Read Konyak Naga 1 SAMUEL 17 Bible Online

1 SAMUEL 17 - Konyak Naga bible

1 SAMUEL 17

¹Sha-a Philistialan shapju me ponglak jingne Judah mepu Socoh hei Azekah nipa me Ephes Dammim she nyikpu nyoi jing ja me lakjing ling.

²Saul hei Israel kahtalan-o jamshe shüppe jem; hüyange Elah kahjee me lakjing ling, hüyange Philistialan phei hoklak jingne khünglenge yong.

³Philistialan kahtang me jaye kaome yong, hüyange Israellan kahtang me jaye kaome yong; hüyange iman pa me kahjee ja ngoh yangki.

⁴Hüyange Philistialan lakjing mepu naomei ja min Goliath, Gath chingnyu mepu ngai, aohepa jin daopu me yakkong wok phei me yakkam ja ngoh.

⁵I shangme shakphan yan shaoshaoh ja shaohyange, hüyange Iye shakphan yan phakshaoh shaohyange ngoh. Hüyange phakshaoh-a shakphan yan kilogram denga me nyit nanjing yihpu ngoh yangki.

⁶Hüyange I ya me yashauh, hüyange I phaktang nipa me shakphan yan ühuh pheipu ngoulow paiyange ngoh yangki.

⁷Hüyange ngoumet-a nye-takpalan lengshüm shinne, hüyange I ngoushaoh-a yan kilogram nyit nanjing yihpu ngoh hüyange ree jonpa ja I sheshao me kem.

⁸Goliath yong, hüyange Israel wetaipalante üngwün, hüyange imante i, “Hangne numan shapju me khünglenge yongne ngaipu? Taowa Philistia hüyange numan-a Saul shaoshanpalan yeje a? Numan jingne numan kahta ja letüoh, hüyange I ü-tangte pongne peine tamtüoh.

⁹Iye ü-phei hok-e okke hüyange tao toima-a, hüwante toman-a numan rhane menglak hüpoi taowe I toiyange nao okma-a numan-a toman rha ne menglak hüyange toman shaoshanlak.”

¹⁰Hüyange Philistia pawe i, “Tenyih taowe Israel wetaipalan te shapnyik nang; toman jam-e hoklakei üte numan mepu kahta ja yahkei!”

¹¹Aope Saul hüyange Israel khongkümpuwe Philistiapawe shapnyikpu tüolan ngao jai, iman mokh hüyange yeonge nyam.

¹²Sha-a David-a Judah me Bethlehem mepu Ephrathlan ja min Jesse üha ja ne ngoh; hüyange Ihalan tet ngoh yangki. I-a Saul hipak me lwngmei ne, kahtalan yo me wupa ja ne ngoh yangki.

¹³Hüyange Jesse hayim jeiyonglan lüm-a Saul pheite shapjute tai teiye ngoh; hüyange shapju te taipu Ihalan lüm min-a Eliab üwangne puhpupa, hüyange I phei mepu Abinadab, hüyange lümshepupa Shammah.

¹⁴David naokümpa ne ngoh yangki; hüyange jeiyonglan lüm-a Saul pheite woi.

¹⁵Hüpoi David-a Saul mepu ongong yeye she Bethlehem mepu ipa jing nyeelan yom-e ngohyangki.

¹⁶Philistiapa-a nyih deli ngoiye shaoyekaote ngaiye shom hei ün hipak phe me yong.

¹⁷Nyih ja Jessewe Iha David te i, “Sha-a nang jeilan jingne tüopa ngüwyang phei an kilogram pen, hüyange tüolan anbung pen yayah, hüyange tüolan-a mamshe nangjeilan lakjing te yah taitüoh.

¹⁸Hüyange tüolan düamyeng ü-oun pen haja tangme woipa tangte yahtüoh, hüyange nangjeilan hangke ngoh leitehu, iman phei hüoyangki she saki ne iman mepu ülam ja yahyange hüyange iman jeng meimei-e shing yange yekei.”

¹⁹Iman-a Saul hüyange Israel kahtalan khongkümpu phei, Elah kahjee me Philistialan phei hok-e ngoh nang.

²⁰David shomme shonge lüo, hüyange yompa ütam phei nyeelan tüoh, hüyange Jessewe ngaowe tampuke yah, hüyange tai; hüyange Israel wetaipalan shapju me khüng lenge yongyange shapju langpheng jang phenge taiye ngohwante, tienlak jingne lingpu ken ngoiye I tai.

²¹Israel hei Philistialan-e iman shapju jingne khüng lenge wetaipalan hei wetaipalan ükhong sheta teihüowe yongyange ngoh yangki.

