Read Konyak Naga 1 SAMUEL 20 Bible Online

1 SAMUEL 20 - Konyak Naga bible

1 SAMUEL 20

¹Ramah me Naioth mepu David phette tai, hüyange Jonathan sheshao me pei-e i, “Taowe hanghe lingpu? Taowe hanghe ümeng ompu? Hüyange nangpawe ü-üyin yamlak ne I sheshao me ü-ünuwa hangshi?”

²Jonathan-e Ite i, “Nang lilak she ipu mepu Kahwange tientam tüoh! Leihuyah, üyong jeyah üjoi jeyah üpawe üte shingne yetampe hango yelingja; hüyange hangne üpawe tüopa toishao ü-mepu lowe anglak? Hatüo hüke yeje.”

³Hüpoi David te meimei-e jan-e i, “Nang sheshao me taowe shüpshe tüowe ngohnang she nangpawe meimei-e shingnang hüyange Iye inang, ‘Jonathan mongmenge ngohya lakyang hatüowa Ite shingne tahtam.’ Hüpoi ütingme, Youngwanpa üyin ngohtepuwe hüyange nang min me iphaning, Tao hüyange lipupa nipa me ya-kai ja hei ngohnang.”

⁴Hüwante Jonathan-e David te i, “Hangheyin nange ilakei, taowe nang jingne linglak.”

⁵Davidte Jonathan te i, “Leihuyah, ngainyih-a lela mo ngohnang hüyange tao ahngpa phei nükhahpu nyoi me yeshotpe yengoh hah shepu! Hüpoi lümshepupa nyih ünpong manngoi manngoi tao kahko me lowe ngohlak jingne tao taine tampha.

⁶Ütingme nangpawe hahyingwante tao ye-nge ma-a, hüwante itüoh, ‘Davidte üte imching Bethlehemte mamme tailak jingne yeonge yop-e tong; hangjingne noksa kahtalan khongkümpu jingne tüome wangpeng lep iye toidopu ngohnang.’

⁷‘Meiteki!’ she Iye ima-a, nang shaoshanpa toloimeipu ngohlak; hüpoi I mongshih ngaiye ngohma-a, hüwante iye ümengpa teih-e ngohnang she shingyah.

⁸Tüokhei nang shaoshanpa phei shüpshe phei ngaopha; hangjingne nange nang phei nang shaoshanpa Youngwanpa jiengjeppu tangte ongne tamyangki; hüpoi üme ümeng ngohma-a nang nying nyingke tao toipha; hangne nange tao nangpa tangte woipeilak shi?”

⁹Jonathan-e i, “Nang hüke aope-o yejelak; hangjingne ütingme nang tang me üpawe ümeng linglak monge ngoh nang she taowe shingma-a, hüwante taowe hatüo nangte ye-ilak a?”

¹⁰Hüwante David te Jonathante i, “Hüke nangpawe mongshih ngaiye nangte janyapoi, aowe üte ilak?”

¹¹Jonathan-e David te jan i, “Kei, tümni-a kahyete taihuhah.” Hüyange imni kahko yete tai.

¹²Hüyange Jonathan-e David te i, “Youngwanpa Israel Kahwang saki ne mengpha! Aope tüopa hipak ja me ngainyih yejema-a lümshepupa nyih me üpate toklakei, leihuyah, David yekaote meiye ngohma-a, hüwante taowe nang tangte shonne hatüo nangte shingne yetamlak a?

¹³Hüpoi üpawe nang te ümengpa jonma-a, hüyange nang toloimei me tailakne, taowe hatüo nangte shingne yetampe nang shonne teima-a, Youngwanpawe Jonathante hüke hüyange ünyei nehoi jontam tüoh; hüyange hangke üpa phei ngoh, hüke muh Youngwanpa nang phei ngohtüoh.

¹⁴Hüyange üne-o tao üyin me ngohma-a, Youngwanpa mepu ütingpa kenpu üte hüopha; hümme nakshih tao yelilak;

¹⁵hüyange nange jinte tenok mepu nang yayeng shüpshe lange tahwin. Kahtok nopu mepu Youngwanpawe David wepalan kahta lili lange manwin manwin,

¹⁶David nokli mepu Jonathan min lange tahwin. Hüyange Youngwanpawe David wepalante phuh hahtam shih.”

¹⁷Hüyange Jonathan-e David te Iye kenne ngohpu jingne nishe jiengjepne tam; hangjingne Iye yoi üyin kih-e Ite ken.

¹⁸Jonathan-e Ite i, “Ngainyih lela mo ngohnang; hüyange nang ye-omlak, hüyange nang shotjing ükeng ngohlak.

¹⁹Hüyange lümshepu nyih me nang yenangpu-a üko ngailak, hüyange aope tüopa jeng üshemme ngohlakei, hüwante nang nying nyingke lowe ngoh yangpu nyoite taitüoh, hüyange Ezel long jayekao me lowe ngoh tüoh.

²⁰Hüyange taowe ülam jate keppu jaleye, tüoye kaote taowe lahhan lüm me kep phaning.

