Read Konyak Naga 1 SAMUEL 15 Bible Online

1 SAMUEL 15 - Konyak Naga bible

1 SAMUEL 15

¹Samuel-e Saulte i, “Youngwanpawe yoi kahtalan tangme hüyange Israel tangme ahngpa ne menglak ne nang minnga phowe lelak jingne tao shon. Tüokhei sha-a Youngwanpa ngao jaiyah.

²Hüke Ütahpa Youngwanpawe inang, ‘Amalek-e Israelte hanghe ling hüke I Egypt mepu ngaiwante Iye lamme tienpu jingne taowe Amalekte shaoshine tamlak.

³Sha-a taitüoh hüyange Amalek ching hahtüoh, hüyange iman me nangpu khongküm jaosheye nyieyeyah tüoh, hüyange iman towe tahtüoh; hüpoi netan sheko moini, naotak hüyange düam hahpalan, mahu hüyange nyee, udh hei gado toitüoh.’ ”

⁴Tüokhei Saul-e yoi kahtalan nyik-e jem, hüyange Telaim nyoi me iman iyelei, yapheipu Israel wetaipalan lakh ni hüyange Judah kahtalan haja pen ngoh yangki.

⁵Saul Amalek chingnyute pei, hüyange kahjee me dodoyange ngoh.

⁶Saul-e Kenlan te deingao phawe i, “Taitüoh, yantüoh, Amaleklan phei taowe numan mah-e tam-e ngohyalak yang; iman yo mepu numan taitüoh; hangjingne Israellan Egypt mepu ngaiwante numan-e Israel kahtalante yayeng shüpshe hüoyangki.” Tüokhei Kenlan Amaleklan yo mepu yan-e tai.

⁷Saul-e Amaleklan Havilah mepu Shur ngoipu lam paowe hok-e, Egypt heongye ngoiye nao.

⁸Hüyange Iye Amaleklan ahngpa Agag üyin me pho, hüyange yangnah phei kahtalan jaoshe mahtam.

⁹Hüpoi Saul hüyange kahtalan-e Agag, hüyange nyee shemeipulan hüyange mahu, hüyange tam-e panne angpulan hüyange nyee ühalan hüyange hanghe shemei she ngoh khongkümpu towe ang, hüyange tüolan-a jaosheye mahne yetam, hüpoi hangheyin ümengne ngoh, hüyange paowe tüklak ne ngohpulan khongkümpu mahtam.

¹⁰Youngwanpawe Samuelte ngaowe i,

¹¹“Taowe Saul ahngne menge tampu mepu Tao mong lüpnang; hangjingne ü-pheite I yewoi, hüyange Taowe ngaowe tampu ngaokeng Iye yejon.” Hüwante Samuel mongshih ngai; hüyange wangnyak phapan Iye Youngwanpate yoppe khüm-e üngwün.

¹²Hüyange Samuel ünenap shonge Saul phei hüolak jingne yayong, hangjingne “Saul Carmel te laitepu, hüyange leihu, Iye yoi jingne minyong ngampai ja lingteki, hüyange leihye-e Gilgalte laitepu” she jai.

¹³Aope Samuel Saul tangte peingoi, hüyange Saul-e Ite salam phawe i, “Youngwanpawe nangte moiman tüoh! Youngwanpawe lingne tampu taowe lingteki.”

¹⁴Hüpoi Samuel-e tonge i, “Ü nasa me nyee wao eapu hüyange mahu üpong wao eapu hanghepa taowe jainang, hatüote leppu-a hangshi?”

¹⁵Hüyange Saul-e jan-e i, “Ü-kahtalan-e Amaleklan mepu tüolan-a yahye; hangjingne Youngwanpa nang Kahwangte toidopu phalak jingne kahtalan-e nyee hüyange mahu shemeipupa towe ang; hüyange topulan-a jaosheye toman-e mah tamyangki.”

¹⁶Hüwante Samuel-e Saulte i, “Laktekei, Youngwanpawe üte minya hanghe i, taowe nangte iphaning.” Hüyange Saul-e Ite i, “Üte itehu.”

¹⁷Samuel-e i, “Nange nang mük shao me nang nying nyingke üjoiha ne teih yapoi, nanga Israel jatlan tangme üjüngpa ne yemengtam a? Hüyange Youngwanpawe nang Israel tang me ahngne menglak jingne minnga phowe le.

