Read Konyak Naga 1 SAMUEL 16 Bible Online

1 SAMUEL 16 - Konyak Naga bible

1 SAMUEL 16

¹Youngwanpawe Samuelte i, “Taowe I Israel tangme ahngne menglak yeyahpu ngejang ngeye, nange Saul jingne hangshin me mangshap lak shi? Nang minnga shengme olive minngawe maatüoh, hüyange taitüoh, Taowe Bethlehemlan Jesse tangte nang shonlak; hangjingne üjingne Taowe ahngpa ja Iha yo mepu leyange ngoh nang.”

²Hüyange Samuel-e i, “Taowe hatüo hangke linglak? Saul-e tüopa jaima-a Iye tao toikülak!” Hüwante Youngwanpawe jan-e i, “Nang phei mahu üha shenütpu ja woiyah, hüyange itüoh, ‘Youngwanpate toidopu dolak jingne tao tainang.’

³Toidolak ken me Jesse nyikyah, hüyange nange hanghe linglak Taowe nangte hüolak; hüyange ao min Taowe nangte ilakei nange I üjingne minnga phowe tamlak yang.”

⁴Youngwanpawe hangke ngaowe tam hüke Samuel-e ling, hüyange Bethlehemte wen. Hüwante chingnyu lwngmeilan I phei hüolak jingne nin nin she pongte yu, hüyange tonge i, “Nanga chingmei jingne peipu ne jeya?”

⁵Iye jan-e i, “Taowa chingmei me; Youngwanpate toidolak jingne peiye ngohnang. Numan nying nyingke jaowe shawe tümyah, hüyange ü-phei toido jingte peikei.” Hüyange Iye Jesse hüyange Ihalante jaowe shalak jingne ngaowe tam, hüyange toidojingte iman-o nyik.

⁶Aope iman pei, Samuel-e Jesse üha Eliab nge hüyange Iye teih, “Ütingme Youngwanpawe minnga phowe lepu-a I tangme ngohnang.”

⁷Hüpoi Youngwanpawe Samuelte i, “I pümta meipu yejema-a jinwangpu tahlei; hangjingne Taowe I yeyah, hüyange Youngwanpawe kahta kih-e yelei; hangjingne kahtawe ütah me leinang hüpoi Youngwanpawe mongjang hei leinang.”

⁸Hüwante Jessewe yoiha Abinadab nyik, hüyange Samuel sheshao me peine tam. Hüyange Iye i, “Tüopa-o Youngwanpawe yele.”

⁹Tüophei me Jessewe Shammah woiye peine tam. Hüyange Iye i, “Tüopa-o Youngwanpawe yele.”

¹⁰Tüokih-e Jessewe Ihalan nyit ngoiye Samuel sheshao me woiye pei. Hüyange Samuel-e Jessete i, “Youngwanpawe tüolan ao-o yele.”

¹¹Hüwante Samuel-e Jessete tonge i, “Nanghalan khongkümpu tüome ngohya?” Jessewe jan-e i, “Üne-o ükümpa towe ngohnang, hüpoi leihuyah, I-a nyee yom ngohnang.” Hüyange Samuel-e Jessete i, “Shontüoh hüyange I woipei kei; hangjingne I tüome manpei manpei teman-e toidopu yephalak.”

¹²Tüokhei Jessewe I jingne shon, hüyange I woipei. Sha-a I shopsho meiye, hüyange mükjang ümei nyimpu naoshe, hüyange leihujak-e ngoh yangki. Hüyange Youngwanpawe Samuelte i, “Yayongtüoh, hatüopa üja, Ite minnga phowe tüm-e tamtüoh!”

¹³Hüwante Samuel-e olive minnga sheng yah, hüyange I jeilan sheshao me David te minnga phowe jaowe tam. Hüwante mokhshe Youngwanpa Yaha üngan wong David tangme pei, hüyange tüonyih me peiye I phei ngoh; tüophei me Samuel Ramahte leihye.

¹⁴Sha-a Youngwanpa Yaha Saul mepu yan-e tai, hüyange Youngwanpawe ünu yaha peine tam-e I shaoshi ne tam.

¹⁵Hüyange Saul shaoshanpalan-e Ite i, “Leihuyah, sha-a Kahwange ünu yaha shonne tampu jingne nang shaoshi nang she toman-e shingnang.

¹⁶Tüokhei sha-a toman nokpupawe nang shaoshanpalan aoyin nang sheshao me ngohnang, tomante kongkilahha wünglak manpu kahta ja yamlak o-ngao yahkei. Hüyange aope Kahwange shonpu ünu yaha nangte peilakeih, hüyange Iye kongkilahha wünge tamwante nang toloimei-e tailak.”

¹⁷Tüokhei Saul-e I shaoshanpalante i, “Sha-a aowe kongkilahha meiye wünge okyapeih üjingne I yamtüoh, hüyange I ü-tangte woi peikei.”

¹⁸Hüwante naoshelan yome shejawe jan, hüyange i, “Leihuyah, taowe Bethlehemlan Jesse üha ja kongkilahha wünglak manpu kahta ja ngeyangki, hüyange I manyangpu, wongnangpu hüyange hok-e okpu kahta, toishao me khakwangpu, hüyange leihukeipu kahta, hüyange Youngwanpa I phei ngohnang.”

¹⁹Tüokhei Saul-e Jesse tangte ngaolan kipa shon, hüyange i, “Nangha David nyee yomme ngohpupa ü-tangte shonpha.”

²⁰Tüokhei Jessewe gado me an hüyange wuwüngti sheng ja phei, hüyange younpong üha ja hüyange tüolan-a Iha David phei Saul tangte tüm-e shon.

²¹Hüyange David Saul tangte peingoi, hüyange I sheshao me yong; hüyange Saul-e Ite yeonge ken; hüyange I ngouyang jonpa ne I menge tam.

²²Hüyange Saul-e Jessete hatüo ngaolan shonne i, “Taowe nangte yoppetong nang, David ü-toishao me ngoh ne tamtüoh; hangjingne ü-sheshao me Iye shüpshe tüoteki.”

²³Tüohipak me peiye, hangkih tingme Kahwange shonpu ünu yaha Saul tangme peilakeih, David-e I jing kongkilahha yah hüyange tüopa wünge tam. Hüwante ünu yaha yanne taiwante Saul ümok hümme ye, hüyange kentinge yepu okke ngoh yangki.