²¹Hüyange leihuyah, ‘Taitüoh hüyange lahhan yamtüoh,’ she iye taowe ü-shaoshanpa shonlak. Taowe shaoshanpa te ‘Leihuyah, lahhan-a nang yekao me ngohnang, yahyekei,’ she ima-a, hüwante ngaikei; hangjingne Youngwanpa ngohtepuwe nang jingne chingmei ngohnang, shaoshi hango yenanglak.

²²Hüpoi taowe shaoshanpate, ‘Leihuyah, lah han-a nang kaiye taiye ngohnang,’ she ima-a; nang lamte taitüoh, hangjingne Youngwanpawe nang shonne teinang.

²³Hüyange tümnipa me teingaopu jingne-a, hüowü tümnipa me Youngwanpa jinte ngohnang.”

²⁴Tüokhei David yoi nying nyingke kah me lowe ngoh; hüyange aope lela mo ngoiye ngoh, ahngpawe hahyinglak jingne shot.

²⁵Ahngpawe ülao hipak kih-e, hüke jant shongme shotjing tangme yoi shotjing me shot; I shongme Abner shot, hüyange Jonathan-a Iphei janhüowe shot. Hüpoi David nyoijing ükeng me ngoh.

²⁶Tüoyangpoi, tüopa nyih me Saul-e hango ye-i, hangjingne Iye teih, “Ime ülamja ngai ngohne ok, I yejao, ütingme I yejao.”

²⁷Hüpoi lela mo linyang phei me üne nyih-o David shotjing ükengme ngoh. Hüwante Saul-e Iha Jonathante i, “Hangne Jesse üha menyih-o tenyih-o hahne yepeipu?”

²⁸Jonathan-e Saulte jan-e i, “Davidte üte Bethlehemte tailak jingne yeonge yoppe tong.”

²⁹Iye i, “Taowe nangte yoppe tongnang, tao taine tampha; hangjingne tenok noksawe chingnyu me toidopu ja ngohnang; hüyange üjeiye tüome omlak jingne üte nyik. Tüokhei sha-a, taowe nangme shüpshe tüoma-a tao taine tamkhu, taowe nangte yoppe tongnang; Hüyange üjeilante ngene tamkhu! Tüojingne I ahngpa khao me yepei.”

³⁰Hüwante Jonathan te Saul mongshih ngaipu loi, hüyange Iye Ite i, “Nang yejepu lamte taipu ngao yejaipu sheko ha, nang yoi wüotüolak hüyange nangnyu ngohpu wüotüo tamlak jingne Jesse üha nange le she taowe yeshingpu a?

³¹Hangjingne Jesse üha kahtok me ngohpu mongme, nang yejema-a nang ahngching yetüoh phalak; tüokhei sha-a shontüoh hüyange I woiye peikei, hangjingne I ütingme lilak!”

³²Hüwante Jonathan-e Ipa Saulte jan, hüyange Ite i, “Hanghe jingne I li ne tamlak? Iye hang lingpu?”

³³Hüke iwante, Saul-e I toilak jingne Ite ngou lütte tam; tüokaiye Jonathan-e Ipawe David toilak jingne mongteki she shing.

³⁴Tüokhei Jonathan yeonge mongshih ngaiye khao mepu yayong, hüyange lela mo ni shepupa me hahying hango yehah; hangjingne Iye David jingne mongmeng, hangjingne Ipawe Ite wüolakne ling.

³⁵Üne nap David phei teingaopu hipak me Jonathan-e phaote tai, hüyange Iphei naha ja woi.

³⁶Hüyange Iye nahate i, “Phettüoh, taowe kepyangpu lahhanlan yamtüoh.” Hüyange naha phette taiwante, Iye I tokphei me lahhan ja I kaiye keppe tei.

³⁷Hüyange aope Jonathan-e keppe winpu lahhan ngohjing nyoite naha ngoi, Jonathan-e naha tokphei me üngwün hüyange i, “Lahhan-a nang kaiye taiye yenangpu a!”

³⁸Hüyange Jonathan-e naha tokpheite üngwün, “Mamtüoh, mam mamshe taitüoh, yongyange tahngoh.” Tüokhei Jonathan nahawe lahhan-a toonne I nokpupa tangte ye.

³⁹Hüpoi nahawe tüopa jeng hango yeshing; Jonathan hüyange David niye hei ngao-a shing.

⁴⁰Hüyange Jonathan-e yoi ngouyang I pheipu nahate phayange i, “Yetüoh, tüolan-a chingnyute yah yetüoh.”

⁴¹Hüyange naha yepuphei jamshe David heongyekao longphang mepu ngai, hüyange I sheta kahtokyete khuhyange lümme I nying nyingke khüm, hüyange imni om teihüp, hüyange shap; hüpoi ünyei ne üngwün-e David shap.

⁴²Jonathan-e David te i, “Chingmei me taitüoh, hangjingne teman tümni moini Youngwanpa min me jiengjeppe teingaowe ngohnang, ‘Youngwanpa, tao hei nang nipa me hüyange ü-huheiha hüyange nang huhanipa me jinte ngohtüoh.’ ” Tüophei me David yayong hüyange yanne tai; hüyange Jonathan chingnyu te ye.