Read Konyak Naga 1 SAMUEL 2 Bible Online

1 SAMUEL 2 - Konyak Naga bible

1 SAMUEL 2

¹Hüyange Hannahwe yop, hüyange i, “Youngwanpa me ü-mongjang nowe in-e tam-e ngohnang; Ü-wong Youngwanpa me nowe in-e ngohnang. Ü-ju ü-wepa tangme eppe ngohnang, hangjingne nange yin-e tampu me tao mongmei nang!”

²“Youngwanpa kih-e ao-o üjaopa yenang, nang tokte kaiye ao-o yenang; toman Kahwang kihpu Longnyu hango yenang.”

³Shaaji yeonge otawe tahngao, nang ju mepu otamaohe ngao ngaine tahtam. Hangjingne Youngwanpa-a khongküm shingpu Kahwang ngoh nang, hüyange I me toishaolan tok-e leinang.

⁴Wongnangpalan jing wenglah menge ngohnang; hüyange aoyin yashah hüo iman wongnange shienghit yange ngohnang.

⁵Aoyin maawe ngoh, iman nying nyingke hahying jingne nanne tam; hüpoi aoyin seanyaowe ngoh seanyaopu lak-e mah. Ükengnyuwe nyit ngoiye puh, hüpoi naha maawe ngohpalan yenangpe ta.

⁶Youngwanpawe toinang hüyange üyin ne menge tamnang; Iye yimchingte yah tainang, hüyange yah ngaitam nang.

⁷Youngwanpawe toiha ne linge ngainang, hüyange hakpa ngai tamnang; Iye yeitam nang, üne-o Iye nowe intam nang.

⁸Iye tüpla mepu toihalan loinang; Iye nyinha yafün mepu ye-ok yeshangpalan nowe innang. Ahnghalan phei iman shottamlak jingne, hüyange minyong ngampai mothlei lak jingne! Hangjingne kahtoknyu shongnyu lan-a Youngwanpa jing ngoh nang, hüyange iman tangme Iye kahtoknyu kiye tüoh.

⁹“I jing üjaolan ya Iye yom-e ngohlak; hüpoi ümenglan-a wangnyak me winne tüohlak. Hangjingne wong shaha phei kahta aowe-o okpu ye-ngelak.

¹⁰Youngwanpa phei tokteipalan khoih nyaiye menge tamlak; iman phei tüi-e Iye wang me wangkhong lak. Kahtoknyu ükümlan Youngwanpawe ngao phünlak; hüyange Iye I ahngpate wong phalak, hüyange Iye leye ngaipu wong yonge tamlak.”

¹¹Hüyange Elkanah Inok Ramahte ye mah. Hüpoi naha-a Eli ngengpa shongme Youngwanpa shaoshan.

¹²Sha-a Eli hayimlan-a jajang japu kahtalan ne ngoh; iman-e Youngwanpa yeshing.

¹³Aope kahta jawe toiyange dopu phalakei, kahta phei ngengpa wanglam hatüo ngoh yangki; ngengpa pheite woipu ja, mei hong jang honge ngohwante I yak me üphat lüm pheipu tüpshan jonyange peilak,

¹⁴hüyange Iye hatüo meisheng me yejema-a tük-ha me yejema-a yantük me yejema-a hoitük me tüppe tamlak; tüpshan-e tüppe yahpu khongkümpuwa ngengpawe hah. Shiloh me Israellan peipu khongküm pute iman-e hüke ling.

¹⁵Tüotokte üyao-a manjanpe, ngengpa shaoshanpawe toipu dopu phapa kahtate ilak, “Ngengpa jingne ngüwlak mei yahkei; hangjingne Iye nang mepu yangyang phei mei yeje, hüpoi ühüng hei yahlak,” she tongpu ngoh.

¹⁶Hüyange aope kahtapawe Ite, “Iman-e üwangne üyao jaklak, hüyange tüophei me nange lengpupake yuyah,” she ima-a, hüwante Iye i, “Yeje, nange üte hatüo sha-a phalak wongpong, hüke yephama-a hatüo taowe nyieye yahlak she kang.”

¹⁷Hüke Eli hayim naoshelan ünu-a Youngwanpa sheshao me loi-e ngohyangki; hangjingne kahtalan-e Youngwanpate dopute yaoweleye tam.

¹⁸Samuel-e Youngwanpa sheshao me naha memuh ngengpa phakshaoh shaohyange shaoshan.

¹⁹Üne-o Inyuwe Ite ngeng-ahng phakshaoh üjoi ja linge tamlak, hüyange yha netanpa phei wangpeng lep iye jakke dopu dolak jingne yha ongwante, yhawe hatüowa wangpeng phe me innetam.

