyange Samuel pheite yepeilakei, hüke iman mahulante linglak!” Hüwante khongkümpu tangme Youngwanpa te nyampu pei, hüyange iman kahta ja kih-e shüppe jem-e ngai.

⁸Aope Saul-e iman Bezek me iye lei, Israel kahtalan-a lakh lüm hüyange Judahlan haja delüm ngoh yangki.

⁹Hüyange peiye ngohpu ngaolan kipalante iman-e i, “Hüke numan-e Jabesh-gilead kahtalante ilak yang, ‘Ngainyih heeitam hahshao me numan yinne tampu ngohlak.’ ” Hüyange ngaolan kipalan pei hüyange Jabesh kahtalante i; hüyange ngaolan jaiyange iman yeonge mongmei.

¹⁰Hüyange Jabesh kahtalan-e Ammonlante i, “Ngainyih toman numan tangte ngailak, hüyange numan-e tomante numante meinang she teihpu khongkümpu lingtüoh.”

¹¹Hüyange ünenap Saul-e kahtalan ükhong lüm ne tam; hüyange iman-e lakjing hotante wangngaipu phei jamshe ngai, hüyange Ammonlan shommepu nyihning ngoiye toi; hüyange aoyin to iman phette yan, hüke yan-e taipu yo me naoshe ni nehoi jam-e yetaipe ngoh yangki.

¹²Tüophei me kahtalan-e Samuelte i, “Saul-e toman tangme ahngne menglak a she ipu kahtalan-a üpu? Iman li ne tamlak jingne kahtalan-a woipeikei.”

¹³Hüpoi Saul-e i, “Tenyih kahta ja nehoi li ne yetamlak, hangjingne tenyih Youngwanpawe Israelte yinne tampu pha teki.”

¹⁴Hüwante Samuel-e kahtalante i, “Peikei, teman Gilgal te onghah, hüyange tüome teman-e nishe Saul-a teman ahngpa ne pongtam hah!”

¹⁵Tüokhei kahta lili Gilgal te ong; hüyange tüome iman-e Saul ahngne mengtam. Hüyange tüome iman chingmei dopu do, hüyange tüome Saul hüyange kahta lili yeonge mongmei.