²²Davidte I hangki-a hahyingte yakjongpa yak me tüohyange wetaipalan ükhong yote phette wen hüyange peiye Ijeilante salam pha.

²³Hüyange Iye iman phei ngaowe ngohwante, leihuyah, Gath mepu Philistia naomei Goliath, Philistia yekao mepu ngai, hüyange Iye üwang me shapnyikpu kih-e muh üngwün-e ngao, hüyange Davidte tüolan jai.

²⁴Aope Israellan-e Goliath nge, yeonge nyampu phei iman phette yanne taiye küm.

²⁵Hüyange Israel kahtalan-e i, “Ongküpu, tüopa kahta numan-e ngeya? Ütingme Israel lante shapnyiklak jingne I ongnang; hüyange aohipawe I toilakei Saul Ahngpawe I moth üyongpuwe hakpane mengetamlak hüyange Ite yoi yhala phalak, hüyange Ipa noksa Israel me ngaiphai ngoh ne tamlak she janyangki.”

²⁶I shongme yonge ngohpu kahtalan te Davidte ngaowe i, “Kahta aowe tüopa Philistia toilakei hüyange Israel mepu wüokhüwpu yahteilakei Ite hanghe linglak? Hangjingne üyin Kahwangpa wetaipalan ükhong te shapnyiklak shoyekhüppu Philistiapa tüowa ao shi?”

²⁷Kahtalan-e “Goliath toipu kahtate hangke linge tamlak,” tüopa ngao muh iye tam.

²⁸David te kahtalan phei ngaowe ngohpu Ijeiyong Eliabwe jai; hüyange David te Eliab mongshih ngaiye mah hüyange Iye i, “Nang hangne laipu? Hüyange nyee üjinghapu ükhonga phao me aohi phei nange tüohpu? Nang otapu hüyange nang mongjang peamlangpu taowe shingnang; hangjingne shapjute leilak jingne nang laiye ngohnang!”

²⁹David te i, “Taowe sha-a hanghe lingpu? Hatüowa ngao ja hei ngaopune yeje a?”

³⁰I ülao kahta ja yete lüp, hüyange hüke muh tong; hüyange kahtalan-e nishe üwangpa kih muh janpu Iye tüo.

³¹Aope David te ngaopu ngaolan ütam-e jai, iman-e tüolan ngaowa Saulte shingne tam; hüyange Iye David te nyikne shon.

³²Hüyange David-e Saulte i, “Nang üyongpa, I jingne ao-o mongshoi tahngoh; nang shaoshanpa tao tailak hüyange tüopa Philistiapa phei hoklak!”

³³Saul-e Davidte jan-e i, “Tüopa Philistiapa phei tüi-e I phei hokne tailak nang taine ye-ok; hangjingne nanga shelahaja hei ngohnang, hüyange I-a naha memuh wehok-e peipu naomei ngohnang!”

³⁴Hüpoi David te Saul te i, “Nang üyongpa! Nang shaoshanpa taowe üpa nyee yom; hüyange aope yengkong mailang ja yejema-a shapnyu ja pei, hüyange nyee ükhong mepu nyee üha ja yahtai,

³⁵tao tüopa pheite woi hüyange yengkong mailang jeyah shapnyu jeyah ü-phei pongne leih yema-a, taowe üngme phütyange shütte toiye ngoh yangki.

³⁶Nang shaoshanpawe yengkong mailang hei shapnyu moini toi; hüyange tüopa shoyekhüppu Philistiapawe üyin Kahwang wetaipalan ükhongte phoiwüm-e tamtepuwe, I-o iman yo me ja leye taowe lingtamlak.”

³⁷Hüyange David te i, “Yengkong mailang jumepu hüyange shapnyu jumepu tao yinpu Youngwanpa, Iye tao Philistialan yak mepu yinlak.” Tüokhei Saul-e David te i, “Meiteki, taitüoh, Youngwanpa nang phei ngohlak.”

³⁸Saul-e yoi oleng David te owetam, hüyange Iye I shangme shakphan yan shaoshaoh shaohtam, hüyange Iye yoi yan oleng phei owetam.

³⁹David te Saul jing ngouyang hüyange I oleng yahyange kemne ngang, hüyange jajang japute I taine ngang. Hüwante David te Saul te i, “Tao tüolan phei taine ye-ok; hangjingne taowe tüolan phei wanglam ne yemeng.” Tüokhei David te I mepu tüolan-a khok-e ang.