²⁰Hüyange Eli-e Elkanah hei shekonyu ni moiman tam, hüyange i, “Youngwanpa jingne phatepuwe, Youngwanpawe tüopa sheko kaiye nangte üli ngaitam shih.” Tüophei me iman yoi nokte leihye.

²¹Hüyange Youngwanpawe Hannah moiman tam hüyange yha püm yekengpe ngai, hüyange netanha lüm hüyange sheko ni puh. Hüyange naha Samuel Youngwanpa sheshao me jong.

²²Sha-a Eli yeonge wupa ne meng; hüyange Israel khongkümpute Ihalan-e lingpu, hüyange hangke khümjing nyenok tafün shongme shaoshannyu shekolan phei iman-e phwngngampu jon, khongkümpu Iye jai.

²³Tüokhei Iye imante i, “Hangne numan-e tüokihpu toi lingpu shi? Hangjingne numan-e ümeng lingpu lili, tüolan kahta khongkümpu mepu taowe jainang.

²⁴Tüopa mepu laktüoh, ühalan; hangjingne taowe jaipu ngaolan hatüowa meipu yeje numan-e Youngwanpa kahtalan ngaokhüm mengtam nang.

²⁵Kahta jawe sheja phei tüi-e; ünu lingma-a Kahwange I yinne tampu oklak; hüpoi kahta jawe Youngwanpa phei tüi-e ünu om ma-a, aowe I jingne yoppe tonglak?” Tüoyangpoi iman-e iman üpa ngao yejai, hangjingne Youngwanpawe iman toilak jingne mongteiye ngoh yangki.

²⁶Sha-a naha Samuel Youngwanpa hüyange kahtalan moini mepu shüpshe tüowe yelakpe jong.

²⁷Hüyange Kahwang kahta ja, Eli tangte pei, hüyange Ite i, “Hüke Youngwanpawe inang, ‘Taowe nangpa nokte iman Egypt me Pharaoh nokme rhapa ne menge ngohwante ü-nying nyingke ütahte ngai.

²⁸Israel jatlan khongkümpu mepu ü-ngengpa ne menglak, ü-wümjong te peilak, sünyet jaklak, ü-sheshao me ngengpa phakshaoh yahlak taowe I yelepu a? Hüyange Israel kahtalan-e vün kaiye dopu khongküm taowe nangpa noksalante pha.

²⁹Hüma-a hangne üte jakke dopu hüyange üjing wümjong me hanghepa taowe ü-nyoi phawe angnang, numan-e yawe loknang ü-kahta Israel dopu khongküm shemei pupawe numan nying nyingke nütlak jingne, nang hayim ü-tokte kaiye wangshüm hüone tampu?’

³⁰Tüokhei Youngwanpa Israel Kahwange inang, ‘Taowe ütingme nenok noksa hüyange nangpa noksate jinte ü-sheshao me kemlakyang she i’; hüpoi sha-a Youngwanpawe inang, ‘Hatüo ü-mepu yeonge jaiye yantam tüoh, hangjingne, ü-wangshümte nyampalan jingne Taowe wangshüm hüolak hüyange üte phoi wümpalante Taowe nyoishe ye-i-yeshelak.

³¹Leihuyah nenok me lwngmei ja nehoi yengohlak ne Taowe nang yalah hüyange nangpa noksa yalah lange winlak nyih hipak peinang.

³²Hüyange Israelte moiman phawe tampu khongküm pume nange waowe shange ponge leilak; hüyange nenok me jintepu jingne lwngmei ja nehoi yengohlak.

³³Hüyange nang kahta ao Taowe üjing wümjong mepu lange yewinpe ngohlakei, I-a nang mük menge tamlak ne ngohkülak; hüyange nenok me ngaipu khongkümpu iman kahta yak me onge kümlak.

³⁴Hüyange nangha ni Hophni hüyange Phinehas ni tangme ngailakpa hatüowa nang jingne füo ja ne ngohlak; nyih ja mongme imni moini lilak.

³⁵Hüyange ü-jingne taowe monghümpu ngengpa ja, ü-mongjang me hüyange ü-kenmong me ngohpu ke linglak ne ngaitamlak hüyange Taowe I jingne nokphong wongnangpu ja linge tamlak; hüyange Iye jintepu jingne minnga phowe Taowe lepu tangme kemlak.

³⁶Hüyange hatüo hüke ngailak, hüke nang nok me towe tüohpu liliye peilak hüyange Iye ngin üjingha hüyange an ja jingne Ite ümme khümlak, hüyange ilak, “Taowe nangte yoppe tongnang, hüke taowe ankhüo ja nehoi hah oklak ne, ngengpa toishao ja me tao angtam khu.” ’ ”