Read Konyak Naga 1 SAMUEL 23 Bible Online

1 SAMUEL 23 - Konyak Naga bible

1 SAMUEL 23

¹Sha-a iman-e David te i, “Leihuyah, Philistia lan-e Keilah phei tüi-e hoknangki, hüyange iman-e tahnoi jing nyieye yahnangki.”

²Tüokhei David-e Youngwanpate tonge i, “Tüolan Philistialan phei hoklak jingne tao tailak jeya?” Hüyange Youngwanpawe David te i, “Taitüoh, hüyange Philistialan phei hoktüoh, hüyange Keilah yintam tüoh.”

³Hüpoi David kahtalan-e Ite i, “Leihuyah, tüome Judah me teman nyam-e ngohnang; Philistialan ükhong phei tüi-e teman Keilahte taihah she ima-a hangke loilak shi!”

⁴Hüwante David-e Youngwanpate üne-o nishe tong. Hüyange Youngwanpawe Ite jan hüyange i, “Yayongtüoh, Keilahte yutüoh, hangjingne taowe Philistialan nang yak me phünne phalak.”

⁵Tüokhei David hüyange I kahtalan Keilahte lai, hüyange Philistialan phei hok, hüyange iman-e tampu yinmoklan yah pei, hüyange iman üngang toi. Hüke Davidte Keilahlan yintam.

⁶Aope Abiathar Ahimelech üha David tangte Keilahte phet te taipu pei, Iye I yak me ngengpa phakshaoh phei pei.

⁷Sha-a David Keilahte pei-e ngohnang she Saulte i; hüyange Saul-e i, “Kahwange ü-yak me I phateki; hangjingne jantpenyu hüyange wenao ngohpu chingnyu jate ongtepuwe I küpyange ngohnang.”

⁸Hüyange kahta lilite, hoklak jingne Keilahte lailak, David hüyange I kahtalan shümlak Saul-e ngaoyan.

⁹Aope David-e I phei tüi-e Saul-e konkon nang she shing, hüyange Iye Abiathar ngengpate i, “Tüome ngengpa phakshaoh wenkei.”

¹⁰Hüwante David-e i, “O Youngwanpa Israel Kahwang, tao ngohpu jingne chingnyu mahtamne Saul-e Keilahte lailak jingne yamnang she nang shaoshanpawe ütingme jainang.

¹¹Keilah kahtalan-e tao I yak me phünne phatamlak a? Nang shaoshanpawe jaipu kih-e Saul laikülak a? O Youngwanpa Israel Kahwang; taowe nangte yop-e tong nang, nang shaoshanpa te i-e tamkhu.” Hüyange Youngwanpawe i, “I laikülak.”

¹²Hüwante David-e i, “Keilah kahtalan-e tao hüyange ü-kahtalan Saul yak me phalak jeya?” Youngwanpawe i, “Iman-e nang phünne phakülak.”

¹³Hüwante David hüyange I kahtalan aoyin gho wok nanjing ngoh, yayong hüyange Keilah mepu yan, hüyange iman-e taiye okpu okpu ke tai. Aope David taiye okteki she Saulte i, chinghah ne yayongpu mepu I lak.

¹⁴David phaotangye wanwüng jengme lojing me ngoh, hüyange Ziph phaonyu jong phaotang kahmük me ngoh; hüyange Saul-e nyihjeih she yam; hüpoi Kahwange I yak me David phünne yepha.

¹⁵Sha-a David nyamme ngoh yangki, hangjingne I üyin yamlak jingne Saul onge ngoh yangki; hüyange Ziph phaonyu jong Horesh me David ngohyangki.

¹⁶Sha-a Saul üha Jonathan yayong, hüyange Horesh me David tangte pei, hüyange Kahwangpawe yintampu wongnanglak jingne Ite henge tam.

¹⁷Iye Ite i, “Tahnyam, hangjingne üpa yak-e nang yeyahlak hüyange nang Israel tangme ahngne menglak, hüyange nang tokphei mepu ne tao ngohlak, hüyange hatüo-o üpa Saul-e shingnang.”

¹⁸Tüophei me imni moini-e Youngwanpa sheshao me jiengjeppu yah; hüyange David phao me ngoh; hüyange Jonathan yoi nokte leihye.

¹⁹Hüwante Ziphlan ütam Saul tangte Gibeah te peiye i, “David yoi nying nyingke toman phei Horesh lojing me phao heongyekao me Hakilah kahtang me lowe yenangpu a?

²⁰Tüokhei sha-a, O Ahngpa, lailak jingne lahnyikpu khongkümpu kih-e laikei; hüyange toman toishao-a ahngpa yakme I phünne phalak hei ngoh nang.”

²¹Saul-e i, “Numan Youngwanpawe moiman shih! Hangjingne üte numan-e shüpsheye ngohnang.

²²Taitüoh, taowe numante yoppe tongnang, üne-o mei mei-e shingtüoh, hüyange I ngohpu nyoi hüyange I kem-e yongpu nyoi ümeken me ngoh, hüyange aowe tüome nge shingtüoh, hüyange leihuyah, hangjingne Iye yeonge konphei jonnang she üte i-e ngohnang.

²³Tüokhei leihuyah hüyange lowe ngohpu khongkümpu me ümeken me I nying nyingke lowe ngohnang shingtüoh, hüyange mei mei shingyange numan ü-tangte nishe peikei, hüyange tao numan phei tailak; hüyange hüke linglak, hüke I kahmük me ngohma-a Judah haja yo me taowe I yamlak.”

²⁴Tüokhei iman yayong, hüyange Saul shaote Ziphte lai. Sha-a David hüyange I Kahtalan Jeshimon heyekao Arabah me Maon phaonyu me ngoh.

²⁵Saul hüyange I kahtalan I yamlak jingne tai. Hüyange David-e tüopa jai, tüokhei I long yote lai, hüyange Maon wanwüng nyoi me ngoh. Hüyange aope Saul-e hatüo jai, Iye David tokpheite Maon phaonyute jange tai.

²⁶Saul jayekao kahtangte ong, hüyange David hüyange I kahtalan kahtang jayekao me ong; hüyange David-e Saulte nyampu jingne mam-e taihu; hangjingne Saul hüyange I kahtalan-e David neikon hüyange iman kahtalan-e iman yahlak jingne oteiye neikonne ngoh;

²⁷hüke ngohpu hipak me ngaolan kipa ja Saul tangte peiye i, “Nang mamyah, hüyange yekei; hangjingne Philistialan chinghah ne peiye ngoh nang!”

²⁸Tüokhei David phei tüi-e jange taipu mepu Saul lüp, hüyange Philistialan tai; tüokhei iman-e tüopa kahmükte Yinne Tampu Longnyu she nyik.

²⁹David tüopa mepu yanne tai, hüyange En-gedi lojing me ngoh.