Read Konyak Naga 1 SAMUEL 13 Bible Online

1 SAMUEL 13 - Konyak Naga bible

1 SAMUEL 13

¹Saul ahngne mengwante I nyupuh wangpeng delüm ne ngoh; hüyange Iye Israel tangme wangpeng deli me ni ahngne meng.

²Saul-e I jingne Israel kahta haja lüm le; haja ni Saul phei Michmash me hüyange Bethel kahtang me ngoh yangki, hüyange hajaja-a Iha Jonathan phei Gibeah me Benjamin nokphong yikengte shon. Hüyange topu kahtalan lili Saul-e yoi yoi nyenokte shonne ye.

³Hüyange Geba me Jonathan-e Philistialan nyahpong woipa toiyangki she hüyange Philistia lan-e tüopa jai. Hüyange Saul-e kahmük khongküm pume nyawong wünge i, “Hebrewlan jaiyah!”

⁴Hüyange Israel khongkümpuwe Saul-e Philistialan nao teki she ipu hüyange üne-o Philistialan phei Israel teiyeleihupu ngoh she jai. Hüyange kahtalan Saul pheite Gilgal me jamshe shüppe jem-e ngoh.

⁵Hüyange Philistia lan-e Israellan phei hoklak jingne jamshe jem; tongtoi haja delüm; hüyange koipongpalan haja wok; hüyange kahtalan yengching nah me pheih kih-e ükhong üngang ngoh yangki, hüyange iman ong, hüyange Michmash me Beth-aven heong yekao me lak;

⁶Aope Israel kahtalan-e hang kon yekon okpe ngai, (hangjingne kahtalan wengtuh-e ngoiteiye ngoh) hüwante kahtalan iman nying nyingke kahkook me, ükook ünook me, longnyu yo me, hüyange mangkoksa me hüyange yengkok me lowemah.

⁷Hüyange ütam-a Jordan yengtien jing kaiye Gad hei Gilead kahtokte tai. Hüpoi Saulpa-a üne-o Gilgal me ngoh yangki; hüyange Iphei ngohpu kahtalan-a nyampuwe nin.

⁸Hüpoi Saul-e hipak itte tüohpu hipakte ngoishe Iye nyih nyit tan-e ngoh; hüpoi Samuel Gilgalte ye-ong; hüyange kahtalan I mepu yan-e taiye ngoh yangki.

⁹Tüokhei Saul-e i, “Ü-tangte tüome jakke toidolak yah peikei; hüyange chingmei dopulan-o peikei.” Hüyange Iye jakke dopu do.

¹⁰Iye jakke dopu dowe shopu phei jamshe, leihuyah, Samuel pei; hüyange Saul I phei hüolak jingne lüowe ngai, hüyange Ite salam pha.

¹¹Hüpoi Samuel-e i, “Nange hang ling ei?” Saul-e i, “Aope ü-mepu kahtalan yan-e taipu taowe nge, hüyange hipak ityangpu mongme nang yepei, hüyange Philistialan Michmash me iman nying nyingke khünglenge ngoh;

¹²tüokhei taowe i, ‘Sha-a Philistia lan-e ü-tangme Gilgalte peikülak, hüyange taowe Youngwanpawe mongpu mantong’; tüokhei taowe ü-nying nyingke kangne tam-e, jakke toidopu phateki.”

¹³Samuel-e Saulte i, “Nange ngapa toi lingteki; nange Youngwanpa nang Kahwang ngaowe tampu hanghepa Iye nangte lingnetam tüopa yeling; hangjingne sha-a nang ahngching Israel tangme jintepu jingne Youngwanpawe lingteiye ngohhah shepu!

¹⁴Hüpoi sha-a nang ahngching hipak yelaolak, Youngwanpawe yoi jingne I monghahpu kahta ja yamteki, hüyange Youngwanpawe I yoi kahtalan tangme woipane menglak jingne leteki; hangjingne Youngwanpawe nangte hanghe lingnetam nange yejon.”

¹⁵Hüyange Samuel yayong hüyange Gilgal mepu Benjaminlan Gibeah te onge mah. Hüyange Saul-e aoyin Iphei ngoh, tüolan kahta gho wok nanjing iyelei.

¹⁶Saul, hüyange Iha Jonathan hüyange I phei ngohpu kahtalan, Benjaminlan Gibeah me ngoh. Hüwante Philistialan Michmash me lak-e ngoh.

¹⁷Hüyange chinghahpalan Philistialan lakjing mepu ükhong lüm ne tamyange ngai; ükhong ja Ophrah yekao lamte, Shual kahmük yete lüp;

¹⁸hüyange ükhong ja Beth-Horon yekao lamte lüp; hüyange ülao ükhong ja-a phaonyu yekaote Zeboim kahjee te leiye taiye yikeng yekaote lüp.

¹⁹Sha-a Israel kahtok khongkümpu me yanteppalan yenangpe ngoh; hangjingne Philistia lan-e i, “Hebrewlan-e iman nying nyingke yanglow hei ngou yaone tamtüoh!”

²⁰Tüokhei Israellan khongkümpu kahta lili-e yoi yoi kahyeihlak hüyange kahhoklak, hüyange yoi wa, hüyange yoi yangkuih yelak jingne, Philistialan tangte lai;

²¹tüoyangpoi kahyeihlak jingne, hüyange kahhoklak jingne hüyange yangkuihlan jingne, hüyange tük jingne hüyange huhlak hinlak jingne iman me khenshang ngoh yangki. Tüopa ümee-a ngin ükhoiha ja hei ngoh yangki.

²²Tüokhei shapju nyih me Saul hei Jonathan phei ngohpu kahtalan ütam yak me-o yang yejema-a ngou yenangpe ngoh. Saul hüyange Iha Jonathan yak me hei ngoh yangki.

²³Hüyange Philistialan ükhong Michmash lamkeng tienlak jingne ong.