⁴⁰Tüophei me Iye I yak me nyeeyompa wongjoi jon, hüyange shaoha mepu long nyelehpu ütoi nga I jingne leye toon, hüyange Iye weihümpu nyeeyompa nyekhok, hüke I meisho nyekhok me hin, hüyange I yak me long shüplak longshüpwu ngohyangki; hüyange Iye Philistiapa shongte owe wen.

⁴¹Hüwante Philistiapa David shongte owe wen hüyange I ree jonpa I sheshao me kem.

⁴²Aope Philistiapawe neikonne lei, hüyange David nge, Iye Ite phoi, hangjingne I-a shelaha ja hei, hüyange pümta meipu hüyange shemei yaomapu ja nehei ngoh.

⁴³Philistiapawe David te i, “Nang ü-tangte wongjoi jonyang peilak, taowa kuiha a?” Hüyange Philistiapawe yoi kahwang minnyik-e David te phoiwüm-e ngao.

⁴⁴Philistiapawe David te i, “Ü-shongte wenkei, hüyange taowe wang awhalan hei phao yinmoklante nang mei phünne khoih-e phalak.”

⁴⁵Hüpoi David te Philistiapa te i, “Nang ü-tangte yanglow jonyange, ngou jonyange, hüyange ngou jep yahyange peinang; hüpoi taowa nange phoi tampu Israel wetaipalan ükhong Kahwang, ngangpupa Youngwanpa min me nang tangte peinang.

⁴⁶Tenyih hatüo me Youngwanpawe nang ü-yak me phünne phalak; hüyange taowe nangte shetlak, hüyange nang mepu nang shang langlak, hüyange Philistialan ükhong lipu mang taowe wang awhalante hüyange kahtoknyu phao yinmokte phalak, tüo kaiye kahtoknyu khongkümpuwe Israel, me Kahwang ja ngohnang she shinglak.

⁴⁷Hüyange tüopa shüppe jempu khongkümpuwe Youngwanpawe ngou hei yang phei yeyin ja she shinglak; hangjingne shapjuwa Youngwanpa jing ngohnang, hüyange Iye toman yak me nang phakülak.”

⁴⁸Aope Philistiapa yayonge David phei hüolak jingne owe wen, David-o mamshe wen, hüyange Philistiapa phei hüolak jingne wetaipalan ükhong yongpu yekao me David yong.

⁴⁹Davidte yoi yak nyekhokte phoh, hüyange tüopa mepu long ja okke ngai, hüyange hatüowe Ijing longshüpwu me küwyange shüppe tam, hüyange Philistiapa shekengte phuklüowe ong, hüyange longa I jelote ong; hüyange I sheta me shonge kahtokte toita.

⁵⁰Tüokhei David te Philistiapa Goliath tangme longshüpwu japhei okpu nge, hüyange Philistiapate shüp, hüyange I toi; hüpoi David yak me yanglow yenangpe ngoh.

⁵¹Hüwante David phet hüyange Philistiapa tangme yong, hüyange I yanglow teak-e yah hüyange tüopawe I üng langyange shang phünne yah. Aope Philistialan-e iman naomei kholang liteki she shinge pei, iman phette yanmah.

⁵²Hüyange Israel hei Judah kahtalan yayong, hüyange üngwün, hüyange Philistialan pheite Gath hüyange Ekron peten manngoi manngoi jange tai. Tüokhei mayah yangpu Philistialan Shaaraim lampaowe Gath hei Ekron ngoiye üngang ngoh yangki.

⁵³Israel kahtalan Philistialan tokpheite jange taipu mepu leihye hüyange iman-e iman lakjing mengetam.

⁵⁴Hüyange David-e Philistiapa shang yah, hüyange hatüo Jerusalemte yahpei; hüpoi Iye I ngouyang I nyenok me tüoh.

⁵⁵Aope Philistiapa Goliath phei hoklak jingne David taipu Saul-e nge, Iye Abner wetaipalan woipate i; “Abner, tüopa naoshe-a ao nok naoshe shi?” Hüyange Abnerwe jan-e i, “Nang üyongpa, taowe ine ye-ok.”

⁵⁶Saul ahngpawe ngaophawe i, “Naoshepa-a ao nok ha-nao weih nange tonge leitüoh.”

⁵⁷Hüyange Philistialan toipu mepu David leih yewante, Abnerwe I woiye pei, hüyange I Saul sheshao me I yak me Philistiapa Goliath shang jonyange woipei.

⁵⁸Saul-e Ite i, “Shemei, nang ao ha shi?” Hüyange David te jan, “Taowa Bethlehempa nang shaoshanpa Jesse üha ngohnang.”