Read Konyak Naga 1 SAMUEL 18 Bible Online

1 SAMUEL 18 - Konyak Naga bible

1 SAMUEL 18

¹Aope Saul hei David ni teingaopu sho, hüke Saul üha Jonathan yaha David yaha phei ja ne meng, hüyange Jonathan-e yoi üyin kih-e Ite ken.

²Tüonyih me peiye Saul-e David yah, hüyange shaaji Ipa nokte yene yetam.

³Hüwante Jonathan-e David phei üküm yenangpe yephünpe ngohlak jiengjeppu ja ling; hangjingne Iye Ite yoi kih-e ken.

⁴Jonathan-e Ime ngohpu oleng khok, hüyange hatüo Davidte pha, hüyange I oleng, I yanglow, hüyange Ijing weanglah, hüyange I shienghit me lin-e pha.

⁵Hüyange Saul-e ümeken yekao me David I shonne tei, tüokente tai hüyange üshei me okpu nge; tüokhei Saul-e I-a wetaipalan tangme woipa ne mengetam. Hüyange hatüowa kahta lili sheshao me, hüyange üne-o Saul shaoshanpalan sheshao me meipu ne ngohyangki.

⁶Hüke Philistialan toiyange David leih yewante hüyange wetaipalan yoi yoi nokte yewante, Israel ahngching üshei yekao mepu shekolan-e hemlok-e hüyange polok-e Saul ahngpa pongte pheamkao hei kongkilahha phei mongmei puwe hem lok-e hüyange kongtoilan phei ngai.

⁷Hüyange shekolan-e iman hoongli mongong puphei shejawe shejate hüke hem me teinyüo: “Saul, Iye haja toi, hüyange Davidte haja pen toiyangki.”

⁸Tüopa ngaowe tampu jingne Saul mongmengne tam; hüyange I yeonge mongshih ngai; hüyange Iye i, “Iman-e Davidte haja pen pha, hüyange iman-e üte haja ja hei pha; hüyange ahngching tokte kaiye üne-o Iye hanghe ngohlak!”

⁹Tüopa nyih me wange Saul-e David te müktak-e wang.

¹⁰Üne nyih Youngwanpa mepu ünu yaha Saul tangte wongnange pei, hüyange David, nyihjeih she Iye lingpuke I yak-e kongki ümtük wünge ngohwante noksa me Iye yepah yewaipu nga ngao ja ngao; hüyange Saul yoi yak me ngou ngoh yangki;

¹¹hüyange Saul-e ngouwe lütte tam; hangjingne Iye i, “Taowe hüke David jant me neak-e ngouwe lütte tamlak; she ngaoyange ni me lütte tam.” Hüpoi lütpu lep iye Davidte ni me kawin.

¹²Saul, David shaote nyampu ngohyangki, hangjingne Youngwanpa David phei ngoh, hüpoi I mepu-a yanne tai.

¹³Tüokhei Saul-e I shong mepu I teinetam, hüyange haja tangme I woipane mengetam, hüyange kahtalan sheshao me Iye taitai yeye she ngoh.

¹⁴David-e Ite nyinge tampu toishao lili me okpu nge; hangjingne Youngwanpa I phei ngoh yangki.

¹⁵Aope Iye yoi nying nyingke konnange jonnang she Saul-e shinge ok, Iye Ite nyampu phei yong.

¹⁶Hüpoi Israel hüyange Judah khongkümpuwe David te ken; hangjingne iman sheshao me I-a okkeshangpu woipa ja ne ngoh.

¹⁷Saul-e David te i, “Üha nyayongnyu Merab tüome ngohnang, yha nangte shekonyu ne menglak jingne taowe yahpha ning; üjingne wong ünyei nangyah, hüyange Youngwanpa wehok hoktüoh.” Hangjingne Saul-e i, “I tangme ü-yak minhüng ngoh; hüpoi Philistialan yak-e Ite hüngtam shih!”

¹⁸David-e Saul te i, “Tao ahngpa mata ne menglakne Israel me tao ao shi? Hüyange ü-üyin-o ye-i-ma-a tenok noksalan-o hangkihpu?”

¹⁹Hüpoi aope Saul-e Merab David te phalak jingne hipak ngoiyapeih, yha-a Meholalan Adriel tepahi sheko ne menglak jingne phawe sho.

²⁰Sha-a Saul üha Michal-e David te leng; hüyange iman-e Saulte ngaine tam, hüyange I mongmei.

²¹Saul-e teih, “I jingne Michal-a tün ja ne ngohlak, hüyange Philistialan yak I phei tüi-e ngohlakne taowe Ite yha phalak.” Tüokhei Saul-e nishe David te i, “Nang tenyih ü-mata ne menglak.”

²²Saul-e I shaoshanpalante o-ngao phawe i, “David phei noksa me teingaotüoh hüyange itüoh, ‘Leihuyah, ahngpawe nangte mongmei nang, hüyange I shaoshanpalan khongküm puwe Ite ken nang, tüokhei sha-a ahngpa mata ne mengtüoh.’ ”

²³Tüokhei Saul shaoshanpalan-e tüolan ngaowa David nasa me ngaowe tam. Hüyange Davidte i, “Tao toiha kahta ja she ngeyange, ahngpa mata ne menglaka numan sheshao me-a olohpu kih-e hüyange tanwaak-e teih nangkü a?”

²⁴Saul shaoshanpalan-e Ite, “Hüke David-e ngao she i-e tam.”

²⁵Hüwante Saul-e i, “Hüke numan-e David te ilakyang, ‘Ahngpawe yha mee ne hango yeyahlak, hüpoi Philistialan jupeng üjusho gho ja ahngpa wepalan phuh hahlak jingne yahhunang.’ ” Sha-a Saul-e David Philistialan yak me inne tamhupu ngoh.

²⁶Aope Saul shaoshanpalan-e tüolan ngao David te i, tüowe ahngpa mata ne mengpu oklak yang she David mongmei ne tam. Tüokhei itpu nyih hipak manlinpe,

²⁷Davidte yoi kahtalan yahyange yayong hüyange tai, hüyange Philistialan gho ni ngoiye toi; hüyange David te iman jing jupeng üjusho yahpei, hüyange I nying nyingke ahngpa mata ne menglak ahngpa jingne imante wangman-e i-e pha. Hüyange Saul-e yoi yhala Michal shekonyu ne menglak jingne David te pha.

²⁸Aope Youngwanpa David phei ngohnang she Saul-e meimeiye nge hüyange shing; hüyange Saul yhala Michal-e Ite ken she nge,

²⁹Saul yelakpe ünyeine David te nyam. Tüokhei yelakpe Saul David wepa ne meng.

³⁰Tüophei me Philistia ahnghalan yelakpe ngai hüyange hok; hüyange hangshin me iman ngai, teshin-e David te Saul shaoshanpalan üshei phei shenyei she okpu nge; tüokhei I min yeonge ütahpa ne meng.