Read Konyak Naga 1 SAMUEL 22 Bible Online

1 SAMUEL 22 - Konyak Naga bible

1 SAMUEL 22

¹Tüomepu David phette tai, hüyange Adullam longsa yam-e phet; hüyange aope I jeilan hüyange Ipa noksalan-e tüopa jai, I tangte tüoyete iman lai.

²Shaoshipu kahta lili hüyange pheeisea shaohyange ngohpu kahta lili, hüyange mong yehahpe ngohpu kahta lili, iman nying nyingke jamshe I tangte jem, hüyange iman tangme I woipa ne meng. Hüyange I phei kahta gho peli nanjing ngoh yangki.

³Tüomepu David Moab me Mizpahte tai; hüyange Iye Moab ahngpate i, “Kahwange üjingne hanghe linglakei hatüo taowe manshingpu mongme, üpa hüyange ünyu numan phei pei-e angne tamkei.”

⁴Iye yoi nyupalan Moab ahngpa sheshao me woipei-e tüoh, hüyange David longsa me ngohpu hipak khongküm pume iman phei ngohyangki.

⁵Hüwante hipa Gad-e David tangte pei-e i, “Longsa me tahngoh, nyoi sheihtüoh, hüyange Judah kahtokte taitüoh.” Hüwante David-e nyoijing sheih tai, hüyange Hereth phaote pei.

⁶David phei hüyange woipu kahtalan yam-e okteki she Saul-e jai. Nyih japu hipak me Saul I yak me ngou jonyange, hüyange I shaoshanpalan khongküm I shongme yongyange Gibeah mepu Ramah kahtang üshang me tamarisk peshüm phangme shotte ngoh yangki.

⁷Saul-e I shongme yonge ngohpu shaoshanpalante i, “Numan Benjamin kahtalan, jaiyah, Jesse üha-e numan kahta lilite kah hüyange wuwüngkah phakülak a? Iye numan khongkümpute haja tangme woipane hüyange gho tangme woipane menge tamkülak a?

⁸Hüke numan khongkümpuwe ü-phei tüi-e konkon nang. Aope ühawe Jesse üha phei om, hatüo üte shingne tamlak ao-o yenang hüyange üjingne mongmengpu numan yo me ao-o yenang; yejema-a üha-e ü-phei tüi-e ü-shaoshanpalan shonne tam-e, tenyihpu nyih kih-e tanne ngohpu üte shingne yetampu a?”

⁹Hüwante Saul shaoshanpalan phei yongyange ngohpu Edomlan Doeg-e jan hüyange i, “Taowe Jesse üha Nobte hüyange Ahitub üha Ahimelech tangte peipu ngeyangki.

¹⁰Hüyange I jeng Iye Kahwangte tong, hüyange Ite hahlak pha hüyange Ite Philistiapa Goliath yanglow pha.”

¹¹Hüwante Ahngpawe Ahitub üha Ahimelech ngengpa, hüyange Ipa noksalan khongküm Nob me ngohpu ngengpalan nyiklak jingne shon; hüyange iman khongküm ahngpa tangte pei.

¹²Saul-e i, “Sha-a jaiyah, nang Ahitub üha.” Hüyange Iye jan, “Tüome tao ngohnang, Ü-nokpu!”

¹³Saul-e Ite i, “Hangne Jesse üha David nang ni-e ü-phei tüi-e yongpu? Tüopa toishao me nange Ite an hüyange yanglow pha, hüyange Kahwangte I jingne tong, tüokaiye Iye ü-phei tüi-e yonglak hüyange tenyihpu nyih kih-e tao yomme tanlakne konkonpu?”

¹⁴Ahimelech-e ahngpate jan-e i, “Hüyange nang shaoshanpalan khongkümpu yo me David kihpu, ao ahngpa mata ngohlak? Hüyange nang üyin yompu tangme woipa ngohnang, hüyange nenokme yihnoonne angnang, I kihpu monghümlak ao ngoh nang shi?

¹⁵I jeng Kahwangte taowe tongpu tenyih shaha üwangpa a? Yeje! Ahngpawe yoi shaoshanpate yejema-a I noksa kahtalante hango ümeng tahpha kei; hangjingne nang shaoshanpawe tüolan khongküm yewangpe-o ye-i-ma ünyei-o hango yeshing.”

¹⁶Ahngpawe i, “Ütingme Ahimelech, nang hüyange nenok noksa khongkümpu lilak.”

¹⁷Ahngpawe I shongme yongpu I yompate i, “Yongtüoh hüyange Youngwanpa ngengpalan toitüoh; hangjingne iman yak David phei ngohnang, hangjingne I phette tai she iman-e shing, hüyange hatüo üte shingne yetam.” Hüpoi ahngpa shaoshanpalan-e iman yak Youngwanpa ngengpalan te yele ok.

¹⁸Hüwante ahngpawe Doeg te i, “Nang lüptüoh hüyange ngengpalante yak letüoh.” Hüyange Edomlan Doeg lüp hüyange Iye üjao ngengpalante yak hüng, hüyange tüonyih me Iye ngengpa üjao oyahpu kahta detet me nga toi.

¹⁹Ngengpa chingnyu Nob Iye yanglow phei netan hüyange sheko, naha hüyange düam hüppalan, mahu üponglan hüyange gado hüyange nyeelan toilak jingne ngaokeng pha, hüyange toiküm.

²⁰Hüpoi Ahitub üha Ahimelech Iha yo me ja min Abiathar taiye ok, hüyange David pheite phette pei.

²¹Abiatharwe David te Youngwanpa ngengpalan Saul-e toikümteki she i.

²²David-e Abiathar te i, “Aope Edompa Doeg tüome ngoh, Iye ütingme Saulte ikülak she taowe tüonyih muh shing. Nangpa noksalan khongkümpu lipu jingne ü-hangki ngohnang.

²³Nang ü-phei ngohtüoh, tahnyam; hangjingne aowe ü-üyin yamnang, nang üyin-o yamnang, hüyangpoi nang ü-phei yin-e ngohnang.”