Read Konyak Naga 1 SAMUEL 14 Bible Online

1 SAMUEL 14 - Konyak Naga bible

1 SAMUEL 14

¹Nyih japu hipak me Saul üha Jonathan-e I ngou yang jonpa naoshe pate i, “Kei, tüo yekao me otüo yeme Philistialan wetaipalan ngohpu nyoite tümni taihah.” Hüpoi Iye Ipa te ye-i.

²Saul-a Gibeah üjeng yeme Migron me ngohpu chamuk pee phangme ngohyangki; hüyange I phei ngohpu kahta gho wok nanjing ngoh yangki.

³Hüyange Shiloh me Youngwanpa ngengpa Eli, Iha Phinehas, hüyange Phinehas üha Ichabod, Ichabod jeihei nao Ahitub üha Ahijah ngengpa phakshaoh yah yange shotte ngoh. Hüyange kahtalan-e Jonathan taitekishe yeshingpe ngoh.

⁴Hüyange Philistia wetaipalan ükhong ngohjing nyoite Jonathan onglak lamkenglan pa me tüome jayekao me longwak ja ngoh; hüyange jayekao me-o longwak ja ngohyangki. Hüyange japa min Bozez, hüyange japa min-a Seneh ngoh yangki.

⁵Longwak ja-a Michmash sheshaoye me henyip yekao me ngaiye ngohyangki, hüyange ja-a Geba sheshao yeme heong yekao me.

⁶Hüyange Jonathan-e I ngou yang jonpa naoshe te i, “Kei, hüyange tüolan shoyekhüppu wetaipalan ükhong tangte tümni onghah; aoweshing Youngwanpawe tümni jingne toilingne ok; hangjingne Youngwanpa jingne maapuwe jeyah üjingha puwe jeyah yintamlak mepu nüngneilak hango yenang;”

⁷Hüyange Ijing ngouyang jonpawe Ite i, “Nang mongjang me ngohpu khongkümpu lingtüoh; leihuyah, nang mongjang kih-e tao nang phei ngohnang.”

⁸Hüwante Jonathan-e i, “Meiteki, leihuyah, tümni-e kahtalan sheshao me linne taiye hüohah, hüyange tümni nying nyingke imante hüohah.

⁹Iman-e tümnite ‘Toman numan tangte manong manong tan-e ngohkei,’ she iman-e ima-a hüwante tümni ngohpu nyoi me tümni yepope ngohlak, hüyange iman tangte tümni ye-onglak.

¹⁰Hüpoi iman-e ‘Toman tangte ongkei,’ she hüke ima-a, hüwantepa-a tümni onglak; hangjingne Youngwanpawe iman tümni yak me phawe ngohnang, hüyange tümni jingne tüopa-a yepinlakpa ne menglak.”

¹¹Tüokhei iman nying nyingke imni moiniye Philistia wetaipalan ükhongte ngaiye hüo; hüyange Philistia lan-e i, “Leihuyah, Hebrewlan iman yoi nying nyingke lowe ngohpu ükook ünook mepu ngaiye ngohnang!”

¹²Hüyange wetaipalan ükhong kahtalan-e Jonathan hei Ijing ngouyang jonpate nyik, hüyange i, “Toman tangte ongkei, toman-e numante ülamja hüopha ning.” Hüyange Jonathan-e I ngouyang jonpate i, “Ü-phei te woikei; hangjingne Youngwanpawe iman Israel yak me phünne phawe ngoh nang.”

¹³Hüyange Jonathan-e I yak hei I yakhün phei shomme ong, hüyange I ngouyang jonpa I tokphei me woi; hüyange Jonathan-e imante shüm, hüyange I ngouyang jonpawe I tokphei me imante lükke toi.

¹⁴Tüopa üwangne shümpu me Jonathan hei I ngouyang jonpa ni-e kahtok ükamha ja mongme kahta da jaju toi.

¹⁵Hüyange Philistia lakjing me hüyange kahjee üko me, hüyange kahta üshei yo me nyam-e ninpu ngoh yangki; wetaipalan ükhong hüyange chinghahpalan, iman-o nyam-e nin; hüyange tüophei jam-e kahtok mokh po; hatüowa yawin mongpaipu-a Kahwange shonpu ne ngoh.

¹⁶Benjaminlan yikeng Gibeah me Saul yompalan-e leingoh wante, hüyange leihuyah, ükhonga mop-e yan, hüyange jaye jaye me yanpu nge.

¹⁷Hüwante Saul-e Iphei ngohpu kahta lante i, “Sha-a iye leitüoh, hüyange teman mepu ao-o taiya leihu.” Hüyange aope iman-e iyelei, leihuyah, Jonathan hei I jing ngouyang jonpa ni tüome yenangpe ngoh.

