Read Konyak Naga 1 SAMUEL 12 Bible Online

1 SAMUEL 12 - Konyak Naga bible

1 SAMUEL 12

¹Samuel-e Israel khongküm pute i, “Leihuyah, numan-e üte ngaowe tampu khongkümpu me taowe numan ngao jaiteki; hüyange numan tangme ahngpa ja angtam teki.

²Hüyange sha-a, leihuyah, numan sheshao me ahngpa kemnang; hüyange taowa wupa hüyange shangshao teiye ngohnang; hüyange leihuyah, ü-halan numan phei ngohnang hüyange tao naoshewan mepu tenyih te ngoiye tao numan sheshao me kemyangki,

³Tüome tao ngohnang, ü-phei tüi-e Youngwanpa sheshao me hüyange Iye minnga phowe lepupa sheshao me saki phatüoh. Ao mahu taowe yah ei? Yejema-a ao gado taowe yah ei? Yejema-a taowe ao mepu lüplo-e ngin yah ei? Taowe aote yemeipe jon ei? Yejema-a aomepu taowe ü-mük pom-e tamlak jingne yakjai yah ei? Tüolan yo mepu ütamja nehoi taowe lingyange ngohma-a ü-phei tüi-e saki yahkei, hüyange hatüo taowe numante leih phalak.”

⁴Kahtalan-e jan-e i, “Nange toman ngin lüp-e lowe yeyah ja, yejema-a shaoshi ne yetam ja, yejema-a kahta ao yakmepu-o hango yeyah ja.”

⁵Samuel-e imante i, “Numan-e ü-yak me hango ye-nge she numan phei tüi-e Youngwanpa saki ngohnang; hüyange Iye minnga phowe lepupa tenyih saki ngohnang.” Hüyange iman-e jan-e i, “I saki ngohnang.”

⁶Hüyange Samuel-e kahtalante i, “Mosa hüyange Aaron lepupa hüyange numan payimlan Egypt kahtok mepu woitepu Youngwanpa saki ngohnang.

⁷Sha-a tüojingne Youngwanpa sheshao me Iye numante hüyange numan payimlante lingpu, Youngwanpa üjao toishaolan jeng khongkümpu tam-e hanlak jingne numan yonge ngohtüoh.

⁸Aope Jacob Egypt te pei, Egyptlan-e imante shangne tam, hüwante payimlan-e Youngwanpate üngwün, hüyange Youngwanpawe Mosa hüyange Aaron shon, aoyin numan payimlan Egypt mepu woitei hüyange tüopa kahmük me ngohnetam.

⁹“Hüpoi iman-e Youngwanpa iman Kahwang pemah; hüyange Iye iman Hazor ükhong Sisera yak me hüyange Philistialan yak me hüyange Moab ahngpa yak me yüo; hüyange iman-e iman phei tüi-e hok.

¹⁰Hüyange iman-e Youngwanpa te üngwün, hüyange i, ‘Toman-e ünu omteki, hangjingne toman-e Youngwanpa winne tüohyangki, hüyange Baal hüyange Ashtaroth shaoshan; hüpoi sha-a toman wepa yakmepu yintampha, toman-e nang hei shaoshanlak.’

¹¹Hüyange Youngwanpawe Jerubbaal (Gideon) hei Barak, Jephthah hüyange Samuel shon, hüyange üshei yeme numan wepalan yak mepu numan yintam.

¹²“Hüpoi aope Ammonlan ahngpa Nahash numan phei tüi-e peipu nge, Youngwanpa numan Kahwang numan ahngpa ne ngohpu hipak me numan-e i, ‘Yeje, hüpoi ahngpa jawe hei tomante wanglam lamne tampha.’

¹³“Tüokhei sha-a numan-e ao ahngpa le hüyange ao numan-e yu, leihuyah, Youngwanpawe numan tangme ahngpa ja ange tamnang.

¹⁴Numan-e Youngwanpate nyam-e hüyange wangshüm hüolak, hüyange I shaoshanlak, hüyange Ite jailak, hüyange Iye ngaowe tampu phei tüi-e yeyonglak ne mengma-a, numan hüyange üne-o ahngpa aowe numan tangme wanglam lamnang, Youngwanpa numan Kahwang pheite woipalan ne mengma-a meiteki.

¹⁵Hüpoi numan-e Youngwanpa ngao yejailak she, hüyange Youngwanpawe ngaowe tampu ngaokhümlan phei tüi-e yonglakei she ima-a, hüwante Youngwanpa yak numan hüyange numan ahngpa phei tüi-e ngohlak.

¹⁶“Tüokhei sha-a numan ümeken me yongyange ngoh tüoken me yongtüoh, hüyange numan sheshao me Youngwanpawe hanghe linglakei tüopa toi üyongte leitüoh.

¹⁷Tenyih-a eanyu hipak (wheat tahyahpu) ne yejepu a? Hüpoi Youngwanpawe wangkhongpu hüyange wai shonlakne taowe Ite tonglak; numan-e ahngpa ja tongpu me numan-e lingpu hatüo ümeng toi üyongja she numan-e shinglak hüyange ngelak.”

¹⁸Tüokhei Samuel-e Youngwanpate yop; hüyange Youngwanpawe tüopa nyih me wangkhongpu hüyange wai shon; hüyange kahta üsheiye Youngwanpa hüyange Samuelte yeonge nyam.

¹⁹Hüyange kahta lili-e Samuel te i; “Toman yelilak jingne Youngwanpa nang Kahwang te nang shaoshanpalan jingne yoptam pha; hangjingne toman ünu üngang yo me, toman jingne ahngpa ja yupu tüopa toimenge toman-e püohyangki.”

²⁰Samuel-e kahtalante i, “Tahnyam, numan-e üting me tüopa ümeng khongkümpu lingteki; tüoyangpoi Youngwanpa pheite woipu mepu tahlüp, hüpoi numan mongjang khongküm-e Youngwanpa shaoshan tüoh;

²¹Küw yephapu yejema-a yintamne ye-okpu jajang japu kahwanglan toishao pheite lüppe tahye.

²²Youngwanpawe I min üyong jingne yoi kahta winne yetüohlak; hangjingne Youngwanpawe yoi jingne numan kahta ja ne menge tamlak monge ngohnang.

²³Üne-o ünyei ne üjingne-a numan jingne yop-e tamlak lakpu kaiye Youngwanpa phei tüi-e ünu yenyeaklak Kahwange tao tientüoh; hüpoi taowe numan lammei hüyange ütingpa me hüotam lak.

²⁴Hüpoi Youngwanpa shahate nyamtüoh, hüyange numan mongjang üsheiye ütingpa me I shaoshan tüoh; hangjingne numan jingne hangke toi üyong Iye ling teih tüoyah.

²⁵Hüpoi numan-e üne-o yelakpe yemeipu linglakei she ima-a, numan hüyange numan ahngpa moini mahlak.”