Read Konyak Naga 1 SAMUEL 19 Bible Online

1 SAMUEL 19 - Konyak Naga bible

1 SAMUEL 19

¹Saul-e Iha Jonathan hüyange I shaoshanpalan khongkümpute Iye David toilak jingne tümnang she ngao. Hüyangpoi Saul üha Jonathan-e David te yeonge monghahwe kenpu ngoh.

²Jonathan-e David te hatüo hüke i, “Üpa Saul-e nang toilak jingne yamnang; tüokhei sha-a taowe nangte yoppe tongnang, nang nying nyingke ngainap-a kentinge ngohyah, hüyange ye-ngelak ken me ngohtüoh, hüyange nang nying nyingke lowe ngohtüoh.

³Tao nang ngohjing kahko me taiye üpa phinme yonglak, hüyange taowe nang jeng üpa phei ngaolak hüyange taowe ülamja jaima-a, taowe nangte ilak.”

⁴Jonathan-e Ipa Saulte David meipu jeng saki phawe ngao, hüyange Ite i, “Ahngpawe yoi shaoshanpa David phei tüi-e ünu jonne tahtam, hangjingne Iye nang phei tüi-e ünu yejon, hüyange I toishao nang yekaoma-a mei-e ngohnang.

⁵Hangjingne Iye yoi üyin phünne phawe Goliath toiyangki, hüyange Philistialan phei hok-e nao, hüyange Youngwanpawe Israel khongkümpu jingne okpu üyong phatam. Hüyange hatüo nange ngeyangki; hüyange mongmei yangki. Hüma-a hangko yesheipu te David toilak hüyange ümeng yenangpu iy phei tüi-e ünu jonlak a?”

⁶Saul-e Jonathan-e ngaopute jai hüyange Saul-e hüke jiengjep, “Youngwanpa üyin me ngohtepuwe, I li ne yetamlak.”

⁷Tüokhei Jonathan-e Davidte nyik, hüyange tüolan khongkümpu Jonathan-e Ite ngaowe tam. Hüyange Jonathan-e David Saul tangte woi pei, hüyange üshongpukih muh David te I sheshao me ahngpa shaoshan-e ngoh yangki.

⁸Nishe Philistialan phei wehokpu ngai, hüyange David tai hüyange Philistialan phei hok, hüyange iman üngang toi; hüyange I sheshao mepu iman yan.

⁹Nyih ja üne-o Youngwanpa mepu ünu yaha Saul tangme peingoi; hüyange Saul-e yoi yak me ngou jonyange Inok me shotte ngoh yangki, hüyange David-a I yak me kongkilahha jonyange wünge ngoh yangki.

¹⁰Saul-e ngouwe David te jant me neak-e honge tamlak jingne lüttetam. Hüpoi David khuh tateiye yeshah, ngou-a jant me hong. Hüyange David phette tai, hüyange tüoya-a taipu okke yinyangki.

¹¹Tüoya muh David tan-e ngohlak hüyange napning I toilak Saul-e ngaolan kipalan David nokte shon. Hüpoi David shekonyu Michal-e Ite hatüo hüke i, “Nange nang üyin teya yeyinküma-a ngainyih-a nanga lilak.”

¹²Tüokhei Michal-e tawo kaiye David nowe shonne tei hüyange I tai, hüyange phette taiye yinpu ok.

¹³Michal-e kahyak ja yahpei hüyange hatüo shinleng me shinne tüoh, hüyange youn min pheipu shangje ang, hüyange tüopa tangme inkhek-e inyange tüoh.

¹⁴Aope Saul-e yoi kahtalan David yahlak jingne shon, yhawe i, “I dak-e ngoh nang.”

¹⁵Hüyangpoi Saul-e yoi kahtalante hatüo hüke i-e David te leilak jingne shon, “I shinleng me nowe tüome yah peikei, taowe I toilak.”

¹⁶Aope ngaolan kipalan noksate ong, leihuyah, kahyak-a shinleng me youn min pheipu shangje üshangyeme angyange ngoh.

¹⁷Saul-e Michalte i, “Hangne nange tao hüke lowelamne tampu, hüyange I taiye oklakne ü-wepa taine tampu?” Hüyange Michal-e Saulte jan, “Iye üte i, ‘Tao taine tam pha; tao yeyintam ma-a taowe nang toilak.’ ”

¹⁸Sha-a David phette tai, hüyange yinne ok, hüyange Ramahte Samuel tangte pei, hüyange Ite Saul-e lingpu khongkümpu i, hüyange I hüyange Samuel tai hüyange Naioth me ngoh.

¹⁹Hüyange tüopa jeng Saulte hatüo hüke i, “Leihuyah, David Ramah me Naioth me ngohnang.”

²⁰Hüyange Saul-e ngaolan kipalan David woiye peilak jingne shon; hüyange aope hipa ükhonge hüyange iman tangme Samuel woipa ne mengyange hi-ngao itte ngaopu polok-e iman-e nge, Kahwang yaha iman tangme-o pah, hüyange imane-o hi-ngao itte i.

²¹Hüyange aope hatüo Saulte i, Iye ülao ngaolan kipalan üngang shon hüyange imane-o itpu ngao iye ngao, hüyange üne-o lüm shepupa Saul-e ngaolan kipalan shon, hüyange imane-o hüke muh itpu iye ngao.

²²Hüwante I yoi nying nyingke üne-o Ramahte tai, hüyange Secu me ngohpu yengnung üyong nyoite pei; hüyange Iye tong hüyange i, “Samuel hüyange David ümeken me ngoh nangki?” Hüyange jawe i, “Leihuyah, iman Ramah me Naioth ching me ngohnang.”

²³I Ramah me ngohpu Naioth yekaote tai, hüyange Kahwang yaha I tangme-o pei, hüyange I yelakpe Ramah me ngohpu Naioth te manpei manpei hi-ngao itte polok-e tai.

²⁴Iye-o yoi nyemo khok-e ang, hüyange Iye-o Samuel sheshao me hi-ngao itte ngao, hüyange tüopa nyih lao hipak hüyange tüoya phapan pümkeng me lamyange ngoh. Tüokhei iman-e i, “Hipalan yo me Saul-o ompu a?”