¹⁸Saul-e Ahijah te i, “Tüome Kahwang jiengjeppu ghonu-a yahpeikei.” Hangjingne Kahwang jiengjeppu ghonu tüopa hipak me Israel hayimlan phei tai.

¹⁹Hüyange aope Saul-e ngengpa phei ngaowe ngoh, Philistia lakjing me ngohpu mop popu yelakpe ünyei ngai; tüokhei Saul-e ngengpa te i, “Youngwanpa phei teitonglak hipak yenang! (Nang yak yetüoh).”

²⁰Tüophei me Saul hüyange Iphei ngohpu kahtalan jamshe jem, hüyange shapjute pei; hüyange leihu Philistia kahta lili yanglow-a yoi shümpa kaiye ngoh yangki, hüyange tüome üpong yetüopu üyong ngoh yangki.

²¹Sha-a Hebrewlan üshongpe Philistialan phei ngohpalan aoyin neikon-e ngohpu kahmük mepu iman phei lakjingte ong, hüke iman-o Saul hüyange Jonathan phei ngohpu Israellan yekao phei jam-e shei.

²²Tüokih-e Israel kahta khongkümpu aoyin Ephraim phaotang kahmük me iman nying nyingke lowe ngoh, Philistialan yanteki she iman-e jaiwante hüke iman-o shapju me iman pheite kemyüowe woi.

²³Tüokhei tüopa nyih me Youngwanpawe Israel yin; hüyange shapju-a Beth-aven linne tai.

²⁴Sha-a tüopa nyih me Israel kahtalan mongmenglak wengtuh ja ne ngohyangki; hangjingne Saul-e kahtalante jiengpu ja ange hüke i, “Kahta aohipawe wang mannyak mannyak hüyange taowe ü-nying nyingke ü-wepalante phuh manhahpe hahyinglakei, phoiwümpu shahtüoh.” Tüokhei kahta aowe-o hahyingte yejep.

²⁵Hüyange kahta lili phaote yu; hüyange tüome kahtok me zahtai jelo ngohyangki.

²⁶Hüyange aope kahtalan-e phaote yuwe ngoh, leihuyah, zahtai jelo yün-e ta; hüpoi kahta aowe-o yoi yaklan yoi jume ye in; hangjingne kahtalan-e Saul-e jiengjeppu te nyam.

²⁷Hüpoi Jonathan-e Ipawe kahtalan te ngaokhüm phawe jiengjeppu yejai; tüokhei I yak me ngohpu wongjoi üjengye-e zahtai jelo üjepte tüp, hüyange I yak I jute in; hüyange I mük hawe ngai.

²⁸Hüwante kahta yo me shejawe jan hüyange i, “Nangpawe kahtalante wongnang puphei jiengjeppe i, ‘Aohepawe tüopa nyih me hahying hahlakei, Ite phoiwümpu shahtüoh; tüojingne kahtalan towe nyaiye ngohnang.’ ”

²⁹Hüwante Jonathan-e i, “Üpawe kahmük shaoshine tamnang, leihuyah, hangke ü-mük hawe tam-e ngohnang, hangjingne taowe hatüo zahtai jelo üjingha jeppe nyüo!

³⁰Kahtalan-e iman wepalan mepu nyieyeyahpu hahhupu lili hahyange ngohshihma-a, tenyih Philistialan toipu-a hangshin yonge ngoh hah shepu!”

³¹Hüyange tüonyih iman-e Michmash mepu Aijalon ngoiye Philistialan phei hok-e nao; hüyange kahtalan yeonge towenyaiye ngohyangki.

³²Tüokhei kahta lan-e nyieye yahpulan tangte phet, hüyange nyee hei mahu, hüyange mahu ühalan yah, hüyange iman kahtok me toi; hüyange kahtalan-e tüolan-a toipu phei jam jam she iy om-e hah.

³³Hüwante iman-e Saulte hatüo hüke i, “Leihuyah, kahtalan-e iy phei jam-e hahpu kaiye iman-e Youngwanpa phei tüi-e ünu neaknang.” Hüyange Saul-e üngwün, “Numan kuhleihpalan, tenyih ü-tangme longnyu üyongja toiloi taitam tüoh.”

³⁴Tüophei me Iye ngaokeng ja phawe i, “Numan nying nyingke kahtalan yo me yantüoh, hüyange imante itüoh, ‘kahta lili-e yoi mahu hüyange nyeeha; yahyange tüome pekei, hüyange tüolan-a toitüoh hüyange hahtüoh’ hüyange iy om-e hah-e Youngwanpa phei tüi-e ünu tah om.” Tüokhei kahta lili-e yoi mahu Iphei tüoyape yahpei, hüyange tüome iman-e tüolan-a toi.

³⁵Hüyange Saul-e Youngwanpa te wümjong ja ling; hatüowa üwangpa wümjong Iye Youngwanpa te lingpune ngoh yangki.

