Read Konyak Naga 1 SAMUEL 21 Bible Online

1 SAMUEL 21 - Konyak Naga bible

1 SAMUEL 21

¹David Nob yam-e Ahimelech ngengpa tangte pei; hüyange David phei hüolak jingne Ahimelech nin-nin she pei, hüyange Ite i, “Hangne nang shaha, hüyange nang phei kahta ao-o yenang a?”

²Davidte Ahimelech ngengpate i, “Ahngpawe üte toishao ja tam, hüyange üte i, ‘Hanghe toi jingne taowe nang shonnang, hüyange hanghe taowe nangte lingne tamnang, kahta aote-o shingne tahtam.’ Hüyange taowe tüokihpu toishao jingne muh naoshelan jaye jaye me shonyangki.

³Tüokhei sha-a nang yak me hang ngoh nangki? Üte ankhüo nga, yejema-a tüome hanghe yin ngoh yahkei.”

⁴Hüpoi ngengpawe David te jan-e i, “Ü-yak me wangpang pute hahpu an yenang; hüpoi naoshelan nehi sheko mepu yoi nying nyingke yan-e ngohpune mengma-a, hatüome üjao an ngohnang.”

⁵David-e ngengpate jan-e i, “Ütingme ülao hipak yintai wante nehoi toman sheko mepu yan-e jaowe angnang; tüokhei tenyih toishao ünyei jingne taipu-a naoshelan wan jaowe shayange yengohlak a?”

⁶Tüokhei ngengpawe David te üjao an pha; hangjingne Kahwang sheshao me angpu an tokte kaiye tüome ülao an yenangpe ngoh; tüopa yahteipu nyih me an üshem me jeilei-e anglak jingne hatüo Youngwanpa sheshao mepu yahteipu ngoh yangki.

⁷Sha-a tüopa nyih me Youngwanpa sheshao me Saul shaoshanpalan yo me kahta ja I nan tük-e angyangki; I min Edomlan Doeg, Saul jing nyeeyompa üjengpa ne ngoh yangki.

⁸David te Ahimelechte i, “Tüome nang yak me ngou yejema-a yanglow yenang a? Taowe ü-yanglow ye-i-ma-a ngouyang yeyah, hangjingne ahngpa toishao heh ngaipu me tao yayong.”

⁹Ngengpawe jan-e i, “Elah kahjee me nange Philistiapa Goliath toipu yanglow, leihuyah, ngengpa phakshaoh tokphei ye me tüome nyeja me beiyange ngohnang; nange hatüo yahning she teihma-a, hatüo yayah; hangjingne tüotokte kaiye tüome ülao-a yenang.” David te i, “Tüokihpu ülao hango yenanglak, üte hatüo yahkei.”

¹⁰David yayong, hüyange Saulte nyampu jingne tüopa nyih phette tai, hüyange Gath ahngpa Achish tangte tai.

¹¹Achish shaoshanpa lan-e Ite i, “Hatüowa kahmük ahngpa David yejepu a? I jeng iman-e teijan-e shekolan-e polok-e hatüo hüke iye hem yelokpu a? ‘Saul-e haja toi, hüyange David-e haja pen’!”

¹²Tüolan ngaowe David mongte shah, hüyange Gath ahngpa Achish te I yeonge nyam-e teih.

¹³Tüokhei iman shao me Iye yoi wanglam leijei, hüyange iman yak me, I-a wuwa-e ngapane menge hüowe tam, hüyange peten taküpte shung, hüyange I iyphao I jumin tangme yünne tam.

¹⁴Achishwe yoi shaoshanpalan te i, “Leihuyah, kahtapa-a ngapa she numan-e ngenang; hüma-a hangne numan-e ü-tangte I woi peipu?

¹⁵Tao ngapa lan-e toinan-e ngohnang kü a? Hüma-a, numan-e tüopa kahta tenok me ü-sheshao me ngapa nyoingoh hüolak woipei a? Tüopa kahtawe tenokte wangngoiye tamlaka?”