¹⁸Hüyange Youngwanpawe nang toishao jate shon, hüyange i, ‘Taitüoh hüyange iman khongkümpu manmahtam manmahtam iman phei tüi-e hoktüoh.’

¹⁹Hüma-a hangne nange Youngwanpa ngao yejaipu? Hangne nyieyahpu toinan yamme phet, hüyange Youngwanpa sheshao me hangne ümeng hatüo lingpu?”

²⁰Saul-e Samuelte i, “Taowe Youngwanpa ngao jaiyangki, hüyange Youngwanpawe üte hüopu lamnyu me kemyangki, hüyange Amalek ahngpa Agag pho-e pei, hüyange Amaleklan jaosheye mahne tamyangki.

²¹Hüpoi ü-kahtalan-e nyee hüyange mahu üpong shemeipupalan phei, mahlakpa toinanlan, Gilgal me Youngwanpa nang Kahwangte toidopu dolak jingne yahpei yangki.”

²²Hüyange Samuel-e i, “Youngwanpa ngao winjaipu me mongmeipu me mongmeipu shinne jakke dopu hüyange toidopu dowante Youngwanpa mongmei ngohlak a? Leihuyah, winjaipu-a toidopu phei shemeipupa, hüyange ngao jaipuwa nyeepong üyao phei nehoi shemeipupa.

²³Hangjingne hokwe yongpu-a phongyengpalan toishao kih-e ngohnang, hüyange yoiye mongpupake teih nyüolaka moungte khümpu ünu kih-e ngohnang. Nange Youngwanpa ngao yeyahpu khei Iye-o nang ahngpa ne menglak yeyah.”

²⁴Saul-e Samuelte i, “Taowe ünu jonyangki; hangjingne taowe Youngwanpa hüyange nang ngaokeng mengyangki; hangjingne taowe kahtalan te nyam hüyange iman ngao jai.

²⁵Hüpoi sha-a tüokhei taowe nangte yoppe tongnang, Ü-ünu ümeng winpha, hüyange taowe Youngwanpate khümlak jingne ü-phei Gilgalte leih yekei.”

²⁶Samuel-e Saulte i, “Tao nang phei leih yeyelak; hangjingne nange Youngwanpa ngao yeyah, hüyange Youngwanpawe nang Israel tangme ahngne menglak mepu lantam nang.”

²⁷Hüke Samuel yayonge tailak jingne lüpwante, Saul-e I yashong yeme ngengpa phakshaohte shu, hüyange hatüo hit.

²⁸Hüyange Samuel-e Ite i, “Youngwanpawe tenyih me peiye Israel ahngching hit-teki, hüyange hatüo nang yupipa nang phei shemeipu jate phateki.

²⁹Hüyange üne-o Israel Kahwang müktishiwa yephalah lak yejema-a mong yelüplak; hangjingne monglüplakne I kahta ja ne yeje.”

³⁰Hüwante Saul-e i, “Taowe ünu jonteki; tüoyangpoi taowe nangte yoppe tongnang, ü-kahtalan lwngmeilan sheshao me hüyange Israelte ü-wangshüm hüotamkhu, hüyange Youngwanpa nang Kahwangte taowe khümme oklakne ü-phei leihyekei.”

³¹Tüokhei Samuel Saul pheite nishe leihye; hüyange Saul-e Youngwanpate khüm.

³²Hüwante Samuel-e i, “Amaleklan ahngpa Agag ü-tangte tüome woiye peikei.” Hüyange Agag I tangte mongshange ninpu phei, hangkihpu ütuh phei “Ite ütingpa lipu ükha lin-e taiye lingkülak she pei.”

³³Hüyange Samuel-e i, “Nang yanglow-e shekolan naha yenangpe linge tampu kih-e hüke sheko yo me nangnyu-o naha yenanglak.” Hüyange Gilgal me Youngwanpa sheshao me Samuel-e Agag khoihnyaiye tehtoi tam.

³⁴Tüophei me Samuel Ramahte tai; hüyange Saul yoi nokte yoi ching Gibeah te tai.

³⁵Samuel-e Saul tangte I lipuwe manngoi manngoi shaaji yepei; hüpoi Samuel-e Saul jingne mangshap. Hüyange Youngwanpawe Saul Israel tangme ahngpane menge tamyangpu jingne mongmenge ngoh yangki.