³⁶Hüyange Saul-e i, “Teman-e Philistialan tokphei te yaning yu hah, hüyange wang manngai manngai teman-e imante shümhah, hüyange teman-e iman kahta ja nehoi tahtüoh hah.” Hüyange iman-e jan-e i, “Nangte hanghe meiye teih lingtüoh.” Hüwante ngengpawe i; “Teman-e üwangne Kahwangte tonge leihah.”

³⁷Tüokhei Saul-e Kahwangte tonge yam, “Taowe Philistia pheite laiye shümhah heiya? Nange iman Israel yak me phünne phalak jeya?” Hüpoi Kahwange tüopa nyih me Ite yejan.

³⁸Hüwante Saul-e i, “Tüome owe jemkei, numan kahta üshanglan; hüyange tüopa nyih me hanghe me ünu omyangki leihah.

³⁹Hangjingne aowe Israel yintam, tüopa Youngwanpa min me jiengjep hah; üha Jonathan me hatüo ngohyapoi, I ütingme lilak.” Hüpoi kahta khongkümpu yo me Ite janpu ja nehoi yenangpe ngoh.

⁴⁰Hüwante Saul-e Israel moilante i, “Numan jayekao me yongtüoh hüyange tao hüyange üha Jonathan tüoyekao me ngohkülak.” Hüyange kahtalan-e Saulte i, “Nangte hanghe meiye teih lingtüoh.”

⁴¹Tüokhei Saul-e i, “O Youngwanpa Israel Kahwang, hangne nange nang shaoshanpa te tenyih yejanpu? Hatüo ümeng üme ngohpu ne mengma-a yejema-a üha Jonathan me ngohpu ne mengma-a, O Youngwanpa, Israel Kahwang, Urim yahkei; hüpoi tüopa ümeng nang kahtalan Israel me ngohpune mengma-a, Thummim yahkei.” Hüyange Jonathan hei Saul ni me ngai, hüpoi kahtalan-a yin.

⁴²Hüwante Saul-e i, “Tao hüyange üha Jonathan nipa me phong yengtüoh.” (laishüm) Hüyange Jonathan te hüt.

⁴³Hüwante Saul-e Jonathante i, “Nange hanghe lingyang ki üte itehu!” Hüyange Jonathan-e Ite i, “Taowe ütingme ü-yak me ngohpu wongjoi üjuwe zahtai jelo üjingha jeppe nyüo; hüyange leitüoh, tao tüome ngohnang, tao lilak tümyange ngohnang.”

⁴⁴Hüyange Saul-e Ite i, “Nang li ne yetam ma-a Kahwange üte shütte li ne tamtüoh!”

⁴⁵Hüyangpoi kahtalan-e Saulte i, “Jonathan, aowe tüopa yinyetampu üyong ling, I li ne tamlak a? Kahwange tientüoh; Youngwanpa min me iphaning, I shang mepu shangmin ja nehoi kahtokte yeyeitam lak; hangjingne tenyih Iye Kahwang ompu phei lingyangki.” Tüokhei kahtalan-e Jonathan I yelilak jingne yintam.

⁴⁶Hüwante Philistialan tokpheite jangpu mepu Saul lak, hüyange kahtalan yoi yoi kahmük yam-e yan.

⁴⁷Sha-a aope Saul-e Israel tangme ahngching yah, Iye üshei yeme I wepalan phei tüi-e hok; Moab phei tüi-e, Ammonlan phei tüi-e, Edom phei tüi-e, Zobah ahnglan phei tüi-e, hüyange Philistialan phei tüi-e; hüyange ümpeyekao te I lüpyapeih, Iye okpu nge.

⁴⁸Hüyange Iye wongnange hok hüyange Amaleklan nehoi jange tei, hüyange neikonpu wepalan yak mepu Israellan yintam.

⁴⁹Sha-a Saul hayimlan; Jonathan, Ishvi, hüyange Malchishua ngoh yangki; hüyange yhala ni min hüke ngoh: üwangne puhpu nyu min Merab, hüyange naolinyu min Michal;

⁵⁰Hüyange Saul shekonyu min Ahimaaz üha Ahinoam ngohyangki. Hüyange I jing nyahponglan woipa min-a Saul Ipajoi Ner üha Abner ngoh yangki.

⁵¹Hüyange Saul üpa Kish ngoh yangki; hüyange Abner üpa Ner-a Abiel üha ne ngohyangki.

⁵²Hüyange Saul jin hipak khongkümpu me Philistialan phei tüi-e wemengne hok-e ngoh yangki; tüokhei aope Saul-e wong üyong pheipu kahta ütam yejema-a wongnangpu kahta ngelakei, Iye yoi jingne I-a min nyan-e yah-e ngohyangki.