Read Konyak Naga 1 SAMUEL 24 Bible Online

1 SAMUEL 24 - Konyak Naga bible

1 SAMUEL 24

¹Aope Saul Philistialan pheite taipu mepu leihye, hüke Ite hatüo shingne tam-e i, “Leihuyah, David En-gedi wanwüng jengme ngohnang.”

²Hüwante Saul-e Israel mepu leyangpu kahta haja lüm yah, hüyange meiyah longwak me David hüyange I kahtalan yamlak jingne tai.

³Hüyange I lam nah me nyeekhok longsa ja ngohpu nyoite pei; hüyange Saul ja me shotlak jingne ong. Sha-a David hüyange I kahtalan longsa ümongpa me lowe ngohyangki.

⁴Hüyange David kahtalan-e Ite i, “Leitüoh, Youngwanpawe nangte ‘Leihuyah taowe nang wepa nang yak me phünne phalak she ipu nyih! Hüyange nange Ite nangte meipupake linglak!’ ” Hüwante David yayong, hüyange Saul-e yeshingpe jünge I jing ngeng-ahng phakshaoh üjeng ye wette yah.

⁵Tüophei me David yoi juteih mongjang me shah pei, hangjingne Iye Saul nyejeng wette yah.

⁶Hüyange Iye yoi kahtalante i, “Kahwange leye ngaipu ü-nokpute tüokih-e linglak, I Kahwange minnga phowe le-e ngaipu she shingyange I phei tüi-e ü-yak nolak Kahwange tao tükyah!”

⁷Tüokhei David-e tüolan ngaowe yoi kahtalan tien hüyange Saul te ümeng lingne yetam. Hüyange Saul longsa mepu lüo hüyange yoi lamnyute tai.

⁸Tüophei me David-o yayong hüyange longsa mepu ngai, hüyange Saul tokphei me üngwün-e i, “Ü-nokpu ahngpa!” Hüyange aope Saul-e tokphei yete lüppe lei, David-e yoi sheta kahtok yete khuhta, hüyange iyeshepu hüo.

⁹David-e Saulte i, “Leihuyah, David-e nangte ümeng linglak jingne yamnang she ipu kahtalan ngao nange hangne jainangki?”

¹⁰Leihuyah, hangke Youngwanpawe nang tenyih longsa me ü-yak me phünne pha, tenyih nang mük-e ngeteki. Hüyange ü-kahtalan ütam-e nang toilak jingne üte tong; hüpoi ü-mük-e nangte shüpshe-e yinnetam. Hüyange taowe i, “Taowe ü-nokpu phei tüi-e ü-yak yenolak. Hangjingne I-a Youngwanpawe minnga phowe lepu ngohnang.”

¹¹Leitehu, Opa, eihyang, ü-yak me nangjing ngeng-ahng phakshaoh üjeng jon yange leitüoh; tüo kaiye taowe nang ngeng-ahng phakshaoh yashongye wette yah, hüyangpoi nang yetoishe hüonang. Ü-yak me ümeng yejema-a ngaokhüm mengpu yenang she nange shingyah. Hüyange nang ü-üyin yahne jangyah peyoi taowe nang phei tüi-e ünu yejon.

¹²Tümnipa me aohipa yeshu Youngwanpawe min ikei! Nange üte ümeng phawe yongyangpu jingne Iye nangte ümeng minpha kei, hüyangpoi taowe nangte aope-o ümeng yelinglak.

¹³Üshong wantepu deingao me ipu nange shingnang, “Ümenglan mepu ümeng toi ngainang; hüpoi ü-yak nang tangme yehünglak.

¹⁴Israel Ahngpa-a aote jange ngai ei? Nange aote jangnangki? Kuiha pheite heiya, kuishük pheite!

¹⁵Tüokhei Youngwanpa ngao phünpa ne mengtüoh, hüyange tümnipa me ngaophünpu yahkei, hüyange leihuyah, hüyange ü-yafün yinyah, hüyange nang yak mepu tao yintam pha.”

¹⁶Aope David-e tüolan ngao Saulte ngaopu lak hüke Saul-e i, “Hatüowa nang ngaowüng a, ü-ha David?” Hüyange Saul-e ngao ngai, hüyange shap.

¹⁷Hüyange Iye David te i, “Üphei-a nang shetingpupa ngohnang. Hangjingne taowe nangte ümengpa phapute nangepa-a üte ümeipa pha!

¹⁸Tenyih nange hangke üte meiye jon nange shingne tamteki. Hangjingne Youngwanpawe tao nang yak me phünne phayapeyoi, nange tao yetoi.

¹⁹Hangjingne kahta jawe yoi wepa hüowe peiwante, Iye I yintamlak a? Tüokhei nange tenyih üte lingpu-a Youngwanpawe nangte ümei küppe omne tamshih!

²⁰Sha-a leihuyah, taowe shing, hüke nang ütingme ahngpane menglak hüyange Israel ahngching nang yak me linglak.

²¹Tüokhei sha-a, hüke nange ü-tok pheite ü-jat ü-li lange yewinlak, hüyange nange üpa nokme ümin yemahtamlak she Youngwanpa min me jiengjep tüoh.”

²²Tüokhei David-e Saulte Iye hüke linglak she jiengjep. Hüyange Saul nokte ye; hüpoi David hüyange I kahtalan longsate leihye.